باس پروكۋراتۋرا «QI-Trade Kazakhstan» قارجى پيراميداسىنىڭ جەتەكشىسىن ەكستراديسيالادى، دەپ حابارلايدى Dalanews.kz.

قازاقستان رەسپۋبليكاسىنىڭ باس پروكۋراتۋراسى قىرعىز رەسپۋبليكاسىنان ترانسۇلتتىق ۇيىمداسقان قىلمىستىق توپتىڭ قۇرامىندا قارجى پيراميداسىن قۇرعانى جانە باسقارعانى ءۇشىن قىلمىستىق جاۋاپتىلىققا تارتۋ ماقساتىندا قازاقستان ازاماتىن ەكستراديسيالادى.

اتالعان توپتىڭ مۇشەلەرى 2017-2020 جىلدار ارالىعىندا قازاقستان اۋماعىندا «QI-Trade» قارجى پيراميداسىن ۇيىمداستىرىپ، 4،7 مىڭنان استام سالىمشىنىڭ جالپى سوماسى 15 ميلليارد تەڭگە قاراجاتىن زاڭسىز يەمدەنگەن.

قىلمىستىق توپتىڭ كەيبىر مۇشەلەرى سوتپەن ءارتۇرلى جازاعا تارتىلعان، ال كۇدىكتى قىلمىس جاساعاننان كەيىن بوي تاسالاپ، حالىقارالىق ىزدەۋگە جاريالاندى.

ىزدەۋدە بولا تۇرا، ول قىرعىزستاندا كىسى ءولتىرۋ قىلمىسىن جاساپ، قىرعىز سوتىمەن سوتتالدى.

قازاقستان رەسپۋبليكاسى باس پروكۋراتۋراسىنىڭ سۇراۋى بويىنشا ول ۋاقىتشا ۇستاپ بەرىلدى، ال قارجى پيراميداسىن قۇرعانى جانە باسقارعانى ءۇشىن قىلمىستىق جاۋاپتىلىققا تارتىلعاننان كەيىن قىرعىز رەسپۋبليكاسىنا قايتارىلاتىن بولادى.

وسىلايشا، كورشى مەملەكەت اۋماعىندا جازاسىن وتەگەننەن كەيىن كۇدىكتىنى قازاقستان اۋماعىندا جاساعان قىلمىسى ءۇشىن جازا كۇتەتىن بولادى.

ايىپتالعان قىلمىستاردى جاساعانى ءۇشىن مۇلكى تاركىلەنىپ، 12 جىلعا دەيىنگى مەرزىمگە باس بوستاندىعىنان ايىرۋ تۇرىندەگى جازا قاراستىرىلعان. 

ەسكە سالا كەتەيىك، بۇعان دەيىن باس پروكۋراتۋرا وسى قىلمىستىق توپتىڭ ەكى مۇشەسىن رەسەي مەن پولشادان ەكستراديسيالاپ، ولار ءقازىر ءارتۇرلى جىلدارعا باس بوستاندىعىنان ايىرۋعا سوتتالعان.