زايسان اۋدانىنا جۇمىس ساپارى بارىسىندا شىعىس قازاقستان وبلىسىنىڭ اكىمى نۇرىمبەت ساقتاعانوۆ ساتپاي ەلدى مەكەنىندە سالىنىپ جاتقان اۋەجايدىڭ قۇرىلىسىمەن تانىستى، – دەپ حابارلايدى Dalanews.kz شقو اكىمىنىڭ باسپا ءسوز قىزمەتىنە سىلتەمە جاساپ.
– بىلتىر مەملەكەت باسشىسى قاسىم-جومارت توقايەۆتىڭ تاپسىرماسىمەن بۇقتىرما كوپىرى پايدالانۋعا بەرىلسە، بيىل زايسان جانە كاتونقاراعاي اۋداندارىندا جاڭا اۋەجايلاردىڭ قۇرىلىسى باستالدى.
جاڭا نىسان قازاقستان مەن جۇڭگو اراسىنداعى جولدى ءبىر كۇنگە قىسقارتتى. ەندى جاڭا اۋەجاي موڭعوليا مەن جۇڭگو اراسىنداعى حالىقارالىق بايلانىستى جيىلەتەدى. بۇل، ءبىرىنشى كەزەكتە، تۋريزمگە، اۋىل شارۋاشىلىعى مەن باسقا دا سالالارعا سەرپىن بەرەتىنى ءسوزسىز، – دەدى وبلىس اكىمى نۇرىمبەت امان ۇلى.
اۋەجايدىڭ قۇرىلىس الاڭىندا ءبىرقاتار ماسەلەلەر بار، ءبىراق ولار ءوز شەشىمىن تاۋىپ جاتىر. ۇشۋ-قونۋ جولاعىنىڭ ۇزىندىعى ازىرگە 2200 مەتر. ونىڭ نەگىزى Airbus جانە Boeing ۇشاقتارىن قابىلداي الاتىنداي ەتىپ سالىنىپ جاتىر. العاشقى كەزەڭدە سىيىمدىلىعى 80-85 ورىندىق ۇشاقتار قاتىنايتىن بولادى. ەگەر اۋە قاتىناستارىنا سۇرانىس ارتىپ، قوزعالىس جيىلەسە، ۇشۋ-قونۋ جولاعىن ەكى شەتىنەن 400 مەترگە ۇزارتۋ كوزدەلەدى. سونداي-اق ۇستىڭگى تاس جول قاباتى تولىق كۇشەيتىلمەك.
اۋەجاي قۇرامىنا 4000 شارشى مەترلىك جولاۋشىلار تەرمينالى، ۇشۋ-قونۋ جولاقتارى، ءتورت اۋە كەمەسىنە ارنالعان پەررون، باسقارۋ-ديسپەچەرلىك مۇنارا، اپاتتىق-قۇتقارۋ قىزمەتى، مەتەوستانسيالار مەن راديوناۆيگاسيالىق جابدىقتار كىرەدى.
اۋەجاي ىسكە قوسىلعاننان كەيىن استانا، الماتى جانە وسكەمەن باعىتتارى بويىنشا ىشكى رەيستەر ورىندالادى. سونىمەن قاتار قىتايدىڭ ءۇرىمجى قالاسىنا، التاي اۋدانى مەن قاناس كولىنە حالىقارالىق رەيستەر اشۋ جوسپارلانۋدا. اۋەجاي Bombardier Q400، ATR-72 سەكىلدى وڭىرلىك اۋە كەمەلەرىن قابىلداي الادى.
