Алматы соттарының бірінде медициналық бұйымдарды жеткізуге қатысты ірі алаяқтық іс бойынша үкім жарияланды. Іс бойынша айыпталушы – Ливан Республикасының 56 жастағы азаматы, «Фармактив» ЖШС-нің директоры әрі иесі Зогби Фернанд, деп хабарлайды dalanews.kz.
Журналист Михаил Козачковтың мәліметінше, тергеу нұсқасына сәйкес, компания соңғы он жыл бойы қандағы глюкоза деңгейін бақылау жүйелерін сатумен айналысқан. Алайда Денсаулық сақтау министрлігі мен дәрі-дәрмек сатып алудың бірыңғай операторы «СК-Фармация» басқа жеткізушілерге басымдық берген.
Осыдан кейін кәсіпкер өзін отандық өндіруші ретінде көрсету туралы шешім қабылдаған деген болжам бар. Ол өнімге мемлекеттік органдардан тіркеу куәліктерін рәсімдеп, кейін Ұлттық кәсіпкерлер палатасы «Атамекеннен» СТ-KZ сертификаттарын алған.
Аталған құжаттар «Фармактивке» «СК-Фармация» өткізетін конкурстарға қатысуға мүмкіндік беріп, нәтижесінде 2017 жылы компания Денсаулық сақтау министрлігіне медициналық өнім жеткізу бойынша 10 жылдық келісімшартқа қол қойған. Келісімнің жалпы құны 17 млрд теңгені құраған.
Тергеу материалдарына сәйкес, өндіріс іс жүзінде қағаз жүзінде ғана болған. Қазақстанға дайын күйіндегі глюкоза өлшейтін құрылғылар мен тест-жолақтары әкелініп, кейін олар қолдан кесіліп, белгілі бір өңдеуден өткізілген. Бұдан соң өнімдер «CodeFree» брендімен қапталып, тегін медициналық көмек бағдарламасы аясында таратылған.
Бұл схема бірнеше жыл бойы жұмыс істегенімен, кейін Ұлттық қауіпсіздік комитетінің назарын аударған. 2025 жылы Зогби Фернанд ұсталып, іс сотқа жолданды.
Сот барысында айыпталушы өз кінәсін мойындамаған. Алайда оның бұрынғы қызметкерлері мемлекеттік органдарға тапсырылатын құжаттарды қолдан жасағандарын және кейбір келісімшарттарға өзге адамдардың атынан қол қойғандарын мәлімдеген.
Тергеу дерегінше, жалған отандық өндіруші мәртебесі арқылы компания салықтық және кедендік жеңілдіктерге ие болған. Соның салдарынан бюджетке 500 млн теңгеден астам қосылған құн салығы түспеген.
Ал Денсаулық сақтау министрлігі мен «СК-Фармация» жеткізілген өнімдерден келген шығын көлемін 14 млрд теңгеден астам деп бағалаған.
Сот үкімімен Зогби Фернанд алаяқтық жасағаны үшін кінәлі деп танылып, 6 жыл 8 айға бас бостандығынан айырылды. Сонымен қатар одан жалпы сомасы 15 млрд теңгеден астам қаражат өндірілмек. Сотталған азаматтың және оның туыстарының есепшоттарындағы қаражат, сондай-ақ жылжымайтын мүлік пен автокөліктер тәркіленді.
Үкім әзірге заңды күшіне енген жоқ.
