اۋقىمدى شاراعا استانا، الماتى، اقتوبە، قىزىلوردا، پاۆلودار، وسكەمەن جانە سەمەي قالالارىنان كەلگەن ەلىمىزدىڭ 23 جەتەكشى جوعارى وقۋ ورنى قاتىسىپ وتىر، – دەپ حابارلايدى Dalanews.kz اباي وبلىسى اكىمىنىڭ باسپا ءسوز قىزمەتىنە سىلتەمە جاساپ.
كورمەنىڭ باستى ماقساتى – مەكتەپ ءبىتىرۋشى تۇلەكتەرگە جوعارى ءبىلىم بەرۋ مۇمكىندىكتەرى تۋرالى كەڭ اقپارات ۇسىنۋ، كاسىبي باعدار بەرۋ جانە جەتەكشى وقۋ ورىندارىمەن تىكەلەي بايلانىس ورناتۋ.
اباي وبلىسى اكىمدىگى مەن ءبىلىم باسقارماسىنىڭ قولداۋىمەن ءوتىپ جاتقان كورمە ەكى كۇنگە سوزىلادى. كورمەنىڭ ۇيىمداستىرۋشىسى – Vipusknik.kz رەسپۋبليكالىق ينتەرنەت-پورتالى.
كورمەنىڭ اشىلۋىندا اباي وبلىسى اكىمىنىڭ ورىنباسارى جاسۇلان سارسەبايەۆ وقۋ ورنى وكىلدەرىنە العىس ءبىلدىرىپ، ءبىلىم كورمەسىنىڭ ماڭىزدىلىعىنا توقتالدى. قاتىسۋشى جەتەكشى جوعارى وقۋ ورنىنىڭ وكىلدەرىنە العىس حاتتار تابىستادى.
- بۇل كورمە – تۇلەكتەرگە ءوز بولاشاعىن دۇرىس جوسپارلاۋعا، ەلىمىزدىڭ ۇزدىك جوعارى وقۋ ورىندارىنىڭ مۇمكىندىكتەرىمەن تانىسۋعا بەرىلگەن بىرەگەي مۇمكىندىك. مۇنداي باستامالار ايماقتاعى ءبىلىم ساپاسىن ارتتىرۋعا، تالاپكەرلەردىڭ كاسىبي باعدارىن ايقىنداۋعا زور ۇلەس قوسادى، - دەدى جاسۇلان سارسەبايەۆ.
كورمە بارىسىندا تالاپكەرلەر ۋنيۆەرسيتەت وكىلدەرىمەن كەزدەسىپ، وقۋ باعدارلامالارى، ماماندىقتار جانە قابىلداۋ شارتتارى تۋرالى اقپارات الادى. سونداي-اق سەمەي قالاسىنىڭ 59 مەكتەبىنەن 9 مىڭعا جۋىق وقۋشىنىڭ قاتىسۋى جوسپارلانعان. بۇدان بولەك، وبلىستىڭ 100 اۋدان مەكتەبىنىڭ وقۋشىلارىنا ارنالعان Zoom كونفەرەنسياسى ۇيىمداستىرىلىپ، 10 500-دەن استام تۇلەكتىڭ قاتىسۋىنا مۇمكىندىك بەرىلەدى.
