وسىعان دەيىن قوعامدا شەشىمىن تاپپاعان ماسەلەلەر ءتۇرلى قوعامدىق كەڭەستەردە تالقىلانىپ كەلگەنىن بىلەمىز. ءبىراق ولاردىڭ كوپشىلىگىنىڭ جۇمىسى «ءتيىمدى بولدى» دەپ كەسىپ ايتا المايمىز. سوڭعى جىلداردىڭ بەدەرىنە نازار اۋدارىپ قاراساق، تەك ۇلتتىق سەنىم كەڭەسى عانا ءبىراز ماسەلەگە قوزعاۋ سالعانىن بايقايمىز.
ەندى سول كەڭەستىڭ جۇگىن ۇلتتىق قۇرىلتاي ارقالايىن دەپ تۇر. اڭگىمە باسىندا قايعىلى قاڭتاردان كەيىن قوعامنىڭ تۇتاستاي وزگەرگەنىن ايتتىق. مۇنداي جاعدايدا قوعامدىق پىكىردىڭ كوشباسشىلارى سانالاتىن ازاماتتاردىڭ بيلىك ورىندارىمەن ديالوگقا كەلىپ، كوكەيدە جۇرگەن ويلارىن اشىپ ايتىپ وتىرۋ قاجەت.
وسى باعىتتا قۇرىلعان ۇلتتىق قۇرىلتاي ءدال ءقازىر قازاق قوعامىن تۇتاستىرا تۇسكەنىن بايقاۋعا بولادى. سوڭعى 30 جىلدا حالىق پەن بيلىك اراسىنداعى ءۇنقاتىسۋ ءۇزىلىپ قالعانى جاسىرىن ەمەس. ەندى وسى ولقىلىقتىڭ ورنىن ۇلتتىق قۇرىلتاي تولتىرۋى ءتيىس.
ۇلتتىق قۇرىلتايدىڭ مۇشەلىگىنە جۇرتتىڭ كوكەيىندە جۇرگەن ماسەلەلەلەردى اشىپ ايتاتىن ازاماتتاردىڭ مۇشە بولۋى حالىقتىڭ اتالعان ۇيىمعا دەگەن سەنىمىن بەكەمدەي تۇسكەنى انىق.
ايتالىق، وسىعان دەيىن مۇنداي ۇيىمداردان شەت قالىپ جۇرگەن توقتار اۋباكىروۆ، اسقار جۇمادىلدايەۆ، ابزال قۇسپان سىندى قوعامدىق پىكىردىڭ بورومەترىنە اينالعان ازاماتتاردىڭ بۇل ىسكە بەلسەنە ارالاسىپ، ويلارىن ورتاعا سالۋى قازاق قوعامنىڭ ۇلكەن وزگەرىستەر كەزەڭىنە اياق باسقانىن كورسەتەدى.
ۇلتتىق قۇرىلتاي رەسمي ورگان ەمەس، كونسۋلتاتيۆتى ورگان. ۇلتتىق قۇرىلتايعا 117 ادام مۇشە بولعانىن بىلەمىز. ولاردىڭ ءبارى ءتۇرىلى سالانىڭ كوشباسشى تۇلعالارى دەسەك ارتىق ايتقاندىق بولماس. سوندىقتان اتقارۋشى بيلىكتىڭ ۇلتتىق قۇرىلتايدا ايتىلعان وي-پىكىرلەرگە قۇلاق اسىپ، بىرلەسىپ جۇمىس ىستەسە، كوپتەگەن ماسەلەلەردى وڭ باعىتتا شەشۋگە بولادى. سول سەبەپتى حالىقتىڭ ۇلتتىق قۇرىلتايعا دەگەن سەنىمى جوعارى.
