الۋا سالامات قىزى – قازاقستاننىڭ زاڭ عىلىمىنىڭ دامۋىنا ۇلكەن ۇلەس قوسىپ كەلە جاتقان كورنەكتى عالىم-ۇستاز، قۇقىقتانۋشى. حالقىمىزدا «شاكىرتسىز ۇستاز تۇل» دەگەن ناقىل ءسوز بار. قىرىق جىلعا جۋىق عىلىمي-پەدوگوگيكالىق قىزمەتى بارىسىندا ول كوپتەگەن شاكىرت تاربيەلەپ، بىلىكتى زاڭگەر مامانداردى دايىندادى. ولاردىڭ كوبى بۇگىندە ءىرى مەملەكەتتىك تۇلعا، قوعام قايراتكەرى، بىلىكتى زاڭگەر دارەجەسىنە جەتىپ، ەل دامۋى جولىندا ەڭبەك ەتۋدە. پروفەسسور الۋا يبرايەۆا – قازاقستانداعى قۇقىقتىق مادەنيەت، قۇقىقتىق تاربيە مەن سانانىڭ دامۋى باعىتىنداعى 200-گە جۋىق عىلىمي ەڭبەكتىڭ اۆتورى. ونىڭ 30 وقۋلىق پەن وقۋ قۇرالى جارىققا شىقتى. ونىڭ ىشىندە «ادام، قوعام، قۇقىق» جانە «مەملەكەت جانە قۇقىق تەورياسى» وقۋلىقتارى مەكتەپ قابىرعاسىندا، سونداي-اق 1-كۋرس ستۋدەنتتەرىنە وقىتىلاتىن فۋندامەنتالدىق وقۋلىق بولىپ تابىلادى. سول سەبەپتەن قازۇۋ-دىڭ زاڭ فاكۋلتەتىنە تۇسكەن ءاربىر ستۋدەنت الۋا سالامات قىزىنىڭ ءدارىسىن تىڭداپ، وقۋلىعىن قولعا الدى دەپ زور سەنىممەن ايتا الامىز.
مەنىڭ اپايمەن تانىستىعىم 1996 جىلى پروفەسسوردىڭ «مەملەكەت جانە قۇقىق تەورياسى» ءپانى بويىنشا ءدارىسىن تىڭداۋدان باستاۋ الدى. ساباقتارى وزىنە ءتان سۇيكىمدى بەينەسى، كوركەم مىنەزى، ءجۇرىس-تۇرىسى، ديكسياسى جانە ماتەريالدى قىزىقتى تۇسىندىرىمەن ەرەكشە ەستە قالدى. اپاي اۋديتوريانى تولىق باۋراپ، باعىندىرىپ الاتىن.
الۋا سالامات قىزى قازۇۋ قابىرعاسىندا ۇزاق جىلدار بويى ەڭبەك ەتىپ كەلەدى. 1997-2008 جىلدارى كافەدرا مەڭگەرۋشىسى بولعان كەزىندە مەن زاڭ فاكۋلتەتىنىڭ «مەملەكەت جانە قۇقىق تەورياسى» كافەدراسىنا جۇمىسقا قابىلداندىم. العاشقى كۇننەن-اق بەلسەندىلىگى مەن ەڭبەكقورلىعىنا ءتانتى بولدىم. ۇستازدى قۇرمەتتەۋدى دە الۋا اپايدان ۇيرەندىم. ۇستازى سۇلتان سارتايۇلىن قاشاندا ۇلگى تۇتىپ، ماقتان ەتۋى بىزگە ۇلگى بولدى.
الۋا سالامات قىزى – مەنىڭ عىلىمي جەتەكشىم. ول وتە تالاپشىل، جاس عالىمداردىڭ ەڭبەكقورلىق پەن عىلىمي جاڭا ىزدەنىستەرىن جوعارى باعالايدى. كەيدە قولىم قالت ەتكەندە بوس وتىرا قالسام، «كىتاپحاناعا بار، ىزدەن» دەپ دامىل بەرمەيتىن. سونىڭ ارقاسىندا كوپتەگەن تاجىريبە جينادىم، شىڭدالدىم. مەنىڭ زەرتتەۋ تاقىرىبىم – قۇقىقتىق سانانىڭ قالىپتاسۋ ەرەكشەلىكتەرىنە ارنالدى. قاشاندا توقتاپ قالماي، العا قاراي ۇمتىلۋعا جەتەلەپ وتىرۋدىڭ ارقاسىندا بۇگىندە مەن دە ءبىرشاما جەتىستىككە قول جەتكىزدىم. ديسسەرتاسيالىق جۇمىسىمدى ءساتتى قورعاۋىما، عالىم رەتىندە قالىپتاسۋىما جانە جەمىستى ەڭبەك ەتۋىمە ۇلكەن ۇلەس قوسقان ۇلاعاتتى ۇستازىما، جاناشىر تالىمگەرىمە ايتار العىسىم شەكسىز.
سونداي-اق ۇستازىممەن بىرلەسىپ «مەملەكەت جانە قۇقىق تەورياسى» وقۋلىعىن جارىققا شىعاردىق.
قازىرگى تاڭدا بەدەلدى باسشى، عالىم-ۇستاز، نەمەرە ءسۇيىپ وتىرعان اياۋلى اجە، ارداقتى انا الۋا سالاماتقىزىن مەرەيتويىمەن شىن جۇرەكتەن قۇتتىقتايمىن. ۇستازىما زور دەنساۋلىق، وتباسىنا اماندىق، باق-بەرەكە جانە شىعارماشىلىق تابىستار تىلەيمىن!
ىزگى نيەتپەن سپاتاي سارتايەۆ،
ءال-فارابي اتىنداعى قازۇۋ،
جوعارى وقۋ ورنىنا دەيىنگى دايىندىق
كافەدراسىنىڭ مەڭگەرۋشىسى، ز.ع.ك.
