ادۆوكات نۇرلان بەيسەكەيەۆ ەكس-مينيستردىڭ بۇلتارتپاۋ شاراسىن وزگەرتىپ، سوتتى نۇر-سۇلتانعا اۋىستىرۋدى وتىنگەن. شكارۋپانىڭ قاماۋدا وتىرۋ مەرزىمى 16 جەلتوقساندا اياقتالعان.
ءبىر جىلدان بەرى قاراعاندىداعى تەرگەۋ اباقتىسىندا وتىرعان اناتوليي شكارۋپا جەلتوقسان ايىنىڭ باسىندا ەل پرەزيدەنتى قاسىم-جومارت توقايەۆقا حات جازىپ، «ءوزىنىڭ ويدان شىعارىلعان ايىپتاۋلار نەگىزىندە قاماۋدا وتىرعانىن» ايتقان.
بۇل ءىس بويىنشا شكارۋپادان بولەك «تۇرعىن ۇي-كوممۋنالدىق دامۋ قورى» كومپانياسىنىڭ باسقارما باسشىسى بولعان قايسار بايدالى مەن ENERCO كومپانياسىنىڭ ديرەكتورى ەرلان نابييەۆكە دە ايىپتار تاعىلعان. ۇشەۋى دە مەملەكەت اقشاسىن تالان-تاراجعا سالدى دەپ ايىپتالىپ جاتىر.
تەرگەۋ بولجامىنا سايكەس، شكارۋپا ساران قالاسىنىڭ اكىمى بولىپ تۇرعان كەزدە كوپقاباتتى ۇيلەردى جىلىتۋ ءۇشىن جابدىقتار الۋعا بولىنگەن 215 ميلليون تەڭگەدەن استام قاراجات ENERCO كومپانياسىنا زاڭسىز اۋدارىلعان.
ادۆوكات نۇرلان بەيسەكەيەۆتىڭ ايتۋىنشا، ءقازىر ۇيلەردى جىلىتۋعا كەرەكتى جابدىقتار ساتىپ الىنعان. ءبىراق تاپسىرىستى الۋشى كومپانيا ورتالىق قازاندىقتى سوڭىنا دەيىن سالماي قويعان.
