قازاقستاندا Cassa Depositi e Prestiti مەملەكەتتىك بانكىنىڭ نەسيە جەلىسى اشىلۋدا. بۇل جايىندا قازاقستاننىڭ ساۋدا جانە ينتەگراسيا ءمينيسترى ارمان شاققالييەۆ پەن يتاليانىڭ سىرتقى ىستەر ءمينيسترىنىڭ ورىنباسارى ەدموندو چيريەلليدىڭ ەكى جاقتى كەزدەسۋ بارىسىندا ءمالىم بولدى، دەپ حابارلايدى Dalanews.kz.

ارمان شاققالييەۆتىڭ ايتۋىنشا، يتاليا ەۋروپالىق وداق ەلدەرى اراسىندا قازاقستاننىڭ نەگىزگى ساۋدا سەرىكتەستەرىنىڭ ءبىرى بولىپ تابىلادى.

2023 جىلى ەكى ەل اراسىنداعى جالپى تاۋار اينالىمى 16،1 ملرد دوللاردى قۇرادى، بۇل وتكەن جىلمەن سالىستىرعاندا 7،8%-عا كوپ. قازاقستاننان يتالياعا ەكسپورت 14،8 ملرد دوللارعا جەتتى، ال يمپورت 1،2 ملرد دوللاردى قۇرادى، بۇل ءوسىمنىڭ وڭ ديناميكاسىن كورسەتىپ وتىر. ساۋدا-ساتتىقتىڭ ءوسۋى اعىمداعى جىلى دا جالعاسىن تاپتى. 2024 جىلدىڭ سەگىز ايىندا ساۋدا كولەمى 33%-عا ءوسىپ، 13،8 ملرد دوللاردى قۇرادى، بۇل رەتتە قازاقستاندىق ءونىمنىڭ ەكسپورتى 36% -عا ارتىپ، 12،9 ملرد دوللارعا جەتتى.

ساۋدا جانە ينتەگراسيا ءمينيسترى ارمان شاققالييەۆ 29 قازاندا استانادا ەكونوميكالىق ىنتىماقتاستىق جونىندەگى قازاقستان-يتاليا ۇكىمەتارالىق جۇمىس توبىنىڭ (ۇاك) 9-شى وتىرىسى وتكەنىن اتاپ ءوتتى. وتىرىس مەملەكەت باسشىسى قاسىم-جومارت توقايەۆتىڭ قاڭتار ايىندا يتالياعا ساپارىنان كەيىنگى تاپسىرماسى شەڭبەرىندە ءوتتى جانە ساۋدا-ەكونوميكالىق ماسەلەلەردى تالقىلاۋدا ماڭىزدى ءرول اتقارادى.

ءوز كەزەگىندە يتالياندىق قوناق ەدموندو چيريەللي شاقىرعانى ءۇشىن العىسىن ءبىلدىرىپ، كەزدەسۋدىڭ ماڭىزدىلىعىن اتاپ ءوتتى.

"ءبىزدىڭ ساۋدا-ەكونوميكالىق سالاداعى قارىم-قاتىناسىمىز نىعايا تۇسەتىنىنە سەنىمدىمىز. قازاقستان ورتالىق ازيادا نەگىزگى ورىنعا يە جانە ەۋروپانى وڭىرمەن بايلانىستىرادى. ەكىجاقتى ساۋدا كولەمى ەداۋىر ءوستى جانە ءبىز قول جەتكىزىلگەن ناتيجەلەرگە قاناعاتتانامىز. ءبىز قازاقستاندا Cassa Depositi e Prestiti مەملەكەتتىك بانكىنىڭ نەسيە جەلىسىن اشۋدى جوسپارلاپ وتىرمىز. ەكى ەل اراسىنداعى قارىم-قاتىناستىڭ دامي بەرەتىنىنە سەنىمدىمىز. بۇل كەزدەسۋلەردى وتكىزۋ ءبىزدىڭ ىنتىماقتاستىعىمىزدىڭ التى جىلدىق كەزەڭىن اياقتاعان ماڭىزدى كەزەڭ بولدى"، - دەدى يتاليانىڭ سىرتقى ىستەر ءمينيسترىنىڭ ورىنباسارى.