ويتكەنى، ءقازىر قازاق ءتىلى دامۋدان قالىپ بارادى. مەنىڭ بالام دا قىزمەتىنە قاجەت بولعاندىقتان گەرمانياعا بارىپ، ءبىر جىلدىڭ ىشىندە نەمىس ءتىلىن ۇيرەنىپ الدى. نانىن جەپ جۇرمەگەن سوڭ، ءوز باسىم و باستا ماماندانعان اراب ءتىلىن بۇگىندە كەرەك ەتپەيمىن دە. ويتكەنى، نەسىبە وزگە سالادان بۇيىردى. سوندىقتان ءبىزدىڭ بارلىعىمىزعا دا ءبىرىنشى كەزەكتە قازاق ءتىلى قاجەت!
قازاقتىڭ ءتىلى دامىعان كەزدە ءبىزدىڭ ءازىلىمىز دە داميدى، استارلاپ ايتقان ويىمىزدى كورەرمەن تۇسىنە الاتىن دارەجەگە جەتەدى. جاسىراتىنى جوق، ءبىز پەتروپاۆلعا، قوستانايعا، پاۆلودارعا گاسترولمەن بارمايتىن بولدىق. ءبىر جولى بارعانىمىزدا قازاق تىلىندە ءبىر اۋىز ءسوز بىلمەيتىن ماڭگۇرتتەرگە قور بولعانبىز. ويتكەنى، ول جەردىڭ قازاعىنا «سەن قازاقسىڭ» دەپ ايتىپ دالەلدەي المايسىز. قوستاناي مەن پاۆلوداردا ساحنادا تۇرعانىمدا وسى اڭگىمەنى ايتىپ ەدىم، جەرگىلىكتى قالامگەرلەرى قاپا بولدى. احمەت بايتۇرسىنوۆ، سۇلتانماحمۇت تورايعىروۆ شىققان ولكەنىڭ قاۋىمى انا ءتىلىن بىلمەيدى، قازاقشا ازىلدەسەڭ تۇسىنبەيدى.
قوستانايدا پاتەر جالداپ تۇرعانىمدا تۇندە جارىق ءوشىپ قالىپ، تەلەديداردان فۋتبول ماچىن كورە الماي جۇيكەم جۇقاردى. تاڭەرتەڭ پاتەرشىنىڭ قىزى مەن بالاسى كەلىپ ەدى، سولارعا جارىقتىڭ وشكەنىن قازاقشا تۇسىندىرە المادىم. ونىسىمەن تۇرماي بەتىمە قاراپ «ۆوت، كازاحي!» دەيدى كەمسىتىپ. «ءاي، سەن سوندا قازاق ەمەسسىڭ بە؟!» دەپ ودان سايىن نامىسىم قوزدى. اناۋ-مىناۋعا كوتەرىلە قويمايتىن ءجۇسىپتىڭ ءوزى قالشىلداپ كەتتى. سودان اناسىن شاقىرتتىق. سويتسەك، ول دا شالا قازاق بىرەۋ ەكەن. ودان سايىن جۇيكەمىز جۇقارىپ «ءسىزدىڭ اناڭىز بار ما؟» دەۋگە ءماجبۇر بولدىق. بىرىنەن ءبىرى وتكەن ماڭگۇرتتەر قازاقشا ءبىر اۋىز ءسوز بىلمەيدى. انا ءتىلىن بىلمەگەنىنە نامىسى قوزىپ وتىرعان ەشكىم جوق، تەك اقشاڭدى الىپ كەتسە بولدى. سوندىقتان اتىراۋ، اقتاۋ، اقتوبە، قىزىلوردا، جامبىل، تالدىقورعان جاققا اپتالاپ، ايلاپ گاسترولگە شىعامىز. ول جاقتىڭ قازاقتارى ءبىزدى توبەسىنە كوتەرىپ، قۇرمەتتەيدى.
ۋاليبەك ءابدىرايموۆ،
«شانشار» ءازىل-سىقاق تەاترىنىڭ ديرەكتورى
دەرەككوز: baq.kz
