«قۇرمەتتى دوستار! كەشە جانە بۇگىن الماتى قالاسى اۋەزوۆ اۋدانىنىڭ №2 سوتىندا ب.بايبەكتىڭ ار-نامىسىن، قادىر-قاسيەتىن جانە ىسكەرلىك بەدەلىن قورعاۋ تۋرالى تالاپ-ارىز بويىنشا سوت شەشىمىن ورىنداماعانى ءۇشىن ج.ماماي مەن ي.يمانبايەۆادان مەملەكەت كىرىسىنە ءوسىمپۇلدى ءوندىرىپ الۋ تۋرالى 2 ازاماتتىق ءىس قارالدى. ۇسىنىس جەكە سوت ورىنداۋشىسى تاراپىنان ەنگىزىلدى.
وزدەرىڭىز بىلەتىندەي، 2 ينستانسيانىڭ (ءبىرىنشى جانە اپەللياسيالىق) شەشىمىنە سايكەس ج.ماماي مەن ي.يمانبايەۆا ماعان سەنىم بىلدىرۋشىگە قاتىستى جالعان ماتەريالداردى جوققا شىعارىپ، ولاردى جويۋ، سونداي-اق 876 402 تەڭگە كولەمىندە سوت شىعىندارىن تولەۋى ءتيىس بولدى.
شىعىندار سوماسى جاۋاپكەرلەردەن تولىق كولەمدە ءماجبۇرلى تۇردە ءوندىرىلىپ الىنىپ، «بولاشاق» كورپوراتيۆتىك قورىنا ءاۋتيزمى بار بالالارعا كومەك رەتىندە اۋدارىلدى.
الايدا، ماماي مەن يمانبايەۆاعا قاتىستى نەگىزگى تالاپ – جالعان ماتەريالداردى جوققا شىعارۋ جانە ولاردى جويۋ بۇگىنگى كۇنگە دەيىن ورىندالعان جوق.
كەشە جانە بۇگىن جاۋاپكەرلەردىڭ بۇعان دالەلدى سەبەپتەرىنىڭ جوعىنا كوز جەتكىزدىك. ماماي مەن يمانبايەۆانىڭ بارلىق ارگۋمەنتتەرى سۋديالاردى ورىنسىز ايىپتاۋلارعا جانە مۇلدەم دالەلسىز بۇكىل سوت جۇيەسىن قورلاۋعا نەگىزدەلگەن.
مۇنىمەن قوسا، ولار «دەموكراتيا» جانە «ءسوز بوستاندىعى» ۇعىمدارىن قاساقانا جانە ورىنسىز پايدالانىپ وتىر. الايدا كەز كەلگەن ءبىلىمدى ادام دەموكراتيا، ەڭ الدىمەن، زاڭدار مەن راسىمدەردى ساقتاۋ بولىپ تابىلاتىنىن بىلەدى. دەموكراتيانىڭ باستى قاعيداتى بويىنشا بوستاندىق وزگە ادامنىڭ بوستاندىعى باستالاتىن جەردە شەكتەلەدى.
بۇل پرينسيپتەرگە قاراماستان، ماماي مەن يمانبايەۆا سوت زاڭسىز دەپ تانىعان ارەكەتتەردى، اتاپ ايتقاندا – قورلاۋ، جالعان مالىمدەمەلەر تاراتۋ، قوعامدى اداستىرۋ ارەكەتتەرىن جالعاستىرۋدا. ماسەلەن، 15 ماۋسىمدا ءبىرىنشى ساتىداعى سوت شەشىم شىعارعان ساتتەن باستاپ ماماي الەۋمەتتىك جەلىلەردە ماعان سەنىم ءبىلدىرۋشى تۋرالى تاعى 9 جالا جاپقان بەينەروليك جاريالادى.
مامايدىڭ بۇل روليكتەردەگى جانە باسقا دا مالىمدەمەلەرىندەگى ايىپتاۋلار شىندىققا جاناسپايتىنى سوتتا دالەلدەندى. مۇنىڭ بارلىعى تەك قيالي ساندىراق قانا.
مۇنى تۇسىنگەن جاۋاپكەردىڭ زاڭگەرى ەرلان قالييەۆ مامايدىڭ تاكتيكاسىن باسشىلىققا الىپ، سوتتى ارزان قويىلىمعا اينالدىرۋعا تىرىستى. سونىمەن، ءوزىن كاسىبي زاڭگەر رەتىندە كورسەتەتىن ول كەشە جانە بۇگىن جوسىقسىز دولبارلار، قيسىنسىز ايىپتاۋلار مەن ىسكە قاتىسى جوق وتىنىشتەر جاسادى. مۇنى سوتقا قالييەۆتىڭ ءوتىنىشى بويىنشا ءىستى قاراۋعا قاتىسقان پروكۋرور دا راستادى.
كۇتىلگەندەي، سوت ج.ماماي مەن ي.يمانبايەۆادان مەملەكەت كىرىسىنە ءارقايسىنان 140 016 تەڭگە مولشەرىندە ءوسىمپۇل ءوندىرىپ الۋ تۋرالى شەشىم شىعاردى. 280 مىڭ تەڭگە كولەمىندەگى بۇل سوما الماتى قالاسىنىڭ بيۋدجەتىنە تۇسەدى.
ماماي مەن يمانبايەۆانىڭ جەكە باسىن جانە مىنەز-قۇلقىن ەسكەرە وتىرىپ، سوتتىڭ بۇل شەشىمى زاڭنىڭ ۇستەمدىگى جانە زاڭدى بۇزعانى ءۇشىن جازانىڭ بۇلتارتپاستىعى قاعيداتتارىن ءىس جۇزىندە كورسەتۋ تۇرعىسىنان ۇلكەن مانگە يە بولادى دەپ ويلايمىن.
ەسكە سالا كەتەيىن، ەگەر ماماي مەن يمانبايەۆا ايىپتاۋلارىن تەرىسكە شىعارماسا جانە جالا جاپقان بەينەروليكتەرىن جويماسا، وندا 27 قازاننان باستاپ سوت ورىنداۋشىسى «اكىمشىلىك قۇقىق بۇزۋشىلىق تۋرالى» كودەكسكە سايكەس بورىشكەرلەردى اكىمشىلىك جاۋاپكەرشىلىككە تارتۋعا (ايىپپۇل سالۋعا نەمەسە قاماۋعا الۋعا)، سودان كەيىن قىلمىستىق كودەكسكە سايكەس قىلمىستىق جاۋاپكەرشىلىككە تارتۋعا باستاماشى بولادى (ءارقايسىسىنا 800 ساعات كولەمىندە قوعامدىق جۇمىس، 3 جىلعا دەيىن باس بوستاندىعىن شەكتەۋ نەمەسە ايىرۋ). بۇعان دەيىن مالىمدەگەنىمدەي، بۇل جاعدايدا ءبىز جاۋاپكەرلەردى قوعامدىق جۇمىستارعا تارتۋ تۋرالى ءوتىنىش بەرەتىن بولامىز.
جالپى، سوڭعى ەكى وتىرىستىڭ قورىتىندىسىن جانە قازاقستاندىق سوت تورەلىگىن قابىلدامايتىن جاۋاپكەرلەردىڭ ەپاتاجدىق مالىمدەمەلەرىن ەسكەرە وتىرىپ، ج.ماماي مەن ي.يمانبايەۆانىڭ «الماتى كوشەلەرىن بىرلەسىپ سىپىراتىن» باستى شوۋىن كورەتىن بولارمىز.
ب.بايبەكتىڭ تالابى بويىنشا ج.ماماي مەن ي.يمانبايەۆاعا قاتىستى سوتتىڭ زاڭدى شەشىمىنىڭ ورىندالۋ بارىسى تۋرالى ءارى قاراي دا حاباردار ەتەتىن بولامىن» دەدى زاڭگەر.
