Оқу орнына ішкі істер органдарының кадр саясаты және ішкі қауіпсіздік басқармаларының басшылығы мен жауапты қызметкерлері арасынан арнайы топ жіберілді. Тексеру нәтижелері бойынша Ішкі істер министрлігінде Тәртіптік комиссия өткізілді.
Ішкі істер министрінің бұйрығымен академия бастығы О.Х.Смайылов сеніп тапсырылған бөлімде жұмысты дұрыс ұйымдастырып, бақылауды қадағаламағаны үшін қызметінен босатылды.
Оның тәрбиелік, идеологиялық және кадрлық жұмыстарға жауапты орынбасарын да қызметінен босату ұсынылды. Сонымен қатар, Академияның тағы 16 аға қызметкері қатаң тәртіптік жауапкершілікке тартылды, олардың бесеуі де қызметінен босатылды, деп хабарлады Ішкі істер министрлігінің баспасөз қызметі.
Академияның оқу үдерісі, тұрмыстық жағдайы, моральдық-психологиялық ахуалы, қаржылық-шаруашылық қызметі кіретін кешенді тексеру тағайындалды. Министрліктің ішкі аудит, кадр саясаты және ішкі қауіпсіздік департаменттерінің қызметкерлері білім беру мекемесіне жіберілді.
Министр Ерлан Тұрғымбаевтың тапсырмасы бойынша осындай тексерулер 2021 жылдың 1 тоқсанында Ішкі істер министрлігінің барлық оқу орындарында жүргізілетін болады.
Айта кетелік бұған дейін Алматыдағы ІІМ академиясында оқитын 19 жастағы Саламат Өтегеновтің асүй қоймасында асылып қалғаны хабарланған.
Оның денесі Оралға жеткізіліп, сол жерде жерледі. Журналистер Саламат Өтегеновтің анасымен сөйлесті. Бекзат Иманғалиева отбасында кездескен қиындықтар туралы айтып берді.
Оның айтуынша, Саламат 1-курстан бастап ата-анасынан ақша сұрай бастаған, оның ішінде қысқы сессияны тапсыруға 80 мың теңге де сұраған кездері болыпты.
Кейін 2019 жылдың қыркүйегінде 2-курс басталды. Ата-аналар Саламаттың микроқаржы ұйымынан несие алғанын білген. Олар қарызды жауып тастаған, бірақ оның неге қарыз алғаны туралы ойлана бастаған. Саламат жауап ретінде ата-анасын тағы да мазаламайтынын және олардан ақша сұрағысы келмейтінін айтып, сондықтан да микрокредиттік ұйымнан ақша алғанын айтып түсіндірген.
«Біз оның бұл несиесін жауып бердік, оның не үшін ақша алатынын сұрадық. Ол бізге: «Мама, бұл мен ғана емес, барлық бала осы жақтан ақша алады» деп жауап берді. Ол ақшаны не үшін алғанын түсіндірмеді, бірақ «Апа, сіз түсінбейсіз. Казармалық жүйеде бір нәрсе үшін үнемі ақы төлеуге тура келеді» деді», – дейді марқұмның анасы.
Ол соңғы 3 айда әдеттегіден көп ақша сұрай бастаған. Өлер алдында ол ағасынан ақша жіберуді сұраған.
«2020 жылдың 13 желтоқсанында курсант Саламат Өтегенов асылып қалғанын хабарлаймыз. Аталған дерек бойынша Алматы қаласы ПД өзіндік қауіпсіздік басқармасы Қылмыстық кодекстің 105-бабы 1-бөлігі бойынша сотқа дейінгі тергеу жүргізіп жатыр. Қызметтік тергеу барысында Академия қызметкерлері мен курсанттары тарапынан заңсыз іс-әрекеттер анықталған жоқ», – деді академиядағылар.
