قازاقستان ۇلتتىق قاۋىپسىزدىك كوميتەتى نۇرلان سابۋروۆتىڭ رەسەي اسكەرىنە دەمەۋشىلىك جاساعانىن تەكسەرىپ جاتىر، دەپ حابارلايدى Dalanews.kz.

بۇل تۋرالى كوميتەتتىڭ باسپا ءسوز قىزمەتى Tengrinews.kz رەداكسياسىنىڭ ساۋالىنا بەرگەن جاۋابىندا مالىمدەدى.

رەداكسيا ۇقك-عا سابۋروۆقا قاتىستى قىلمىستىق زاڭنامانى بۇزۋ ىقتيمالدىعى، سونىڭ ىشىندە قىلمىستىق كودەكستىڭ 170-بابى بويىنشا تەكسەرىس جۇرگىزىلىپ-جۇرگىزىلمەگەنىن ناقتىلاۋ ماقساتىندا رەسمي سۇراۋ جولداعان.

اتالعان باپ “جالدامالىلىق” دەپ اتالادى. ياعني سوعىسقا، قارۋلى قاقتىعىستارعا نەمەسە مەملەكەتتىڭ اۋماقتىق تۇتاستىعىن بۇزۋعا باعىتتالعان ارەكەتتەرگە ادامداردى تارتۋ، قارجىلاندىرۋ نەمەسە دايىنداۋ قىلمىس بولىپ سانالادى. مۇنداي ىس-ارەكەت ءۇشىن زاڭدا 7 جىلدان 12 جىلعا دەيىن باس بوستاندىعىنان ايىرۋ جازاسى قاراستىرىلعان.

كوميتەت وكىلدەرى قىسقا جاۋاپ قايىرىپ، “اقپارات نازارعا الىندى، ءتيىستى تەكسەرۋ شارالارى جۇرگىزىلىپ جاتىر” دەپ مالىمدەدى.

ايتا كەتەيىك، كەيىنگى كۇندەرى الەۋمەتتىك جەلىلەردە نۇرلان سابۋروۆتىڭ رەسەيلىك اسكەريلەرگە ماتەريالدىق كومەك كورسەتكەنى جونىندە بەينەجازبالار كەڭىنەن تاراعان ەدى.

سونداي-اق بۇگىن ۋكراينادا ازىلكەشكە قاتىستى قىلمىستىق تەرگەۋ باستالعانى بەلگىلى بولدى.

تەرگەۋ امالدارىن ۋكراينا قاۋىپسىزدىك قىزمەتىجۇرگىزىپ جاتىر. ءىس ۋكراينا قىلمىستىق كودەكسىنىڭ 111-2-بابىنىڭ 1-بولىگى «مەملەكەت-اگرەسسورعا جاردەمدەسۋ» بابى بويىنشا قارالىپ جاتىر.

بۇل تۋرالى ۋكراينالىق زاڭگەر اندرەي پرونين حابارلادى. ونىڭ ايتۋىنشا، تەرگەۋ اياسىندا سابۋروۆتىڭ رەسەيدىڭ قارۋلى قۇرىلىمدارى وكىلدەرىنە ماتەريالدىق قولداۋ كورسەتۋى مۇمكىن دەگەن دەرەكتەر تەكسەرىلىپ جاتىر.

سونىمەن قاتار ۋكراينا بيلىگى ازىرگە ءىستىڭ ناقتى ءمان-جايى مەن ەگجەي-تەگجەيىنە قاتىستى رەسمي اقپارات تاراتقان جوق.