"ەلىمىزدىڭ ءۇش وڭىرىندە ۆاكسينالاۋ ءتولقۇجاتتارىن ساتقان مەديسينا قىزمەتكەرلەرى ۇستالدى. ولار ەكپە سالدىرماعان ادامدارعا قۇجات بەرگەن. ال ۆاكسينانى توگىپ تاستاعان.
كورىپ وتىرعانىڭىزداي، حالىقتىڭ دەنساۋلىعى پايدا تابۋ وبەكتىسىنە اينالدى، ال بيۋدجەتتەن بولىنگەن اقشا تەككە كەتىپ جاتىر. وسىنداي جالعان ءتولقۇجات العان ادامدار ءبىزدىڭ قاسىمىزدا جۇرەدى، ءبىر كولىككە مىنەدى، ءبىر ۇشاقپەن ۇشادى، - دەدى احمەتجانوۆ ءبىرىنشى جارتىجىلدىقتاعى جۇمىستى قورىتىندىلاعان اگەنتتىكتىڭ القالى جيىنىندا.
ول قولعا الىنعان بۇل باعىتتاعى جۇمىستار جالعاساتىنىن اتاپ ءوتتى.
رەسمي مالىمەتكە سايكەس، زاڭ بۇزعان دارىگەرلەر نۇر-سۇلتان قالاسىندا، سونداي-اق، اقمولا جانە الماتى وبلىستارىندا ۇستالدى.
بۇدان بولەك، پاندەميامەن كۇرەس شارالارىنا بولىنگەن قارجىنى جۇمساۋعا قاتىستى 104 سىبايلاس جەمقورلىق فاكتىسى انىقتالدى. اگەنتتىك باسشىسىنىڭ سوزىنە قاراعاندا، مەديسينالىق قۇرال-جابدىقتى ساتىپ الۋ كەزىندە بيۋدجەت قارجىسىن جىمقىرۋ ارەكەتتەرى ءالى كۇنگە دەيىن تىيىلماي تۇر.
"شىمكەنت قالاسىندا دەنساۋلىق ساقتاۋ باسقارماسى باسشىسىنىڭ ورىنباسارى مىرزاقۇلوۆ مەديسينالىق تەحنيكانى تىم جوعارى باعامەن ساتىپ الۋ فاكتىسى بويىنشا سوتتالدى. بيۋدجەتكە 1،5 ميلليارد تەڭگەنىڭ شىعىنى كەلدى. ءدال سونداي فاكتىلەر ماڭعىستاۋ وبلىسىندا انىقتالعان بولاتىن. ول جاقتا دەنساۋلىق ساقتاۋ باسقارماسىنىڭ باسشىسى جامانبايەۆ سوتتالدى"، – دەپ اتاپ كورسەتتى احمەتجانوۆ.
