سولتۇستىك قازاقستان وبلىستىق مەشىتىنىڭ باس يمامى، قمدب ايماقتاعى وكىلى حامزات قاجى ادىلبەكوۆ الەۋمەتتىك جەلىدە تاراعان بەينەجازباعا قاتىستى جاۋاپ بەردى، دەپ حابارلايدى Dalanews.kz.
بۇعان دەيىن جەلىدە مەشىتتەگى گۋمانيتارلىق كومەك بارىسىن، ونىڭ قايدا جىبەرىلەتىنىن سۇراپ، ۆيدەوعا تۇسىرگەن بلوگەردىڭ 15 تاۋلىككە قاماۋعا الىنعانىن باياندايتىن بەينەجازبا تاراعان بولاتىن. بۇل دەرەك كوپشىلىك تاراپىنان قىزۋ تالقىعا تۇسكەن.
كوپ ۇزاماي قازاقستان مۇسىلماندارى ءدىني باسقارماسىنىڭ سولتۇستىك قازاقستان وبلىسىنداعى وكىلى، باس يمامى حامزات قاجى ادىلبەكوۆ اتالعان جاعدايعا قاتىستى جاۋاپ بەردى.
"بۇل كۇندەرى ەلىمىزدە ءبىراز قيىندىقتار مەن سىناقتار ءوتىپ جاتىر. وسى قيىن كەزەڭدە بىرلىگىمىزدى ساقتاۋ وتە ماڭىزدى. وكىنىشكە قاراي، تۇراقتىلىعىمىزعا نۇقسان كەلتىرگىسى كەلەتىندەر بار. الەۋمەتتىك جەلىدە رۋسلان قايىربەكوۆ ەسىمدى ازاماتتىڭ قاتىسۋىمەن تۇسىرىلگەن ۆيدەو قوعامدا ءتۇرلى پىكىر تۋعىزۋدا. ۆيدەوعا نازار اۋدارساڭىز، اتالعان ازامات مەشىتتە قايىرىمدىلىق شاراسىن تۇسىرگەنى ءۇشىن مەشىت يمامىمەن سوزگە كەلىپ، ناتيجەسىندە 15 تاۋلىككە سوتتالعانىن ايتادى.
شىندىعىندا، جاعداي باسقاشا بولعان ەدى. ازامات رۋسلان قايىربەكوۆ سۋ تاسقىنىنان زارداپ شەككەن وتباسىنىڭ (ەرلى-زايىپتىلاردىڭ)، ياعني كومەككە مۇقتاج جانداردىڭ رۇقساتىنسىز مەشىتتەن ساداقا الىپ جاتقانىن ۆيدەوعا ءتۇسىرىپ العان. بۇل كۇيزەلىسكە ۇشىراعان وتباسى ءۇشىن قيىن. ايەلى دە ودان بەينەجازبانى ءوشىرۋدى سۇرايدى. الايدا ر.قايىربەكوۆ بۇل وتىنىشكە قۇلاق اسپايدى"، - دەيدى ءدىن وكىلى.
ونىڭ سوزىنشە، وسى كەزدە مەشىتتىڭ نايب يمامى اراشا ءتۇسىپ، ونى ءوشىرۋدى تالاپ ەتەدى. دەسە دە، ازداپ دورەكى سويلەگەن، الايدا ەشقانداي بالاعاتتاماعان.
"وسى كەزدە ر.قايىربەكوۆ ءاي-شايعا قاراماي، يمامنىڭ بەتىنەن ەكى رەت ۇرعان. ماسەلە وسىندا، ول گۋمانيتارلىق كومەك بارىسىن ۆيدەوعا تۇسىرگەنى ءۇشىن ەمەس، مەشىتتە يمامدى ۇردى دەپ ايىپتالىپ وتىر. وقيعا كامەراعا ءتۇسىپ قالىپ، يمام ونىڭ ۇستىنەن ارىز جازباعان. ارىز تۇسسە، ول اكىمشىلىك ەمەس، قىلمىستىق جازاعا تارتىلادى. ءتىپتى جالعان اقپارات تاراتقان الەۋمەتتىك جەلى يەلەرى دە تيىسىنشە جاۋاپقا تارتىلادى"، - دەپ ءتۇسىندىردى حامزات قاجى ادىلبەكوۆ.
