اباي وبلىسىندا بالالاردى قاعىپ كەتكەن جۇرگىزۋشىنىڭ ۇلى كەشىرىم سۇراپ، اپاتتىڭ سەبەبىن ايتتى، دەپ حابارلايدى Dalanews.kz «31 ارناعا» سىلتەپ.

55 جاستاعى جۇرگىزۋشى وقيعا بولعان ساتتەن كەيىن بىردەن ۇستالدى. ونىڭ 20 جىلدىق اۆتوبۋس جۇرگىزۋ تاجىريبەسى بار ەكەنى بەلگىلى بولدى. وتباسىنىڭ ايتۋىنشا، اپات كەزىندە ەر ادامعا جۇرەك تالماسى سوققان، سونىڭ سالدارىنان ول ءرولدى باسقارا الماي قالعان. مەديسينالىق ساراپتاما جۇرگىزۋشىنىڭ ماس كۇيدە بولماعانىن، ەسىرتكى قولدانباعانىن راستادى.

«تالمادان كەيىن ول ءرولدى ۇستاپ قالا المادى. قاسىنداعى انامىز بولعان. بارلىعى ءبىر ساتتە ورىن الدى. وتە قايعىلى جاعداي. ءبىز كوڭىل ايتتى. كەشىرىم سۇرايمىز. ولار دا (مارقۇمداردىڭ تۋىستارى – اۆت.) تۇسىنىستىكپەن قارادى. مۇنداي سىناققا ەندى ەشبىر وتباسى تاپ بولماسىن دەيمىز. ەشكىم مۇنداي قاسىرەتتى كۇتپەيدى»، – دەدى كۇدىكتىنىڭ ۇلى ەرقانات سەرىق ۇلى.

6 مەن 9 جاس ارالىعىنداعى ءۇش بالا اۋىر جاراقاتپەن اۋرۋحاناعا جەتكىزىلدى. ولار باس سۇيەك، اياق-قول سىنىقتارىمەن جانە ىشكى اعزالارىنىڭ زاقىمدانۋىمەن تۇسكەن. كەيىن ەكەۋى ساناۆياسيا ارقىلى استاناعا جىبەرىلدى، ال ءبىر قىز بالا اۋداندىق اۋرۋحانادا اۋىر حالدە جاتىر. پرەزيدەنتتىڭ تاپسىرماسىمەن وڭىرگە شۇعىل تۇردە استانالىق دارىگەرلەر جىبەرىلىپ، بىرنەشە وتا جاسالدى.

«ءار وتا شامامەن ەكى ساعاتقا سوزىلدى. ءبىرىنشى وپەراسيا ىشكى اعزالارعا جاسالدى، سەبەبى باۋىر مەن ىشەكتىڭ جاراقاتىنان ىشكى قان كەتۋ بولدى. ەكىنشى وتا باس مي جاراقاتىنان كەيىنگى ىسىنۋگە بايلانىستى جاسالدى. قىزدىڭ ومىرىنە ۇلكەن ءقاۋىپ ءتونىپ تۇر دەۋگە بولادى. سەبەبى جاراقاتتارى وتە اۋىر ءارى كۇردەلى»، – دەدى نەيروحيرۋرگ ساپاربەك سەيىتبەكوۆ.

پوليسيا قىلمىستىق ءىس قوزعاپ، وقيعانىڭ بارلىق ءمان-جايىن انىقتاپ جاتىر.