Almaty sottarynyń birinde meditsinalyq buiymdardy jetkizýge qatysty iri alaiaqtyq is boiynsha úkim jariialandy. Is boiynsha aiyptalýshy – Livan Respýblikasynyń 56 jastaǵy azamaty, «Farmaktiv» JShS-niń direktory ári iesi Zogbi Fernand, dep habarlaidy dalanews.kz.
Jýrnalist Mihail Kozachkovtyń málimetinshe, tergeý nusqasyna sáikes, kompaniia sońǵy on jyl boiy qandaǵy gliýkoza deńgeiin baqylaý júielerin satýmen ainalysqan. Alaida Densaýlyq saqtaý ministrligi men dári-dármek satyp alýdyń biryńǵai operatory «SK-Farmatsiia» basqa jetkizýshilerge basymdyq bergen.
Osydan keiin kásipker ózin otandyq óndirýshi retinde kórsetý týraly sheshim qabyldaǵan degen boljam bar. Ol ónimge memlekettik organdardan tirkeý kýálikterin rásimdep, keiin Ulttyq kásipkerler palatasy «Atamekennen» ST-KZ sertifikattaryn alǵan.
Atalǵan qujattar «Farmaktivke» «SK-Farmatsiia» ótkizetin konkýrstarǵa qatysýǵa múmkindik berip, nátijesinde 2017 jyly kompaniia Densaýlyq saqtaý ministrligine meditsinalyq ónim jetkizý boiynsha 10 jyldyq kelisimshartqa qol qoiǵan. Kelisimniń jalpy quny 17 mlrd teńgeni quraǵan.
Tergeý materialdaryna sáikes, óndiris is júzinde qaǵaz júzinde ǵana bolǵan. Qazaqstanǵa daiyn kúiindegi gliýkoza ólsheitin qurylǵylar men test-jolaqtary ákelinip, keiin olar qoldan kesilip, belgili bir óńdeýden ótkizilgen. Budan soń ónimder «CodeFree» brendimen qaptalyp, tegin meditsinalyq kómek baǵdarlamasy aiasynda taratylǵan.
Bul shema birneshe jyl boiy jumys istegenimen, keiin Ulttyq qaýipsizdik komitetiniń nazaryn aýdarǵan. 2025 jyly Zogbi Fernand ustalyp, is sotqa joldandy.
Sot barysynda aiyptalýshy óz kinásin moiyndamaǵan. Alaida onyń burynǵy qyzmetkerleri memlekettik organdarǵa tapsyrylatyn qujattardy qoldan jasaǵandaryn jáne keibir kelisimsharttarǵa ózge adamdardyń atynan qol qoiǵandaryn málimdegen.
Tergeý dereginshe, jalǵan otandyq óndirýshi mártebesi arqyly kompaniia salyqtyq jáne kedendik jeńildikterge ie bolǵan. Sonyń saldarynan biýdjetke 500 mln teńgeden astam qosylǵan qun salyǵy túspegen.
Al Densaýlyq saqtaý ministrligi men «SK-Farmatsiia» jetkizilgen ónimderden kelgen shyǵyn kólemin 14 mlrd teńgeden astam dep baǵalaǵan.
Sot úkimimen Zogbi Fernand alaiaqtyq jasaǵany úshin kináli dep tanylyp, 6 jyl 8 aiǵa bas bostandyǵynan aiyryldy. Sonymen qatar odan jalpy somasy 15 mlrd teńgeden astam qarajat óndirilmek. Sottalǵan azamattyń jáne onyń týystarynyń esepshottaryndaǵy qarajat, sondai-aq jyljymaityn múlik pen avtokólikter tárkilendi.
Úkim ázirge zańdy kúshine engen joq.
