ايتولقىن بولات قىزى 14 جاسىندا ءجۇرۋ قوزعالىسىندا كىنارات پايدا بولىپ، اجەسىنىڭ قامقورلىعىندا قالدى. دەگەنمەن جاقسىلىقتان ءۇمىت ۇزبەدى. شىعارماشىلىقپەن اينالىسىپ مەكتەپتى بىتىرگەن سوڭ سارسەن امانجولوۆ اتىنداعى شىعىس قازاقستان ۋنيۆەرسيتەتىنە «قازاق ءتىلى مەن ادەبيەتى» ماماندىعىنا وقۋعا ءتۇستى.
ايتولقىن ۋنيۆەرسيتەتتە دە ءوز شەبەرلىگىن كورسەتىپ، ولەڭ جازادى. جاقىندا عانا Amanzholov University دارىندى ستۋدەنتتەرىنىڭ شىعارمالارى جيناقتالعان «ۇشقىننان جالىن لاۋلايدى» اتتى كىتاپ جارىق كوردى. جاڭا تۋىندىنىڭ 115-بەتىندە ونىڭ «اباي اتاما ارناۋ»، «كارانتين» سياقتى بىرنەشە ولەڭدەرى ەنگەن.
– ۋنيۆەرسيتەت باسشىلىعى ايتولقىن مەن ونىڭ اجەسىن العاشقى كۇننەن باستاپ قولداپ كەلەدى. اباي اتىنداعى گرانت ءبولىندى. ودان كەيىن شقو اكىمى اتىنداعى گرانتقا يە بولدى. اجەسىمەن ستۋدەنت پاتەر جالداۋ ءۇشىن قارجىلىق قيىندىقتارعا تاپ بولعان شاقتا ءبىز ولارعا ۋنيۆەرسيتەت بازاسىندا جاتاقحانادان ەكى بولمە بولدىك، – دەدى جوو رەكتورى مۇحتار تولەگەن.
ايتولقىن مەن ونىڭ اجەسى ءۇشىن ناعىز توسىنسىي قايىرىمدىلىق كونسەرتى بولدى. «حارەكەت» قايىرىمدىلىق قورىنىڭ وكىلى ماديار سەرىكبايەۆ ساحناعا شىعىپ، جۇرتشىلىققا اقشا جيناپ، ايتولقىن بولات قىزىنىڭ پاتەر ساتىپ العانىن جاريا ەتتى.
ايتا كەتەيىك، «حارەكەت» قايىرىمدىلىق قورى مۇقتاج جانداردى باسپانامەن قامتاماسىز ەتۋدى ماقسات ەتكەن. بىرنەشە جىل ىشىندە ولار قازاقستاننىڭ از قامتىلعان ازاماتتارىنا 535 پاتەر سىيلادى.
سوڭىندا س.امانجولوۆ اتىنداعى شىعىس قازاقستان ۋنيۆەرسيتەتىنىڭ رەكتورى مۇحتار تولەگەن جينالعان قاۋىمعا قايىرىمدىلىق كونسەرتىنە قاتىسقانى ءۇشىن، ونىڭ ىشىندە جوو ستۋدەنتىنە، باسپانا سىيلاعان "حارەكەت" قايىرىمدىلىق قورىنا العىسىن ءبىلدىردى. رەكتور Amanzholov University پاتەردى بارلىق قاجەتتى تەحنيكامەن قامتاماسىز ەتەتىنىن اتاپ ءوتتى.
