كەزدەسۋدە ايماق باسشىسى تۇركىستان قالاسىنىڭ دامۋى ەلباسىنىڭ ەرەكشە نازارىندا ەكەنىن جانە مۇندا قۇرىلىس جۇمىستارىمەن اينالىساتىن مەردىگەر كومپانيالارعا اكىمدىك تاراپىنان بارىنشا قولداۋ كورسەتىلەتىنىن ايتتى.
– مەملەكەت باسشىسىنىڭ تاپسىرماسىمەن وبلىس ورتالىعىن ەرەكشە ۇلگىدە قالىپتاستىرۋدى كوزدەپ وتىرمىز. سوندىقتان مۇندا سالىناتىن ءاربىر عيماراتتىڭ ساۋلەتى مەن سانىنە ەرەكشە ءمان بەرىلۋدە. بۇگىندە ءتيىستى جۇمىستار اتقارىلۋدا. اتاپ ايتساق، «ريكسوس» ءقوناقۇيى مەن اكىمشىلىك ورتالىقتىڭ كاپسۋلاسى سالىندى. وسى رەتتە، سىزدەردىڭ دە وسىندا زاماناۋي ۇلگىدەگى تۇرعىن ءۇي كەشەنىن سالاتىندارىڭىزعا ۇلكەن سەنىم بىلدىرەمىن. ال، قۇرىلىس جۇمىستارى جۇرگىزىلەتىن اۋماقتاعى بارلىق ينفراقۇرىلىم ماسەلەلەرى اكىمدىك تاراپىنان ءوز شەشىمىن تاباتىن بولادى. «High Vill Kazakhstan» سەرىكتەستىگى – ازىرگە قالامىزدا تۇرعىن ءۇي كەشەنىن سالاتىن ءبىرىنشى جانە جالعىز كومپانيا. ايتا كەتەرلىگى، قۇرىلىس جۇمىستارىن مەيلىنشە ەرتە باستاپ، 1 جىلدىڭ ىشىندە اياقتاۋ كەرەك، – دەدى جانسەيىت قانسەيىت ۇلى.
ءوز كەزەگىندە كانگ دجون دە تۇرعىن ءۇي كەشەنىن سالۋ ءۇشىن جەر ۋچاسكەسى انىقتالسا، قۇرىلىستى باستاپ كەتۋگە دايىن ەكەنىن جەتكىزدى.
– ءبىز 5-10 گەكتارعا اۋماققا جاڭا زاماناۋي كەشەن سالۋدى جوسپارلاپ وتىرمىز. بۇل جوبا وبلىس ورتالىعىنىڭ جاڭا كەلبەتىنە كورىك بەرەتىن بولادى. جۋىق ارادا بارلىق قۇجاتتامانى ازىرلەپ، قۇرىلىس جۇمىستارىنا كىرىسەمىز، – دەدى ول.
تۇركىستان وبلىسى اكىمىنىڭ باسپا ءسوز قىزمەتى
