بجزق زەينەتاقى جۇيەسىنە قاتىستى جاڭا دەرەكتى جاريالادى، دەپ حابارلايدى Dalanews.kz.
قارجىلىق ساۋات تەلەگرام ارناسىنىڭ مالىمەتىنشە، 2026 جىلعى قاڭتاردا ەلدەگى ايلىق ينفلياسيا 1% بولعان.
“دەمەك، زەينەتاقى اكتيۆتەرىن باسقارۋشىلار كەمىندە وسى دەڭگەيدەن جوعارى تابىس كورسەتكەندە عانا جيناقتىڭ ناقتى قۇنى ساقتالادى. كەرىسىنشە جاعدايدا قارجى ينفلياسيا اسەرىنەن قۇنسىزدانادى”، - دەيدى دەرەككوز.
قازىرگى تاڭدا زەينەتاقى اكتيۆتەرىن باسقاراتىن التى سۋبەكت بار: ۇلتتىق بانك جانە بەس جەكە كومپانيا. الايدا قاڭتار قورىتىندىسى بويىنشا ولاردىڭ تەك ۇشەۋى عانا ينفلياسيادان جوعارى ناتيجە كورسەتكەن.
“كوش باسىندا - Halyk Global Markets. كومپانيا باسقارۋىنداعى قاراجات كولەمى 8،2 ملرد تەڭگە بولعانىمەن، تابىستىلىعى 1،15%-عا جەتىپ، ەڭ جوعارى كورسەتكىشكە شىقتى”، - دەيدى قارجىلىق ساۋات تەلەگرام ارناسى.
ەكىنشى ورىندا Alatau City Invest. ول 15،7 ملرد تەڭگەنى باسقارىپ، اي ىشىندە 1،11% تابىس تاپقان.
ۇزدىك ۇشتىكتى سەنتراس سەكيۋريتيز تۇيىندەيدى. كومپانيانىڭ باسقارۋىنداعى 5،3 ملرد تەڭگە اكتيۆ 1،04% كىرىس اكەلگەن.
ال زەينەتاقى اكتيۆتەرىنىڭ نەگىزگى بولىگى ۇلتتىق بانكتىڭ باسقارۋىندا. ءقازىر وندا حالىقتىڭ 25،4 ترلن تەڭگەسى شوعىرلانعان. مۇنداي ءىرى پورتفەل جوعارى تۇراقتىلىقتى تالاپ ەتەتىنى تۇسىنىكتى. قاڭتار ايىندا ۇلتتىق بانك 0،87% تابىس كورسەتتى. بۇل ينفلياسيادان ءسال تومەن بولعانىمەن، اكتيۆ كولەمىن ەسكەرسەك، كورسەتكىش قالىپتى ديناميكا رەتىندە باعالانىپ وتىر.
“قالعان باسقارۋشىلاردىڭ ناتيجەسى مىناداي: BCC Invest - 0،8%، ال جەكە كومپانيالار ىشىندە ەڭ ءىرى پورتفەلگە (53،8 ملرد تەڭگە) يە Halyk Finance - 0،59%.
بۇل دەرەكتەر ءبىر ماڭىزدى جايتتى اڭعارتادى: اكتيۆ كولەمى ءاردايىم جوعارى تابىستىڭ كەپىلى ەمەس. كەيبىر شاعىن باسقارۋشىلار يكەمدىرەك ستراتەگيانىڭ ارقاسىندا جاقسى ناتيجە كورسەتە العان”، - دەپ قوستى دەرەككوز.
دەگەنمەن ساراپشىلار ءبىر ايلىق ستاتيستيكاعا قاراپ تۇبەگەيلى قورىتىندى جاساۋعا اسىقپاۋ كەرەگىن ەسكەرتەدى. قاڭتارداعى كورسەتكىش - تەك قىسقا مەرزىمدى كورىنىس. سوندىقتان جيناقتى جەكە باسقارۋعا بەرۋدى ويلاعان سالىمشىلار كومپانيالاردىڭ توقساندىق، جىلدىق جانە ۇزاقمەرزىمدى ناتيجەلەرىنە نازار اۋدارعانى ءجون.
بجزق سايتىندا جاريالاناتىن ەسەپتەردى تۇراقتى باقىلاۋ - دۇرىس شەشىم قابىلداۋدىڭ باستى شارتى. ويتكەنى ءاربىر پايىز بولاشاق زەينەتاقىنىڭ ناقتى قۇنى.
