قارۋلى قاقتىعىستار، تابيعي اپاتتار جانە اقپاراتتىق سوعىس 2025 جىلعى نەگىزگى جاھاندىق تاۋەكەلدەرگە اينالادى. دۇنيەجۇزىلىك ەكونوميكالىق فورۋمنىڭ (World Economic Forum، WEF) جىل سايىن جۇرگىزەتىن ساۋالناما اياسىندا وسىنداي قورىتىندى شىعارىلدى، دەپ جازادى Dalanews.kz.
ينتەرفاكس-قازاقستان مالىمەتىنشە، WEF ساۋالناماسىنا قاتىسقان رەسپوندەنتتەردىڭ تورتتەن ءبىر بولىگى (23%) قارۋلى قاقتىعىستار اعىمداعى جىلعى كۇتىلەتىن نەگىزگى قاۋىپ-قاتەرگە تۇرتكى بولادى دەپ سانايدى.
جالعان اقپارات نەمەسە فاكتىلەردى بۇرمالاۋشىلىق ەكىنشى جىل قاتارىنان نەگىزگى جاھاندىق تاۋەكەلدەر تىزىمىنە ەنىپ وتىر.
سونداي-اق جاھاندىق كليماتتىڭ وزگەرۋى، ءارالۋان بيولوگيالىق تۇرلەردىڭ قىسقارۋى جانە ەكوجۇيەنىڭ بۇزىلۋى سىندى ەكولوگيالىق ماسەلەلەر الداعى 10 جىلدىڭ كوكجيەگىندە كۇتىلەتىن نەگىزگى ءقاۋىپ رەتىندە اتالادى.
"گەوساياسي شيەلەنىستىڭ ارتۋى، جاھاندىق سەنىمنىڭ جويىلۋى جانە كليماتتىق داعدارىس جاھاندىق جۇيەگە بۇرىن-سوڭدى بولماعان قىسىمدى تۋدىرۋدا. ءوزارا كەلىسپەۋشىلىكتەر مەن تاۋەكەلدەردىڭ تەرەڭدەي ءتۇسۋ جاعدايىندا الەمدىك كوشباسشىلار الدىنا تاڭداۋ تۇر: ىنتىماقتاستىق پەن تۇراقتىلىقتى ىلگەرىلەتۋ نەمەسە ناشارلاي تۇسكەن تۇراقسىزدىقپەن بەتپە-بەت كەلۋ. بۇل ارادا تىگىلگەن ءباستىڭ قۇنى بۇرىنعىدان دا جوعارى"، - دەدى WEF باسقارۋشى ديرەكتورى ميرەك دۋسەك.
وتكەن جىلدىڭ قىركۇيەك جانە قازان ايلارىندا جۇرگىزىلگەن WEF ساۋالناماسىنا 900-دەن استام تاۋەكەلدەردى باسقارۋ ساراپشىلارى، ساياساتكەرلەر مەن توپ-مەنەدجەرلەر قاتىسقان.
دۇنيەجۇزىلىك ەكونوميكالىق فورۋم داۆوستا الداعى 20-24 قاڭتار ارالىعىندا وتەدى.
