Úsharal áýejaiynyń úlken áýe kemelerin qabyldaityn jolaǵy synaqtan sátti ótti
Jiyn barysynda belgili bolǵandai, ushý-qoný jolaǵyn jańǵyrtý jobasynyń jalpy quny 7,5 mlrd teńge, sonyń 4,7 mlrd teńgesi respýblikalyq biýdjetten, 2,8 mlrd teńgesi jergilikti biýdjetten bólingen. Qurylys jumystaryn «BI Infra Construction» JShS júrgizedi. Bas merdiger uiym – «Taldyqorǵan joldary» JShS.
«BI Infra Construction» JShS bas direktory Darhan Rahimovtyń aitýynsha jańǵyrtýdyń birinshi kezeńinde jolaq 2700 metrge deiin uzartylyp, 49 metrge deiin keńeitiledi. Ekinshi kezeńinde jaryq dabyldy qurylǵy, uzyndyǵy 6220 metrlik perimetrli qorshaý, beinebaqylaý ornatylyp, uzyndyǵy 6 myń metrlik patrýl joly salynady. Birinshi kezeńde shamamen 50 birlik qajetti tehnika tartý josparlanǵan. Qos qabatty beton jabyndy qyrkúiek aiynda tóseledi. Oǵan deiin tsement, inertti materialdar irikteý, qural-jabdyqtardy iske qosý jáne qurylys materialdaryn zerthanalyq tekserýden ótkizý siiaqty barlyq qajetti daiyndyq jumystary júrgiziledi.
Oblys ákimi Amandyq Batalov materialdar men barlyq qurylys jumystarynyń sapasy basty nazarda bolýy kerektigin atap ótti:
– Alakól – tutas Qazaqstannyń jaýhary. Sondyqtan ushý-qoný jolaǵyn jańǵyrtý jobasyn sapaly ári merziminde iske asyrýdyń mańyzy zor. Endi barlyq normalar men talaptardy saqtai otyryp jumysqa kirisý kerek, kelesi týristik maýsym bastalǵansha qurylys jumystaryn aiaqtaýǵa tiispiz. Osy týristik maýsymda aviareister toqtamaidy. Áýejai terminaly óz jumysyn jalǵastyrady, Alakóldiń barlyq týristik demalys aimaqtary sanitarlyq-epidemiologiialyq talaptardy eskere otyryp qonaqtardy qabyldaýǵa daiyn. Ushý-qoný jolaǵyn jańǵyrtý kezinde ushaqtar arnaiy daiyndalǵan jolaqqa qonatyn bolady, – dedi A. Batalov.
Jiyn sońynda oblys ákimi jaýapty tulǵalarǵa merdiger uiymdardyń jumysyna qajetti jaǵdai jasap mańyzdy nysannyń jańǵyrtý jumystaryn turaqty baqylaýda ustaýdy tapsyrdy.
Jalpy Úsharal qalasyndaǵy áýejaidyń jolaǵyn jańǵyrtqannan keiin munda «Boeing B767-300», «B767-200 ER», «B757-200/300», «Airbus A310-300», «TÝ-154 M» klasty avialainerlerdi qabyldaýǵa múmkindik týady. Bul óz kezeginde kólikterge qoljetimdilikti jaqsartyp qana qoimai demalýshylar sanynyń artýyna yqpal etedi. Bul ishki týrizmdi belsendi damytý degen sóz.
