جيىن بارىسىندا بەلگىلى بولعانداي، ۇشۋ-قونۋ جولاعىن جاڭعىرتۋ جوباسىنىڭ جالپى قۇنى 7،5 ملرد تەڭگە، سونىڭ 4،7 ملرد تەڭگەسى رەسپۋبليكالىق بيۋدجەتتەن، 2،8 ملرد تەڭگەسى جەرگىلىكتى بيۋدجەتتەن بولىنگەن. قۇرىلىس جۇمىستارىن «BI Infra Construction» ج ش س جۇرگىزەدى. باس مەردىگەر ۇيىم – «تالدىقورعان جولدارى» ج ش س.
«BI Infra Construction» ج ش س باس ديرەكتورى دارحان راحيموۆتىڭ ايتۋىنشا جاڭعىرتۋدىڭ ءبىرىنشى كەزەڭىندە جولاق 2700 مەترگە دەيىن ۇزارتىلىپ، 49 مەترگە دەيىن كەڭەيتىلەدى. ەكىنشى كەزەڭىندە جارىق دابىلدى قۇرىلعى، ۇزىندىعى 6220 مەترلىك پەريمەترلى قورشاۋ، بەينەباقىلاۋ ورناتىلىپ، ۇزىندىعى 6 مىڭ مەترلىك پاترۋل جولى سالىنادى. ءبىرىنشى كەزەڭدە شامامەن 50 بىرلىك قاجەتتى تەحنيكا تارتۋ جوسپارلانعان. قوس قاباتتى بەتون جابىندى قىركۇيەك ايىندا توسەلەدى. وعان دەيىن سەمەنت، ينەرتتى ماتەريالدار ىرىكتەۋ، قۇرال-جابدىقتاردى ىسكە قوسۋ جانە قۇرىلىس ماتەريالدارىن زەرتحانالىق تەكسەرۋدەن وتكىزۋ سياقتى بارلىق قاجەتتى دايىندىق جۇمىستارى جۇرگىزىلەدى.
وبلىس اكىمى اماندىق باتالوۆ ماتەريالدار مەن بارلىق قۇرىلىس جۇمىستارىنىڭ ساپاسى باستى نازاردا بولۋى كەرەكتىگىن اتاپ ءوتتى:
– الاكول – تۇتاس قازاقستاننىڭ جاۋھارى. سوندىقتان ۇشۋ-قونۋ جولاعىن جاڭعىرتۋ جوباسىن ساپالى ءارى مەرزىمىندە ىسكە اسىرۋدىڭ ماڭىزى زور. ەندى بارلىق نورمالار مەن تالاپتاردى ساقتاي وتىرىپ جۇمىسقا كىرىسۋ كەرەك، كەلەسى تۋريستىك ماۋسىم باستالعانشا قۇرىلىس جۇمىستارىن اياقتاۋعا ءتيىسپىز. وسى تۋريستىك ماۋسىمدا اۆيارەيستەر توقتامايدى. اۋەجاي تەرمينالى ءوز جۇمىسىن جالعاستىرادى، الاكولدىڭ بارلىق تۋريستىك دەمالىس ايماقتارى سانيتارلىق-ەپيدەميولوگيالىق تالاپتاردى ەسكەرە وتىرىپ قوناقتاردى قابىلداۋعا دايىن. ۇشۋ-قونۋ جولاعىن جاڭعىرتۋ كەزىندە ۇشاقتار ارنايى دايىندالعان جولاققا قوناتىن بولادى، – دەدى ا. باتالوۆ.
جيىن سوڭىندا وبلىس اكىمى جاۋاپتى تۇلعالارعا مەردىگەر ۇيىمداردىڭ جۇمىسىنا قاجەتتى جاعداي جاساپ ماڭىزدى نىساننىڭ جاڭعىرتۋ جۇمىستارىن تۇراقتى باقىلاۋدا ۇستاۋدى تاپسىردى.
جالپى ءۇشارال قالاسىنداعى اۋەجايدىڭ جولاعىن جاڭعىرتقاننان كەيىن مۇندا «Boeing B767-300»، «B767-200 ER»، «B757-200/300»، «Airbus A310-300»، «تۋ-154 م» كلاستى اۆيالاينەرلەردى قابىلداۋعا مۇمكىندىك تۋادى. بۇل ءوز كەزەگىندە كولىكتەرگە قولجەتىمدىلىكتى جاقسارتىپ قانا قويماي دەمالۋشىلار سانىنىڭ ارتۋىنا ىقپال ەتەدى. بۇل ىشكى ءتۋريزمدى بەلسەندى دامىتۋ دەگەن ءسوز.
