ءۇرجار اۋدانى اكىمىنىڭ قاتىسۋىمەن كەزدەسۋدىڭ باستى وقيعاسى زاماناۋي سەرۆيستىك اكىمدىكتىڭ تۇساۋكەسەرى بولدى. ول ازاماتتار ءۇشىن قولايلى جاعداي جاساۋ ارقىلى جاڭعىرتىلعان فورماتتا جۇمىس ىستەيدى، وندا: كۇتۋ زالى، كەڭەس بەرۋ الاڭى، وزىنە-وزى قىزمەت كورسەتۋ بۇرىشى، اقپاراتتىق ستەندتەر، WI-Fi جەلىسى، بالالار بۇرىشى بار جانە مۇمكىندىگى شەكتەۋلى جاندارعا ىڭعايلى جاعدايلار قاراستىرىلعان. مۇندا ءاربىر ازامات ساۋلەت جانە اۋدان قۇرىلىسى، جەر قاتىناستارى، الەۋمەتتىك سالا جانە باسقا دا قىزىقتىراتىن ماسەلەلەر بويىنشا قاجەتتى قىزمەتتەر مەن كەڭەستەر الا الادى.
ءۇرجار اۋدانىنىڭ «ASHYQ AKIMDIK» قىزمەتى اشىقتىق، قول جەتىمدىلىك، ەسەپتىلىك جانە تۇتىنۋشىعا ەڭ باستى باعىت-باعدار كورسەتۋ ۇستانىمدارى بويىنشا جۇمىس ىستەيدى. بۇل لوگوتيپ شىعىس قازاقستاننىڭ بۇكىل اۋماعىندا ءبىرىڭعاي بولىپ تابىلادى جانە ونىڭ تۇرعىندارىنىڭ تانىمال برەندىنە اينالادى.
ەستەرىڭىزگە سالا كەتەيىك، مەملەكەت باسشىسىنىڭ تاپسىرماسىنا سايكەس، شقو اكىمدىگىمەن جانە سىبايلاس جەمقورلىققا قارسى قىزمەتىمەن وسى باعىتتا بەلسەندى جۇمىس جۇرگىزۋدە. ماسەلەن، سەرۆيستىك اكىمدىكتەردىڭ اشىلۋى جەرگىلىكتى اتقارۋشى ورگاندار قىزمەتى ارقىلى تۇرعىندار ءۇشىن قولجەتىمدى ءارى اشىق بولادى، بۇل حالىقتىڭ مەملەكەتتىك ورگاندارعا دەگەن سەنىمىن ارتتىرۋعا مۇمكىندىك بەرەدى.
سونىمەن قاتار، ە.جالماعامبەت ءۇرجار اۋدانىنىڭ اكىمى ن.توقسەيتوۆتىڭ توراعالىعىمەن وتكەن سەلەكتورلىق كەڭەسكە اۋدان اكىمىنىڭ ورىنباسارلارى، اپپارات باسشىسى، دەربەس بولىمدەردىڭ باسشىلارى، سونداي-اق 27 اۋىلدىق وكرۋگ اكىمدەرى ZOOM پلاتفورماسى ارقىلى on-line رەجيمىندە قاتىستى.
وبلىستىق سىبايلاس جەمقورلىققا قارسى قىزمەت دەپارتامەنتىنىڭ باسشىسى ءوز بايانداماسىندا باعىنىشتىلاردىڭ سىبايلاس جەمقورلىق قۇقىق بۇزۋشىلىعىن جاساعانى ءۇشىن ءبىرىنشى باسشىلاردىڭ دەربەس جاۋاپكەرشىلىگى بويىنشا زاڭنامالىق تۇزەتۋلەرگە ەگجەي-تەگجەيلى توقتالىپ، قاتىسۋشىلارعا مەملەكەتتىك مەكەمە باسشىلارى مەن قىزمەتكەرلەرى تاراپىنان سىبايلاس جەمقورلىق قۇقىق بۇزۋشىلىقتارىنا جول بەرمەۋ تۋرالى ەسكەرتتى. سونداي-اق، بيۋدجەت قاراجاتىن ماقساتتى جۇمساۋ ءۇشىن جاۋاپكەرشىلىك، ۇنەمدەۋ قاجەتتىلىگى جانە مەملەكەتتىك ساتىپ الۋ راسىمدەرىن قاتاڭ ساقتاۋ تۋرالى ەرەكشە اتاپ ءوتتى.
كەڭەس بارىسىندا قاتىسۋشىلارعا سىبايلاس جەمقورلىققا قارسى ءىس-قيمىل جونىندەگى اگەنتتىك جوسپارلايتىن قۇقىق قورعاۋ جانە ارنايى مەملەكەتتىك ورگاندار قىزمەتكەرلەرىنىڭ سىبايلاس جەمقورلىق ءۇشىن جاۋاپكەرشىلىگىن كۇشەيتۋ، اسا اۋىر سىبايلاس جەمقورلىق قىلمىستارى ءۇشىن قىسقا ايىپپۇلداردى قولدانۋدى بولدىرماۋ سياقتى جاڭالىقتار تۋرالى اقپارات بەرىلدى.
«بۇل سىبايلاس جەمقورلىق قۇقىق بۇزۋشىلىقتار ءۇشىن سانكسيالاردىڭ پارمەندىلىگىن ارتتىرادى جانە ولاردى جاساعانى ءۇشىن قوعامدىق ءقاۋىپتىڭ جازالانۋىن قامتاماسىز ەتۋگە مۇمكىندىك بەرەدى»، - دەپ اتاپ ءوتتى ە.جالماعامبەت.
ءۇرجار اۋدانىنا جۇمىس ساپارى سوڭىندا «ADALDYQ ALANY» جوباسى اياسىندا الەۋمەتتىك باعدارلامالار ءبولىمى، جۇمىسپەن قامتۋ ورتالىعى جانە احات بولىمدەرىمەن جۇمىس جاسايتىن فرونت-كەڭسەنىڭ جۇمىسىمەن تانىستى.
جۇمىستىڭ وسى فورماتى مەملەكەت پەن قوعام اراسىنداعى قاشىقتىقتى قىسقارتۋعا جانە سايىپ كەلگەندە قىزمەتتەردى الۋدىڭ جەدەلدىگى مەن ىڭعايلىلىعىن ارتتىرۋعا مۇمكىندىك بەرەدى.
وبلىستىڭ سىبايلاس جەمقورلىققا قارسى قىزمەتى باسشىسىنىڭ ايتۋىنشا، مەملەكەتتىك ورگانداردا فرونت-كەڭسەلەردى اشۋ جانە ناسيحاتتاۋ – بۇل مەملەكەتتىك اپپارات قىزمەتىنىڭ سىبايلاس جەمقورلىق تاۋەكەلدەرىن ازايتۋدا جانە ترانسفورماسيالاۋدا ۇلكەن قادام.
