باسپا، راديو، ينتەرنەت-جۋرناليستيكا سالاسىنداعى ۇزدىكتەردى انىقتاۋ ءۇشىن «URKER – 2022» ۇلتتىق بايگەسىنە وتىنىمدەر قابىلداۋ باستالدى، – دەپ حابارلايدى Dalanews.kz.

رەسپۋبليكا اۋماعىندا مەدياكونتەنت وندىرەتىن جانە تاراتاتىن رەسپۋبليكالىق جانە وڭىرلىك راديوستانسيالار، باسپا جانە ينتەرنەت-باسىلىمدار بايگەگە قاتىسا الادى.

وتىنىمدەردى قابىلداۋ 2022 جىلعى 30 قىركۇيەكتەن باستاپ 19 قازانعا دەيىن جۇزەگە اسىرىلادى.

كونكۋرتىق جۇمىستار 2021 جىلعى 2 ماۋسىم مەن 2022 جىلعى 29 قىركۇيەك ارالىعىندا جاريالانىپ، باسىلىمىندا، ينتەرنەت-رەسۋرستا جاريالانۋى نەمەسە راديوەفيردە شىعۋى ءتيىس. ءار ۇمىتكەر بايگەنىڭ تەك ەكى نوميناسياسىنا قاتىسۋعا قۇقىلى.

وتىنىمدەر urker-awards.kz رەسمي سايتىندا 10 نوميناسيا بويىنشا قابىلدانادى:

1. جىلدىڭ ۇزدىك سۇحباتى


2. جىلدىڭ ۇزدىك رەپورتاجى


3. الەۋمەتتىك تاقىرىپتاعى ۇزدىك ماتەريال


4. جىلدىڭ ۇزدىك جۋرناليستىك زەرتتەۋى


5. جىلدىڭ ۇزدىك اناليتيكالىق ماتەريالى


6. حالىقارالىق تاقىرىپتاعى ۇزدىك ماتەريال


7. جىلدىڭ ۇزدىك جاڭالىقتار پورتالى


8. راديوستانسياداعى ۇزدىك جوبا


9. جىلدىڭ ۇزدىك فوتوسۋرەتى


10. ۇزدىك وڭىرلىك ب ا ق

ارنايى پرەميالار:

1. احمەت بايتۇرسىنوۆ اتىنداعى ارنايى پرەميا (باسپا باق-تاعى جوبا)


2. شەرحان مۇرتازا اتىنداعى ارنايى پرەميا (اۆتورلىق جوبا)

3.باتىر قازىبايەۆ اتىنداعى ارنايى پرەميا (ينتەرنەت باق-تاعى جوبا)

جۇمىستاردى قۇرامىنا بەدەلدى جۋرناليستەر، سالانىڭ ەڭبەك سىڭىرگەن قايراتكەرلەرى مەن مەدياساراپتاۋشىلار كىرەتىن سىيلىقتىڭ تاۋەلسىز قازىلار القاسى باعالايتىن بولادى.

كونكۋرس قورىتىندىسى بويىنشا ءار نوميناسيانىڭ ۇزدىك وكىلىنە جەڭىمپاز اتاعى بەرىلىپ، «URKER - 2022» ەستەلىك مۇسىنشەسى جانە 1 000 000 تەڭگە مولشەرىندەگى اقشالاي سىي تابىستالادى.

ۇلتتىق بايگە ۇيىمداستىرۋشىلارى - ق ر اقپارات جانە قوعامدىق دامۋ مينيسترلىگى جانە «مەديا دامىتۋ قورى» كورپوراتيۆتىك قورى.

«URKER» - باسپا، راديو، ينتەرنەت-جۋرناليستيكا سالاسىنداعى ۇزدىك جەتىستىكتەر ءۇشىن بەرىلەدى، ايماقتارداعى مۋلتيمەديالىق جۋرناليستيكانى دامىتۋعا ىقپال ەتۋگە، جۋرناليستيكا مارتەبەسىن ارتتىرۋعا، كاسىبي ستاندارتتار مەن كريتەريلەردى بەكىتۋگە، ازاماتتىق بەلسەندىلىكتى ارتتىرۋعا باعىتتالعان.