Ustaz, ári tálimger
Alýa Salamatqyzy – Qazaqstannyń zań ǵylymynyń damýyna úlken úles qosyp kele jatqan kórnekti ǵalym-ustaz, quqyqtanýshy. Halqymyzda «Shákirtsiz ustaz tul» degen naqyl sóz bar. Qyryq jylǵa jýyq ǵylymi-pedogogikalyq qyzmeti barysynda ol kóptegen shákirt tárbielep, bilikti zańger mamandardy daiyndady. Olardyń kóbi búginde iri memlekettik tulǵa, qoǵam qairatkeri, bilikti zańger dárejesine jetip, el damýy jolynda eńbek etýde. Professor Alýa Ibraeva – Qazaqstandaǵy quqyqtyq mádeniet, quqyqtyq tárbie men sananyń damýy baǵytyndaǵy 200-ge jýyq ǵylymi eńbektiń avtory. Onyń 30 oqýlyq pen oqý quraly jaryqqa shyqty. Onyń ishinde «Adam, qoǵam, quqyq» jáne «Memleket jáne quqyq teoriiasy» oqýlyqtary mektep qabyrǵasynda, sondai-aq 1-kýrs stýdentterine oqytylatyn fýndamentaldyq oqýlyq bolyp tabylady. Sol sebepten QazUÝ-dyń zań fakýltetine túsken árbir stýdent Alýa Salamatqyzynyń dárisin tyńdap, oqýlyǵyn qolǵa aldy dep zor senimmen aita alamyz.
Meniń apaimen tanystyǵym 1996 jyly professordyń «Memleket jáne quqyq teoriiasy» páni boiynsha dárisin tyńdaýdan bastaý aldy. Sabaqtary ózine tán súikimdi beinesi, kórkem minezi, júris-turysy, diktsiiasy jáne materialdy qyzyqty túsindirimen erekshe este qaldy. Apai aýditoriiany tolyq baýrap, baǵyndyryp alatyn.
Alýa Salamatqyzy QazUÝ qabyrǵasynda uzaq jyldar boiy eńbek etip keledi. 1997-2008 jyldary kafedra meńgerýshisi bolǵan kezinde men zań fakýltetiniń «Memleket jáne quqyq teoriiasy» kafedrasyna jumysqa qabyldandym. Alǵashqy kúnnen-aq belsendiligi men eńbekqorlyǵyna tánti boldym. Ustazdy qurmetteýdi de Alýa apaidan úirendim. Ustazy Sultan Sartaiulyn qashanda úlgi tutyp, maqtan etýi bizge úlgi boldy.
Alýa Salamatqyzy – meniń ǵylymi jetekshim. Ol óte talapshyl, jas ǵalymdardyń eńbekqorlyq pen ǵylymi jańa izdenisterin joǵary baǵalaidy. Keide qolym qalt etkende bos otyra qalsam, «Kitaphanaǵa bar, izden» dep damyl bermeitin. Sonyń arqasynda kóptegen tájiribe jinadym, shyńdaldym. Meniń zertteý taqyrybym – quqyqtyq sananyń qalyptasý erekshelikterine arnaldy. Qashanda toqtap qalmai, alǵa qarai umtylýǵa jetelep otyrýdyń arqasynda búginde men de birshama jetistikke qol jetkizdim. Dissertatsiialyq jumysymdy sátti qorǵaýyma, ǵalym retinde qalyptasýyma jáne jemisti eńbek etýime úlken úles qosqan ulaǵatty ustazyma, janashyr tálimgerime aitar alǵysym sheksiz.
Sondai-aq ustazymmen birlesip «Memleket jáne quqyq teoriiasy» oqýlyǵyn jaryqqa shyǵardyq.
Qazirgi tańda bedeldi basshy, ǵalym-ustaz, nemere súiip otyrǵan aiaýly áje, ardaqty ana Alýa Salamatqyzyn mereitoiymen shyn júrekten quttyqtaimyn. Ustazyma zor densaýlyq, otbasyna amandyq, baq-bereke jáne shyǵarmashylyq tabystar tileimin!
Izgi nietpen Spatai SARTAEV,
Ál-Farabi atyndaǵy QazUÝ,
joǵary oqý ornyna deiingi daiyndyq
kafedrasynyń meńgerýshisi, z.ǵ.k.
