دەپۋتاتتىڭ ايتۋىنشا، اەس قورشاعان ورتاعا زيان تيگىزبەيدى
پارلامەنت ءماجىلىسىنىڭ دەپۋتاتى باۋىرجان سماعۇلوۆ اەس سالۋ ماسەلەسى جونىندەگى رەسپۋبليكالىق رەفەرەندۋمنىڭ الدىن الا قورىتىندىسى تۋرالى پىكىر ءبىلدىردى، – دەپ حابارلايدى Azattyq Rýhy.
ول ورتالىق رەفەرەندۋم كوميسسياسىنىڭ الدىن الا قورىتىندىسى بويىنشا قازاقستاندىقتاردىڭ 71،12%-ى اەس سالۋ باستاماسىن قولداعانىن ەسكە سالدى.
– حالىقتىڭ اەس سالۋدى قولداپ، داۋىس بەرۋىنىڭ ناتيجەسىنە قاراپ، ەنەرگيا تاپشىلىعى ارتىپ كەلە جاتقان ۋاقىتتا ازاماتتاردىڭ ستراتەگيالىق باستامانى بەلسەندى قولداعانىن ەرەكشە اتاپ وتكىم كەلەدى.
اەس سالۋ ماسەلەسى بۇرىننان كوتەرىلىپ كەلەدى، سوڭعى جىلدارى بۇل تاقىرىپ قىزۋ تالقىعا ءتۇستى. اتوم ەلەكتر ستانساسىن قولداعاندار دا، وعان قارسى شىققاندار دا تابىلدى. اەس-تى قولداعانداردىڭ ەڭ باستى ارگۋمەنتى – ەلدىڭ ەنەرگەتيكالىق قاۋىپسىزدىگىن قامتاماسىز ەتۋ قاجەتتىلىگى.
ەلىمىزدە ەنەرگيا قۋاتىنا قاجەتتىلىك ارتىپ كەلەدى، ويتكەنى جاڭا كاسىپورىندار سالىنىپ، حالىق سانى كوبەيىپ جاتىر. وسىعان بايلانىستى ەلەكتر ەنەرگياسىن تۇتىنۋ جىلىنا كەم دەگەندە 3 پايىزعا وسەدى. الايدا قولدانىستاعى جەو جانە گرەس-تەر باياعىدا 70 پايىزعا توزعان، – دەيدى دەپۋتات.
ماجىلىسمەننىڭ ايتۋىنشا، قازاقستان، وكىنىشكە قاراي، ەلەكتر قۋاتىن يمپورتتاۋعا ءماجبۇر. بىلتىردىڭ وزىندە رەسەيدەن 2 ملرد كيلوۆاتت-ساعات يمپورتتاعان.
– سىرتقى نارىقتا ەلەكتر ەنەرگياسىن ساتىپ الۋ قىمباتتاي تۇسەتىنى انىق. ال ەلەكتر قۋاتىنسىز ەكونوميكا دامىمايدى، قازاقستاندىقتاردىڭ تىنىس-تىرشىلىگىن قامتاماسىز ەتۋ مۇمكىندىگى بولمايدى.
ءدال وسى سەبەپتەن رەفەرەندۋمعا دايىندىقتىڭ العاشقى كەزەڭدەرىندە قازاقستاندىقتار اەس سالۋ يدەياسىن بەلسەندى قولداي باستادى، – دەيدى سماعۇلوۆ.
سونداي-اق، ونىڭ ايتۋىنشا، كومىر ستانسالارىنا قاراعاندا اەس – تازا ەنەرگيا كوزى.
– وسىنىڭ ءبارىن ەسكەرىپ، اەس ەكونوميكانىڭ دامۋى ءۇشىن وتە ءتيىمدى جانە ءوڭىردىڭ ەكولوگياسىنا زيانى جوق، – دەپ سانايدى دەپۋتات.
ەستەرىڭىزگە سالايىق، 6 قازاندا ەلىمىزدە اەس قۇرىلىسى جونىندە رەسپۋبليكالىق رەفەرەندۋم ءوتتى. ورتالىق رەفەرەندۋم كوميسسياسىنىڭ الدىن الا قورىتىندىسى بويىنشا داۋىس بەرگەن قازاقستاندىقتاردىڭ 71،12 پايىزى اەس-تى قولداعان.
