بۇل تۋرالى ونلاين رەجيمدە وتكەن بريفينگتە ق ر پرەمەر-مينيسترىنىڭ ورىنباسارى ەرالى توعجانوۆ مالىمدەدى، دەپ حابارلايدى Dalanews.kz.
توعجانوۆتىڭ ايتۋىنشا، توتەنشە جاعداي رەجيمى جويىلعانىنا قاراماستان، جولداعى بلوك-پوستتار ارى قاراي ءوز جۇمىسىن جالعاستىرادى.
الايدا، قالا ماڭىندا تۇراتىندار قالاعا، سول سەكىلدى قالا ىشىندەگىلەر وبلىسقا جۇمىسقا بارا الادى، تەك اكىمدىكتەردىڭ بەكىتىلگەن تىزىمىنە سايكەس ول رۇقساتتى الۋعا بولادى.
كەشەدەن بەرى كوپتەگەن ادامدار وسى ماسەلەنى كوتەرىپ جاتىر، اسىرەسە وڭتۇستىك ايماقتىڭ تۇرعىندارى. مىسالى، الماتى قالاسىندا تۇراتىن ادامدار الماتى وبلىسىنا جۇمىسقا شىعا الماي وتىر، ەندى ولارعا ەشقانداي شەكتەۋلەر جوق. ءبىراق بۇل ءۇشىن وسىنداي جۇمىسشىلارى بار كومپانيالار بارلىق تىزىمدەرىن وسى ايماقتاردىڭ شتابتارىمەن كەلىسىپ، وتكىزۋى كەرەك. وسى باعىتتا ءقازىر جۇمىس جالعاسۋدا، - دەدى توعجانوۆ.
تۋرا وسىنداي سۇراقتار نۇر-سۇلتان مەن ەلوردا ماڭىنداعى تۇرعىنداردى دا مازالايدى.
ءبىز بۇگىنگە دەيىنگى كەدەرگىلەردى ساقتايمىز. بۇگىن نۇر-سۇلتان قالاسى مەن قالا ماڭىنداعى جەرلەرگە قاتىستى ءبىرقاتار سۇراقتار تۋىندادى. ءدال وسىنداي ماسەلە الماتى قالاسى مەن الماتى وبلىسىنىڭ اراسىندا تۋىندادى، سوندىقتان بۇل ماسەلە كۇنتارتىبىندە تۇر. جول توسقاۋىلدارى بۇرىنعى رەجيمدە جۇمىس ىستەيتىنىن ەرەكشە اتاپ وتكىم كەلەدى. ءبىز ولاردى المايمىز، - دەپ ءسوزىن تۇيىندەدى توعجانوۆ.
ايتا كەتەيىك، وڭىرلەردە ءبىرقاتار سالالاردىڭ جۇمىسقا كىرىسۋىنە رۇقسات ەتىلگەن.
