2022-2024 جىلدارى الماتى تۇرعىندارىنىڭ ءوتىنىشى بويىنشا جالپى سوماسى 39،1 ملرد تەڭگەگە 938 جوبا ىسكە اسىرىلدى. بۇل تۋرالى ورتالىق كوممۋنيكاسيالار قىزمەتىندە وتكەن بريفينگتە قالا اكىمى ەربولات دوسايەۆ مالىمدەدى، دەپ حابارلايدى Dalanews.kz. 

ونىڭ ايتۋىنشا، بۇل جوبالاردىڭ بارلىعى قالا تۇرعىندارى بەلسەندى قاتىسىپ، قالانى جاقسارتۋ ءۇشىن ءوز يدەيالارىن ۇسىناتىن «حالىق قاتىساتىن بيۋدجەت» باعدارلاماسى بويىنشا جۇزەگە اسىرىلعان.

«ءبىز حقب اياسىندا جوبالاردى ىسكە اسىرۋعا جىل سايىنعى ءليميتتى 17 ملرد تەڭگە دەڭگەيىندە بەلگىلەدىك. سونداي - اق، بۇرىن ىسكە اسىرىلعان حقب جوبالارىن ۇستاۋ ءۇشىن ءبىرىنشى رەت ءار اۋدانعا 200 ملن تەڭگەگە دەيىن قاراجات بولىنۋدە»، - دەدى ەربولات دوسايەۆ.

باعدارلاما اياسىندا قالانىڭ قاراۋسىز قالعان اۋماقتارىنان جاڭا جاياۋ جۇرگىنشىلەر جانە جاعالاۋ ايماقتارى، سكۆەرلەر، بالالار الاڭدارى مەن اباتتاندىرىلعان اۋلالار جاسالۋدا.

ەستەرىڭىزگە سالا كەتەيىك، 2022 جىلدان باستاپ «حالىق قاتىساتىن بيۋدجەت» باعدارلاماسىن قارجىلاندىرۋ 2،6 ەسەگە ۇلعايدى، بەرىلگەن جوبالار سانى 5،7 ەسەگە ءوستى، بۇل ازاماتتاردىڭ بەلسەندى قاتىسۋىن جانە باعدارلامانى قالانى دامىتۋ قۇرالى رەتىندە تيىمدىلىگىن كورسەتەدى.

2024 جىلى «حالىق قاتىساتىن بيۋدجەت» اياسىندا اۋدان اكىمدىكتەرى 364 جوبانى ىسكە اسىردى. كەلەسى جىلى الماتىدا 17 ملرد تەڭگەگە اباتتاندىرۋ بويىنشا 300-دەن استام جوبانى ىسكە اسىرۋ جوسپارلانعان. جوبالاردىڭ باسىم بولىگى الاتاۋ (50) جانە المالى (45) اۋداندارىندا ىسكە اسىرىلاتىن بولادى. ىسكە اسىرۋعا رۇقسات ەتىلگەن جوبالار تىزىمىمەن  budget.open-almaty.kz. سايتىندا تانىسۋعا بولادى.