تاياۋدا ۇستازداردىڭ تامىز كونفەرەنسياسى اياسىندا «ارنايى جانە ينكليۋزيۆتى ءبىلىم بەرۋدى دامىتۋدىڭ ۇلتتىق عىلىمي-پراكتيكالىق ورتالىعى» رمم ۇيىمداستىرۋىمەن «كەدەرگىسىز ءبىلىم بەرۋ: ساپا مەن قولجەتىمدىلىك» رەسپۋبليكالىق پانەلدىك سەكسياسى ءوتتى.
ءىس-شاراعا ق ر وقۋ-اعارتۋ مينيسترلىگىنىڭ وكىلدەرى، وڭىرلىك ءبىلىم باسقارمالارى مەن ادىستەمەلىك ورتالىقتاردىڭ قىزمەتكەرلەرى، ارنايى ءبىلىم بەرۋ ۇيىمدارىنىڭ باسشىلارى مەن پەداگوگتەرى، سونداي-اق ۇكىمەتتىك ەمەس ۇيىمداردىڭ وكىلدەرى قاتىستى.
سەكسيادا قازاقستانداعى ارنايى جانە ينكليۋزيۆتى ءبىلىم بەرۋ سالاسىنداعى وزەكتى ماسەلەلەر، ايماقتىق تاجىريبە جانە يننوۆاسيالىق شەشىمدەر تالقىلاندى. سپيكەرلەر مەملەكەتتىك ساياساتتى جۇزەگە اسىرۋ شارالارى، مەكتەپ وقۋشىلارىنىڭ كاسىبي باعدارلانۋى مەن ينكليۋزيۆتىلىك، بارلىق بالالارعا تەڭ قولجەتىمدى ءبىلىم بەرۋدى قامتاماسىز ەتەتىن كومەكشى تەحنولوگيالار، «پيونەر+» ينكليۋزيۆتى شەشىمدەرىنىڭ ەكوجۇيەسى، الەۋمەتتىك قولداۋ مەن وڭالتۋ قىزمەتتەرى، ارنايى مەكتەپتەردى جابدىقتاۋ، مۇمكىندىگى شەكتەۋلى بالالارعا كورسەتىلەتىن كومەك، وڭىرلىك كاسىپتىك باعدارلاۋ تاجىريبەسى جانە «مەنىڭ بولاشاق ماماندىعىم» باعدارلاماسى بويىنشا باياندامالار جاسادى.
پانەلدىك سەكسيا بارىسىندا ارنايى جانە ينكليۋزيۆتى ءبىلىم بەرۋدى دامىتۋدىڭ ۇلتتىق عىلىمي-پراكتيكالىق ورتالىعىنىڭ ديرەكتورى لاۋرا بۋتابايەۆا «ينكليۋزيۆتى جانە ارنايى ءبىلىم بەرۋ سالاسىنداعى مەملەكەتتىك ساياساتتى جۇزەگە اسىرۋ شارالارى» تاقىرىبىندا بايانداما جاساپ، قازاقستانداعى ينكليۋزيۆتى ءبىلىم بەرۋدىڭ ماڭىزدىلىعى مەن مەملەكەتتىك ساياساتتىڭ باسىم باعىتتارىن اتاپ ءوتتى.
«ەرەكشە ءبىلىم بەرۋ قاجەتتىلىگى بار بالالاردى ارنايى پسيحولوگيالىق-پەداگوگيكالىق قولداۋمەن قامتۋدىڭ ءبىر تەتىگى – ارنايى ءبىلىم بەرۋ ۇيىمدار جەلىسىن كەڭەيتۋ. ءبىلىم بەرۋ ۇيىمدارىندا بارلىق بالالارعا تەڭ مۇمكىندىك جاساۋ ماقساتىندا ارنايى جاعدايلار جاسالىپ، تۇراقتى مونيتورينگ جۇرگىزىلەدى. قازىرگى تاڭدا مەكتەپكە دەيىنگى ۇيىمداردىڭ 73 %-ىندا، مەكتەپتەردىڭ 91 %-ىندا، كوللەدجدەردىڭ 85 %-ىندە ينكليۋزيالىق ءبىلىم بەرۋ جاعدايلارى قامتاماسىز ەتىلگەن»، – دەدى ورتالىق باسشىسى.
ايتا كەتۋ كەرەك، ارنايى جانە ينكليۋزيۆتى ءبىلىم بەرۋدى دامىتۋدىڭ ۇلتتىق عىلىمي-پراكتيكالىق ورتالىعى ەرەكشە ءبىلىم بەرۋدى قاجەت ەتەتىن بالالارمەن جۇمىس ىستەيتىن مامانداردىڭ بىلىكتىلىگىن ارتتىرۋدا جەتەكشى مەكەمە بولىپ تابىلادى. ورتالىق ءتۇرلى قاجەتتىلىكتەر مەن ءبىلىم بەرۋ دەڭگەيلەرىن ەسكەرە وتىرىپ، ارنايى ءبىلىم بەرۋ مازمۇنىن قامتيتىن 83 وقۋلىق پەن وقۋ-ادىستەمەلىك كەشەن دايىندادى. سونىمەن قاتار، پەداگوگتەرگە ارنالعان ينكليۋزيۆتى ورتادا وقىتۋ، تۇزەتۋ جۇمىستارى، سارالاپ وقىتۋ تاسىلدەرى جانە ەرەكشە قاجەتتىلىكتەرى بار بالالارمەن جەكە جۇمىس جۇرگىزۋ بويىنشا 15 ادىستەمەلىك ۇسىنىم ازىرلەندى. ارنايى جانە ينكليۋزيۆتى ءبىلىم بەرۋ ۇيىمدارى ءۇشىن جاڭارتىلعان ءبىلىم بەرۋ مازمۇنىنا سايكەس بەيىمدەلگەن 67 تيپتىك وقۋ باعدارلاماسى جاسالدى.
ءىس-شارا بارىسىندا «E-ىمداۋ» ءموبيلدى قوسىمشاسىنىڭ تانىستىرىلىمى مەن ادىستەمەلىك كورمە وتكىزىلدى، سونداي-اق ينكليۋزيۆتى جانە ارنايى ءبىلىم بەرۋ تۋرالى بەينەروليك كورسەتىلدى.
سەكسيا قورىتىندىسىندا قاتىسۋشىلار پىكىر الماسىپ، ارنايى جانە ينكليۋزيۆتى ءبىلىم بەرۋدىڭ ساپاسى مەن قولجەتىمدىلىگىن ارتتىرۋعا باعىتتالعان ۇسىنىستار ايتتى. پانەلدىك سەكسيا ءوز جۇمىسىن ناتيجەلى اياقتادى.
