Soltústik Qazaqstan oblystyq meshitiniń bas imamy, QMDB aimaqtaǵy ókili Hamzat qajy Ádilbekov áleýmettik jelide taraǵan beinejazbaǵa qatysty jaýap berdi, dep habarlaidy Dalanews.kz.
Buǵan deiin jelide meshittegi gýmanitarlyq kómek barysyn, onyń qaida jiberiletinin surap, videoǵa túsirgen blogerdiń 15 táýlikke qamaýǵa alynǵanyn baiandaityn beinejazba taraǵan bolatyn. Bul derek kópshilik tarapynan qyzý talqyǵa túsken.
Kóp uzamai Qazaqstan musylmandary dini basqarmasynyń Soltústik Qazaqstan oblysyndaǵy ókili, bas imamy Hamzat qajy Ádilbekov atalǵan jaǵdaiǵa qatysty jaýap berdi.
"Bul kúnderi elimizde biraz qiyndyqtar men synaqtar ótip jatyr. Osy qiyn kezeńde birligimizdi saqtaý óte mańyzdy. Ókinishke qarai, turaqtylyǵymyzǵa nuqsan keltirgisi keletinder bar. Áleýmettik jelide Rýslan Qaiyrbekov esimdi azamattyń qatysýymen túsirilgen video qoǵamda túrli pikir týǵyzýda. Videoǵa nazar aýdarsańyz, atalǵan azamat meshitte qaiyrymdylyq sharasyn túsirgeni úshin meshit imamymen sózge kelip, nátijesinde 15 táýlikke sottalǵanyn aitady.
Shyndyǵynda, jaǵdai basqasha bolǵan edi. Azamat Rýslan Qaiyrbekov sý tasqynynan zardap shekken otbasynyń (erli-zaiyptylardyń), iaǵni kómekke muqtaj jandardyń ruqsatynsyz meshitten sadaqa alyp jatqanyn videoǵa túsirip alǵan. Bul kúizeliske ushyraǵan otbasy úshin qiyn. Áieli de odan beinejazbany óshirýdi suraidy. Alaida R.Qaiyrbekov bul ótinishke qulaq aspaidy", - deidi din ókili.
Onyń sózinshe, osy kezde meshittiń naib imamy arasha túsip, ony óshirýdi talap etedi. Dese de, azdap dóreki sóilegen, alaida eshqandai balaǵattamaǵan.
"Osy kezde R.Qaiyrbekov ái-sháiǵa qaramai, imamnyń betinen eki ret urǵan. Másele osynda, ol gýmanitarlyq kómek barysyn videoǵa túsirgeni úshin emes, meshitte imamdy urdy dep aiyptalyp otyr. Oqiǵa kameraǵa túsip qalyp, imam onyń ústinen aryz jazbaǵan. Aryz tússe, ol ákimshilik emes, qylmystyq jazaǵa tartylady. Tipti jalǵan aqparat taratqan áleýmettik jeli ieleri de tiisinshe jaýapqa tartylady", - dep túsindirdi Hamzat qajy Ádilbekov.
