ول ەلىمىزدەگى باي مەن كەدەيدىڭ اراسى جەر مەن كوكتەي دەيدى. ونىڭ پىكىرىنشە بۇگىنگى ايلىق تولەۋ جۇيەسىن تولىقتاي قايتا قاراۋ كەرەك.
"حالىقتىڭ شىنايى تابىسى رەسمي مالىمەتپەن سايكەسە بەرمەيدى، وعان قاراعاندا الدەقايدا تومەن. حالىقتىڭ كوپشىلىگى تاقىر كەدەي، جوقشىلىقتان كوز اشپاي ءومىر سۇرۋدە. ءتىپتى تۇراقتى جۇمىسى بولسا دا تاپقان تابىسى ىشىپ-جەمىنە جەتپەيدى"، – دەيدى ۇكىمەتباسى اسقار مامينگە ءۇن قاتقان ايقىن قوڭىروۆ.
بۇدان بۇرىن ءمامين ۇكىمەتتىڭ ەلدەگى ەڭ تومەنگى جالاقىنى ورتاشا ايلىقتىڭ دەڭگەيىنە جەتكىزۋدى كوزدەپ وتىرعانىن ءارى ەڭ تومەنگى كۇنكورىس دەڭگەيى ارتاتىن ايتقان.
"بۇل ازدىق ەتەدى. ۇكىمەت قابىلداعان ءىس-شارا حالىقتىڭ جاعدايىن جاقسارتۋعا جەتكىلىكسىز. ءقازىر حالىققا ناقتى ناتيجە كەرەك، تۇرمىسىنىڭ تۇزەلگەنىن ناقتى سەزىنۋى ءتيىس. رەفورما جاسادى ەكەن، ول ءسوز جۇزىندە ەمەس، ءىس جۇزىندە ورىندالۋى قاجەت"، – دەيدى دەپۋتات قوڭىروۆ.
حالىق قالاۋلىسى وسى ورايدا جالاقى تولەۋ جۇيەسىن تولىقتاي قايتا قارايتىن كەز كەلدى ەسەپتەيدى.
"ۇكىمەت ايتىپ جۇرگەن ورتاشا ايلىق جالاقى مولشەرى ءجاي عانا ماتەماتيكالىق ەسەپ جانە ەلدەگى شىنايى جاعدايمەن سايكەسە بەرمەيدى. باي مەن كەدەيدىڭ اراسى كۇن ساناپ الىستاپ بارادى. تابىسى تومەن، ءتۇتىنى ءتۇزۋ ۇشپايتىن تۇرعىندار مەن سىيلى لاۋازىمدا، جايلى كرەسلودا وتىرعان، جوعارى جالاقى الاتىنداردىڭ اراسىنداعى ايىرماشىلىق جەر مەن كوكتەي. قالا مەن اۋىل تۇرعىندارىنىڭ تابىسى دا ەكىتۇرلى.
جالاقىنى جۇمىسشىنىڭ بىلىم-بىلىگىنە قاراي قوياتىن جۇيە ءبىزدىڭ ەلدە جوق، قولىنان ءىس كەلەتىن مامان تامىر-تانىسى بولماسا باعالانبايدى. كارەرالىق ءوسۋ مۇمكىندىگى مۇلدە باسقا فاكتورلارمەن بايلانىستى بولىپ تۇر"، – دەيدى اشىنعان دەپۋتات.
ونىڭ ويىنشا جالاقى دەڭگەيىن ەسەپتەيتىن جاڭا جۇيە كەرەك. تۇرمىس دەڭگەيىن باعالايتىن قازىرگى جۇيە الەۋمەتتىك-ەكونوميكالىق ساياساتتى ادىلەتتى جۇرگىزۋگە كەدەرگى كەلتىرەدى.
