ساراپشىلاردىڭ اتاپ وتكەنىندەي قاڭتار وقيعاسىنان كەيىن جاڭا قازاقستاندا شەكاراداعى قاۋىپسىزدىككە قاتىستى مۇلدە جاڭا كونسەپسيا قابىلدانعان. جىل باسىنان بەرى شەكارا قىزمەتىنە جاڭا تەحنولوگيالار ەنگىزىلىپ جاتىر.

وسىنداي تەحنيكالىق جانە تەحنولوگيالىق قارقىندى جۇمىستاردىڭ ناتيجەسىندە، 2022 جىلى قارۋ-جاراق جانە ءوق-دارى تاسىمالداۋمەن اينالىسقان 203 قىلمىستىق ارەكەتتىڭ جولى كەسىلىپتى.

سونىمەن قاتار، شەكارا بۇزعان توعىز مىڭنان استام قىلمىسكەر قۇرىقتالعان. بۇدان بولەك، 3،5 ميلليارد تەڭگە جانە قۇنى 10 ميلليارد تەڭگەگە پارا-پار تاۋار تاسىمالىنىڭ تامىرى قيىلىپ وتىر.

بۇل تۋرالى ۇقك ءتوراعاسى ەرمەك ساعىمبايەۆ مەملەكەت باسشىسى ق.توقايەۆتىڭ قابىلداۋىندا بولعاندا ايتىلدى. پرەزيدەنتكە ۇقك سالاسىندا جۇرگىزىلىپ جاتقان رەفورمالار جانە جۇيەلى ترانسفورماسيالار، ولاردىڭ ناقتى ناتيجەلەرى تۋرالى باياندالدى.

جىل باسىنان بەرى قازاقستان پرەزيدەنتى بەرگەن تاپسىرمالارىنا بايلانىستى ۇلتتىق قاۋىپسىزدىك كوميتەتىنىڭ قۇرىلىمى كوپ وڭتايلاندىرىلعان بولاتىن. سونىمەن بىرگە، بولىمشەلەردىڭ قىزمەتتەرى مەن مىندەتتەرى، جۇمىستارى مەن جوبالارى ناقتىلاندى.

پرەزيدەنت تاپسىرماسىنا وراي، اسكەري جاتتىعۋ جانە جاۋىنگەرلىك جۇمىلدىرۋ ازىرلىگى قامتاماسىز ەتىلگەنىن دە ەسكەرتە كەتەيىك. ال داعدارىسقا قارسى تۇرۋ ءۇشىن باسقارۋ جۇيەسىنە جاڭا تەحنيكالىق تاسىلدەر ەنگىزىلگەنىن ايتقان دۇرىس.

ۇقك سالاسىنا كۇردەلى رەفورما قاجەت ەكەنى جىل باسىندا اشىق كورىنىس تاپقان جاعداي.

سوندىقتان دا ە.ساعىمبايەۆ: «ق ر تەرروريزمگە قارسى ورتالىعىنىڭ جۇمىسى قايتادان ازىرلەنىپ، لاڭكەستىك قاۋىپ-قاتەرگە قارسى ءىس-قيمىل سالاسىنداعى ۇيلەستىرۋشىلىك ءرولى كۇشەيتىلدى. 2022 جىلدىڭ باسىنان بەرى تەرروريزمگە قارسى ورتالىق مەملەكەتتىك ورگانداردىڭ ارناۋلى كۇشتەرى مەن تەحنيكالىق قۇرالدارىن قوسا وتىرىپ، 400-دەن استام وقۋ-جاتتىعۋ وتكىزگەن بولاتىن» - دەپ اتاپ ءوتتى.

ەرمەك ساعىمبايەۆتىڭ مەملەكەت باسشىسىنا بەرگەن ەسەبىنە سۇيەنسەك، ءبىر جىلدىڭ ىشىندە الدىن الۋ شارالارى ارقىلى زالال كولەمى 900 ملرد تەڭگە بولاتىنداي قىلمىستىق وقيعانىڭ جولى كەسىلىپتى. ودان بولەك، 37 ملرد تەڭگە اقشا قازىناعا قايتارىلعان.

ال ۇلتتىق قاۋىپسىزدىك كوميتەتى ماتەريالدارىنىڭ نەگىزىندە 791 ءتۇرلى قىلمىستىق ءىس اشىلىپ وتىر. ونىڭ 49-ى جۇيەلى تۇردە سىبايلاس جەمقورلىق دەرەكتەرىنىڭ نەگىزىندە قوزعالعانى ايتىلدى.

مەملەكەت باسشىسىنىڭ قابىلداۋىندا، سونداي-اق قازاقستاننىڭ اقپاراتتىق قاۋىپسىزدىگىن قامتاماسىز ەتۋ جۇيەسى تۋرالى دا ايتىلدى.

جاسىراتىنى جوق، سوڭعى ۋاقىتتا بۇل سالا جەتىلدىرىلىپ جاتىر. ماسەلەن، 2022 جىلدىڭ باسىنان بەرى قاراي ۇلتتىق قاۋىپسىزدىك كوميتەتىنىڭ تەحنيكالىق قىزمەتتەرى ينفراقۇرىلىم نىساندارىنا جاسالعان 295 ميلليون كيبەرشابۋىلدىڭ جولىن كەسكەن. ودان بولەك، 2 مىڭ DDoS-شابۋىلدىڭ الدىن الىپتى. بۇل قازاقستان سياقتى مەملەكەت ءۇشىن ۇلكەن جەتىستىك.

       ە.ساعىمبايەۆ قابىلداۋدا قۇقىق قورعاۋ ورگاندارىمەن بىرگە قارۋ-جاراق ىزدەۋ، قوعامعا اسا ءقاۋىپتى ۇيىمداسقان قىلمىستىق توپتار مەن ەسىرتكى قىلمىسكەرلەرىن قۇرىقتاۋ بويىنشا ءارتۇرلى ءىس-شارالاردىڭ جۇرگىزىلىپ جاتقانى ايتىلدى. بۇل دا قىلمىستىق سالادا جاسالعان ناتيجەلى جۇمىستاردىڭ ءبىر پاراسى.

ايتالىق، ارنايى شارالاردىڭ ناتيجەسىندە جىل باسىنان بەرى 900 كەلىدەن استام ەسىرتكى تاركىلەنگەن. ودان بولەك، 11 توننا پرەكۋرسورلار، 16 ەسىرتكى زەرتحاناسى تالقاندالىپتى. تاعى دا 24 حالىقارالىق جانە 45 وڭىرلىك ەسىرتكى ارناسىنىڭ كوزى جويىلعان. وسى قىلمىستارمەن بىرگە زاڭسىز اينالىمدا جۇرگەن 773 قارۋ-جاراق، 20 مىڭنان استام ءوق-دارى تاركىلەنىپ، كوپتەگەن قىلمىستىڭ الدىن العان. توقايەۆقا وسىنداي ناقتى جۇمىستار بويىنشا ايتىلدى.

قازاقستان پرەزيدەنتىنىڭ قابىلداۋىندا بولعان ەرمەك ساعىمبايەۆقا ءبىرقاتار ناقتى تاپسىرمالار جۇكتەلدى. ونىڭ ىشىندە ۇقك ورگاندارى قىزمەتىنىڭ باعىتتارى مەن نەگىزگى سىن-قاتەرلەرىن ەسكەرۋ جاعى بار.