مامىر مەن شىلدە ايلارى ارالىعىندا ق ر ۇلتتىق بانكى 21،6 توننا التىن ساتقان. وسىلايشا قازاقستاننىڭ التىن-ۆاليۋتا رەزەرۆتەرىندەگى اتالعان باعالى مەتالدىڭ ۇلەسى 3 پايىزدىق تارماققا تومەندەدى. ال باسقا ەلدەر، گەوساياسي تۇراقسىزدىق كەزەڭدەرىندە، كەرىسىنشە، بۇل اكتيۆتى جاپپاي ساتىپ الىپ جاتىر، دەپ جازادى Dalanews.kz.
قازاقستاننىڭ جالپى حالىقارالىق رەزەرۆتەرىنىڭ كولەمى 2024 جىلعى تامىزدا 42،7 ملرد اقش دوللارعا جەتتى، بۇل ءبىر جىل بۇرىنعىدان 27،2%-عا ارتىق. اقشامەن ەسەپتەگەندە رەزەرۆتەردىڭ جارتىسىنان استامى التىندا بولدى: 23،5 ملرد اقش دوللار — وتكەن جىلدىڭ تامىز ايىمەن سالىستىرعاندا 20،9%-عا كوپ. ال ەركىن ايىرباستالاتىن ۆاليۋتالىق اكتيۆتەر ءبىر جىلدا 35،8%-عا ءوسىپ، 19،3 ملرد اقش دوللارعا جەتتى. بۇل رەتتە جالپى حالىقارالىق رەزەرۆتەگى التىننىڭ ۇلەسى ءبىر جىلدا 57،7%-دان 54،9%-عا دەيىن تومەندەدى.
بۇل مالىمەتتەردى ranking.kz ءوز زەرتتەۋىندە العا تارتادى.
"ماسەلەن، 2024 جىلدىڭ جەتى ايىنىڭ قورىتىندىسى بويىنشا قازاقستان رەسپۋبليكاسىنىڭ التىن-ۆاليۋتا قورى بار بولعانى 692،3 كەلىگە ءوستى. ونىڭ ۇستىنە العاشقى ءتورت ايدا 22،3 توننا التىن ساتىپ الىنسا، مامىردان شىلدەگە دەيىنگى ارالىقتا ۇلتتىق بانك، كەرىسىنشە 21،6 توننا بۇل اسىل مەتالدى ساتقان".
بۇعان دەيىن، 2011–2021 جىلدار ارالىعىندا قازاقستان بەلسەندى تۇردە التىندى ساتىپ الىپ وتىرعان، ياعني جىلىنا 2،4-تەن 50،6 تونناعا دەيىن (!). جالپى، وسى ۋاقىت كەزەڭىندە الەم بويىنشا بارلىعى 335،1 توننا التىن ساتىپ الىنعان ەكەن. تەك جۇڭگو، رەسەي جانە تۇركيا عانا قازاقستانعا قاراعاندا التىندى بەلسەندىرەك ساتىپ العان. الايدا ولاردان ايىرماشىلىعى، قازاقستان 2022 جانە 2023 جىلدارى 108،1 توننا التىن ساتقان: 2022 جىلى - 50،7 توننا، 2023 جىلى - 57،4 توننا.
"التىننىڭ بەلسەندى ساتىلۋى جوعارى باعا كەزەڭىنە سايكەس كەلدى. رەتتەۋشى سوڭعى ەكى تۇراقسىز جىل ىشىندە مۇنداي اكتيۆتى ساتقانى ءجون بە ءوزى، بۇل - ۇلكەن سۇراق. ءوزىڭىز باعالاپ كورىڭىزشى. ماسەلەن، 2022 جىلى ورتاشا ەسەپپەن التىننىڭ ءبىر تروي ۋنسياسى 1،8 مىڭ اقش دوللاردى قۇرادى. كەلەسى جىل باعا بويىنشا رەكورد بولدى — 2023 جىلدىڭ ساۋىرىندە التىننىڭ ءبىر تروي ۋنسياسىنىڭ باعاسى 2 مىڭ اقش دوللارىنا جەتتى، ال جەلتوقساندا رەكورد جاڭارتىلدى: 2 مىڭنان ءسال استام اقش دوللارى. بيىل التىننىڭ باعاسى اي سايىن دەرلىك رەكوردتاردى جاڭارتىپ، قىركۇيەكتە 2،6 مىڭ اقش دوللاردى قۇرادى. قازان ايىنىڭ باسىندا التىن باعاسىنىڭ كوتەرىلۋىن جالعاستىردى جانە ءبىر ترويا ۋنسياسى ءۇشىن 2،7 مىڭ اقش دوللارعا جەتتى، بۇل تاڭقالارلىق ەمەس، ويتكەنى گەوساياسي تۇراقسىزدىق جاعدايىندا التىن جالعىز قورعانىش اكتيۆى بولىپ تابىلادى. ءدال وسىنداي ساتتە قازاقستان، كەرىسىنشە ءقازىر ونى ساتىپ جاتىر. سەبەبىن، رەسمي بيلىك اشىپ ايتپايدى"، دەلىنگەن زەرتتەۋدە.
حالىقارالىق ۆاليۋتا قورىنىڭ قارجىلىق ستاتيستيكاسىنا سۇيەنسەك، قازاقستان التىن قورى بويىنشا الەمدە 18-ورىندا تۇر: 294،9 توننا.
دۇنيە جۇزىندەگى التىننىڭ كوپ بولىگى ورتالىق بانكتەردىڭ قولىندا، ولار بۇل رەزەرۆتەردى ولاردىڭ قاۋىپسىزدىگى، وتىمدىلىگى جانە تابىستىلىعى ءۇشىن ساقتايدى. بۇل مەكەمەلەر تاريح بويى وندىرىلگەن التىننىڭ شامامەن بەستەن بىرىنە يە. جالپى، رەسمي الەمدىك التىن قورى 30،1 مىڭ تونناعا جەتەدى. ەڭ ۇلكەن كولەمى اقش-قا تيەسىلى: 8،1 مىڭ توننا، ونىڭ جارتىسى اقش-تىڭ ايگىلى فورت نوكس دەپوزيتارييىندە ساقتالعان. ەكىنشى جانە ءۇشىنشى ورىنداردا تيىسىنشە 3،4 مىڭ جانە 2،5 مىڭ توننا التىن كولەمىمەن گەرمانيا مەن يتاليا تۇر. فرانسيادا (2،4 مىڭ توننا)، رەسەيدە (2،3 مىڭ توننا)، قىتايدا (2،3 مىڭ توننا) جانە شۆەيساريادا (1 مىڭ توننا) دا ايتارلىقتاي قور بار.
