ءقازىر ەستيتىندەرىڭىزدى سيناي تاۋىنىڭ شىڭى ەمەس، بىرنەشە مۇزدىقتىڭ توبەسى عانا دەپ ۇعارسىزدار. مەن مۇسا (ع.س.) ەمەسپىن، سىزدەر دە ەسكى زامانداعى ەۆرەيلەرگە ۇقسامايسىزدار. بۇل − كاليفورنيا ماڭىندا سارعىش داپتەرگە تۇسكەن رەتسىز شيمايلار عانا.
قالاساڭىز، ەستىمەگەندەي بولىڭىز، قاجەت بولسا، كەلىسپەۋگە قۇقىڭىز بار، باسقاشا مۇمكىن بولماسا ۇمىتىڭىزدار: وندا مىندەتتەلگەن ەشتەڭە جوق. ەگەر مۇنىڭ ىشىندە الدەنە اجەتىڭىزگە جاراسا، قۋانىشتىمىن. جاراماسا، وعان اشۋلانا قويماسپىن.
- ءقازىر دە، كەيىن دە ءتىل ۇشىنداعى ءسوزدىڭ دالدىگىنە ءمان بەرگەن ءجون-اۋ دەيمىن. سوزدىك قورىڭىزدى كوبەيتۋگە تىرىسىڭىز جانە وعان بانكتەگى ەسەپشوتپەن بىردەي قاراڭىز. ماقسات شەشەندىك ونەرىڭىزدى بايقاتۋ، نەمەسە ءسىزدى تابىستى قىزمەتكەر، يا زيالى اقىلگوي قىلۋ ەمەس – دەگەنمەن ۋاقىت وتە ول دا مۇمكىن. ماقسات − ءوزىڭىزدى نەعۇرلىم انىق جانە تولىق ۇعىندىرۋ، ءبىر سوزبەن ايتقاندا – ءسىزدىڭ جان-دۇنيەڭىزدىڭ تەپە-تەڭدىگى. ويتكەنى ايتىلماعان، فورماسىن تاپپاعان وي مەن سەزىم نيەۆروزعا اكەلەدى.
كۇن سايىن ادامنىڭ جان-دۇنيەسىندە قانشاما نارسە قۇبىلىپ تۇرادى، ءبىراق ونى جەتكىزۋدىڭ جولى بىرەۋ عانا. اتاۋىن تاپپاعان سەزىنىستەر، تولعانىستار، بوياۋلار، ويلار − قوردالانا كەلە پسيحولوگيالىق كۇيزەلىسكە، عۇمىرلىق ساتسىزدىككە جەتەلەيدى. مۇنى بولدىرماۋ ءۇشىن كىتاپ كەمىرۋ مىندەتتى ەمەس.
جاي عانا سوزدىك ساتىپ الىپ، كۇن سايىن وقۋ كەرەك، ال كەيدە – ولەڭ كىتابىن. ولار ايتارلىقتاي قىمبات ەمەس، ال ەڭ قىمباتتارىنىڭ ءوزى (لۋپا قوسىپ بەرەتىندەرى) پسيحياتردىڭ قىزمەتىنەن ارزانعا تۇسەدى. ەگەر قالاي دا پسيحياترعا بارامىن دەپ شەشسەڭىز، «ءسوز ماسكۇنەمدىگى» دەگەن سيمپتوممەن بارعان ءجون.
- ءقازىر دە، كەيىن دە اتا-اناڭىزعا مەيىرىمدى بولۋعا تىرىسىڭىز. ولارعا قارسى شىقپاۋعا ادەتتەنىڭىز، سەبەبى قۇداي بىلەدى، اتا-اناڭىز سىزدەن بۇرىن قايتىس بولۋى ىقتيمال. ياعني ءوزىڭىزدى ازادان بولماسا دا، وكىنىشتەن قۇتقارا الاسىز.
ەگەر بىرەۋگە قارسى شىققىڭىز كەلسە، جانى سونشالىقتى جەڭىل جارالانبايتىن نىسان تاڭداڭىز. اكەڭىز بەن شەشەڭىز (باۋىرلارىڭىز، اپكە-قارىنداستارىڭىز بەن جۇبايىڭىز سياقتى) - تىم جاقىن نىسانا. مۇنداي قاشىقتىقتان ءدوپ تيگىزبەۋ مۇمكىن ەمەس.
- ساياساتكەرلەرگە تىم سەنە بەرمەۋگە ماشىقتانىڭىز. ساياساتكەرلەردىڭ ءبارى اقىلسىز نە پاسىق بولعاندىقتان ەمەس (كوبىندە سولاي بولادى دا)، ولارعا ارتىلعان جۇمىستىڭ اۋقىمى ەڭ جاقسىلارى ءۇشىن دە، ءبىر پارتيا، دوكترينا، ءتىپتى جۇيە ءۇشىن دە تىم كوپ بولعاندىقتان.
دۇنيە ءمىنسىز ەمەس؛ التىن عاسىر ەشقاشان بولماعان، بولمايدى دا. بۇل الەمدە بولاتىن ءبىر عانا وزگەرىس – ول ۇلعايا تۇسەدى، ياعني ولشەمدەرى وزگەرمەسە دە، ادام سانى كوبەيە بەرەدى.
- جۇرتتان بولەكتەنۋگە تىرىسپاڭىز، قاراپايىم بولىڭىز. ءبىز ءقازىر دە كوپپىز، جاقىن ارادا ءتىپتى كوبەيە تۇسەمىز. جىلى ورىنعا تالاس بارىسىندا مىندەتتى تۇردە بىرەۋ جاپا شەگەدى. بىرەۋدىڭ اياعىن باسۋعا تۋرا كەلگەنى – ونىڭ باسىنا شىعۋ كەرەك دەگەن ءسوز ەمەس.
ونىڭ ۇستىنە ماقساتقا جەتكەندە ءسىز كورەتىن ءبىر-اق نارسە: جىلى ورىنعا جايعاسقان، ءبىراق «قالاي بولار ەكەن» دەپ ەرتەڭىنە الاڭداۋلى ادامدار عانا. ەڭ داۋلەتتى جانە اتاقتى جاندار دا وسى «قالاي بولار ەكەن» دەگەن ۋايىممەن تىنىستايدى. ءتۇپتىڭ تۇبىندە ءوزىڭ سياقتىلاردان داۋلەتىڭ اسىپ تۇرعانى دا جاقسى ەمەس، اسىرەسە «ءوزىڭ سياقتىلار» ميللياردتاپ سانالسا.
باسقا بىرەۋدە بار الدەنەنى قالاۋ ءوز ەرەكشەلىگىڭدى جوعالتۋمەن تەڭ.
ءبىراق «مەن عاجاپپىن» دەگەن وي دا تۇلعاڭىز ءۇشىن ءقاۋىپتى. شىندىقتى الاقانداعىمەن عانا ەسەپتەي باستايسىز.
ات توبەلىندەي باي-باعلانداردان گورى قاراقۇرىم كوپشىلىك جۇرتقا ۇقساۋعا تىرىسىڭىز. ميميكريا تۇلعالىقتان باس تارتۋ ەمەس، ونى قورعاۋعا تىرىسۋ. جانە دە سىزدەرگە ءاردايىم باسەڭ سويلەڭىزدەر دەر ەدىم، ءبىراق ونسىز دا تىم ارتىق كەتكەنىمدى ءبىلىپ تۇرمىن. ەستەرىڭىزدە بولسىن: ءسىزدىڭ اينالاڭىزدا ىلعي دا ءبىر جاقىنىڭىز بار. ونى قۇلاي ءسۇي دەمەيمىن، ءبىراق نەعۇرلىم از مازالاۋعا جانە جانىن جارالاماۋعا تىرىسىڭىز.
- ءوزىڭىزدى بەيباق ساناۋدان اۋلاق بولىڭىز. ون ەكى مۇشەڭىزدە سۇق ساۋساعىڭىزعا اباي بولىڭىز، ويتكەنى ول «وسەكشى». سۇق ساۋساق – سورلىلىقتىڭ بەلگىسى، جەڭىلىستىڭ ءسينونيمى. قانداي قيىن جاعدايعا تۇسسەڭىز دە ول ءۇشىن تاريحتى، مەملەكەتتى، باسشىلىقتى، ءناسىلدى، اتا-اناڭىزدى، ايدىڭ فازاسى مەن كۇننىڭ ماگنيتتىك داۋىلىن، باقىتسىز بالالىق شاقتى، ت.ب. سىرتقى كۇشتەردى كىنالاماڭىز. ءسىز كىنانى باسقا بىرەۋگە اۋدارعاندا الدەنەنى وزگەرتۋ مۇمكىندىگىنەن ايىرىلاسىز.
جالپى، ءومىردى تەك قانا يگىلىكتەرى ءۇشىن ەمەس، قيىندىقتارى ءۇشىن دە قۇرمەتتەي ءبىلۋدى ۇيرەنىڭىز. قيىندىقتار – بۇل ويىننىڭ اجىراماس بولشەگى، جانە قيىندىقتاردىڭ ءبىر جاقسى جەرى – شىنايى كەلەدى. جانىڭىز ىشقىنىپ، قينالساڭىز، ىلعي دا ەستە تۇتىڭىز: وسى ساتتە ءومىر سىزبەن وزىنە جاقسى ءمالىم ءبىر عانا تىلدە پىكىرلەسىپ جاتىر.
باسقا سوزبەن، ازداپ مازوحيست بولىڭىز. قيىندىقتى جاقسى كورمەسەڭىز، ءومىردىڭ ءمانى تولىققاندى بولمايدى.
- ءسىز قادام باسقالى تۇرعان الەم وسى ۋاقىتقا دەيىن جاقسى اتانىپ ۇلگەرمەدى. ول تاريحي ەمەس، گەوگرافيالىق؛ الەۋمەتتىك ەمەس، ۆيزۋالدى تۇرعىدان تارتىمدىراق. ءسىزدى باقىتسىز قىلۋعا تىرىساتىندارعا ءمان بەرمەۋگە ماشىقتانىڭىز. وندايلار كوپ بولادى – رەسمي ورىنداردا دا، قاراپايىم ورتادا دا. ەگەر ولاردان قۇتىلا الماساڭىز، شىداڭىز، ءبىراق قۇتىلعان كۇنى-اق ۇمىتىپ كەتىڭىز. تىڭدارمانىڭىز قانشا جاناشىر بولسا دا، جاڭاعىلاردان كورگەن قۇقايلارىڭىز تۋرالى ءتىس جارماڭىز.
مۇنداي اڭگىمەلەر ارقىلى دۇشپاندارىڭىزدى كۇشەيتە تۇسەسىز. شىنداپ كەلگەندە، ەكى ادامنىڭ تەكەتىرەسى ەشتەڭەگە تۇرمايدى. ودان شىققان جاڭعىرىق قانا ماڭىزدى. جاڭعىرىققا لايىقتىدان ارتىق كوڭىل دە، ۋاقىت تا بولمەڭىز.
ءتۇپتىڭ تۇبىندە دۇشپانداردىڭ ىس-ارەكەتى وعان ءسىزدىڭ قانداي ءمان بەرگەنىڭىزبەن ولشەنەدى.
1988 جىل.
(ىقشامدالىپ الىندى)
اۋدارعان – ا.نۇرشا
