مەملەكەتتىك قىزمەت ىستەرى اگەنتتىگى مەملەكەتتىك ورگاندار اراسىندا ۇزدىك مەملەكەتتىك قىزمەت كورسەتۋشىنى انىقتاۋعا باعىتتالعان «ۇزدىك ساپالى قىزمەت كورسەتۋشى» كونكۋرسىنىڭ قورىتىندىسىن شىعاردى.

بايقاۋعا ەلىمىزدىڭ تۇكپىر-تۇكپىرىنەن ءۇش جۇزدەن استام قىزمەت كورسەتۋشى قاتىستى. قاتىسۋعا نيەت بىلدەرگەندەر قاتارىندا قىزىلوردا، جامبىل، ماڭعىستاۋ جانە سولتۇستىك قازاقستان وبلىستارىنىڭ قىزمەت كورسەتۋشىلەرى جوعارى بەلسەندىلىك تانىتتى.

رەسپۋبليكالىق كوميسسيانىڭ شەشىمىمەن اباي وبلىسى كوكپەكتى اۋدانىنىڭ ارناۋلى الەۋمەتتىك قىزمەتتەر كورسەتۋ ورتالىعى «ۇزدىك ساپالى قىزمەت كورسەتۋشى» اتاعىنا يە بولدى.

سونىمەن قاتار، وسى نوميناسيادا ءبىرىنشى ورىندى مۇنايلى اۋدانى بويىنشا ءبىلىم ءبولىمىنىڭ شوعى مۇنالى اتىنداعى №5 جالپى ءبىلىم بەرەتىن مەكتەبى، ەكىنشى ورىندى شىمكەنت قالاسىنىڭ ادىلەت دەپارتامەنتى، ءۇشىنشى ورىندى كوستاناي وبلىسى بويىنشا مەملەكەتتىك كىرىستەر دەپارتامەنتى كوستاناي قالاسى بويىنشا مەملەكەتتىك كىرىس باسقارماسى يەلەندى.

رەسپۋبليكالىق كوميسسيانىڭ قۇرامىنا اگەنتتىك جانە مەملەكەتتىك باسقارۋ اكادەمياسى، قوعامدىق ۇيىمدار جانە ب ا ق وكىلدەرى، مەملەكەتتىك باسقارۋ سالاسىنداعى ساراپشىلار كىردى.

كونكۋرسقا قاتىسۋ ءۇشىن قاتىسۋشىلار رەسپۋبليكالىق كوميسسياعا كورسەتىلەتىن مەملەكەتتىك قىزمەتتەردىڭ بەينەپرەزەنتاسيالارىن ۇسىندى، سونداي-اق مەملەكەتتىك قىزمەتتەردىڭ ساپاسى مەن قولجەتىمدىلىگىن ارتتىرۋ، ولاردى كورسەتۋدەگى بيۋروكراتيالىق كەدەرگىلەردى جويۋ بويىنشا «ادامدار ەڭ الدىمەن» تاقىرىبىنداعى جوبالارىن قورعادى

«ۇزدىك ساپالى قىزمەت كورسەتۋشى» كونكۋرسى اگەنتتىكپەن بيىل ەكىنشى جىل قاتارىنان وتكىزىلىپ وتىر. كونكۋرستىڭ نەگىزگى ماقساتى – قىزمەت كورسەتۋشىلەردىڭ مارتەبەسىن ارتتىرۋ، ولاردى ىنتالاندىرۋ جانە جۇمىستاعى كليەنتكە باعدارلانۋدىڭ نەگىزدەرىن نىعايتۋ.

كونكۋرس سونداي-اق كليەنتكە باعدارلانعان جانە اشىق مەملەكەتتىك اپپارات قاعيداتتارىن قالىپتاستىرۋعا، كورسەتىلەتىن مەملەكەتتىك قىزمەتتەردىڭ ساپاسىن ارتتىرۋعا ۇلەس قوسقان ۇزدىك قىزمەت كورسەتۋشىنى انىقتاۋعا جانە كوتەرمەلەۋگە باعىتتالعان.

كونكۋرس جەڭىمپازدارى «23 ماۋسىم – مەملەكەتتىك قىزمەتشىلەر كۇنىنە» ورايلاستىرىلعان سالتاناتتى ءىس-شارادا ماراپاتتالادى.