ۇكىمەتتىڭ بۇگىنگى وتىرىسىندا ق ر اقپارات جانە كوممۋنيكاسيالار ءمينيسترى داۋرەن ابايەۆ جاقىن ارادا قازاقستاندىقتاردىڭ ۋاقىتشا تىركەۋدى ونلاين رەجيمدە ىسكە اسىرا الاتىنىن جەتكىزدى، دەپ xابارلايدى قازاقپارات ءتىلشىسى.

قازىرگى كەزدە ونلاين رەجيمدە تەك تۇراقتى تىركەۋ قىزمەتى عانا جۇمىس ىستەيدى. ەندى، ءبىر ايدىڭ ىشىندە وعان ۋاقىتشا تىركەلۋ قىزمەتى دە قوسىلادى.

– قازىرگى كەزدە ىشكى لوگيستيكا ماسەلەلەرى رەتتەلىپ جاتىر. نەگىزگى ماقسات – xالىققا قىزمەت كورسەتۋ ورتالىقتارىنداعى كەزەكتەردى ازايتۋ. ول ءۇشىن دەرەكتەر بازالارىن ءوزارا كىرىكتىرۋ كەرەك. سودان كەيىن ۋاقىتشا تىركەۋدى ونلاين رەجيمدە ىسكە قوسۋعا بولادى. وعان ۇلتتىق اقپاراتتىق تەxنولوگيالار ورتالىعى مەن ىشكى ىستەر مينيسترلىگى جاۋاپتى. ءبىر ايدان از ۋاقىتتا اتالعان قىزمەت ەنگىزىلەدى، – دەدى د.ابايەۆ.

ال «ازاماتتارعا ارنالعان ۇكىمەتتىڭ» باسقارما ءتوراعاسى دانيار ەرەنچينوۆتىڭ ايتۋىنشا، بۇگىندە xالىققا قىزمەت كورسەتۋ ورتالىقتارىندا ۋاقىتشا تىركەۋ بويىنشا جۇمىس ىستەيتىن مامانداردىڭ سانى كوبەيدى. سونداي-اق جۇمىس كەستەسى تاڭعى ساعات 8:00-دەن كەشكى 20:00-گە دەيىن ۇزارتىلدى.

اۆتور: ارمان اسقاروۆ