Unico Play ونلاين-كينوتەاترى Shabyt Lab اتتى جاڭا فورماتتاعى سەنارييلەر پيچينگى جوباسىن ىسكە قوسادى. بۇل قىسقامەتراجدى فيلمدەرگە ارنالعان بايقاۋ عانا ەمەس، قاتىسۋشىلاردىڭ يدەيادان باستاپ دايىن فيلمگە دەيىنگى جولدى تاجىريبەلى مەنتورمەن بىرگە وتەتىن شىعارماشىلىق زەرتحانا، – دەپ حابارلايدى Dalanews.kz
جوبانىڭ باستى ەرەكشەلىگى — كاسىبي رەجيسسەرلەر، پروديۋسەرلەر مەن وپەراتورلاردىڭ جاس اۆتورلارمەن بىرلەسىپ جۇمىس ىستەۋى. ولار ءوز تاجىريبەسىمەن ءبولىسىپ، جاڭا ەسىمدەرگە قولداۋ كورسەتەدى. مەنتورلار قاتارىندا: انارا جۋنۋسوۆا (CEO Uni-Q، پروديۋسەر؛ "مالاي"، "پريگوۆور"، "ءچورنىي دۆور")، اديلحان ەرجانوۆ (رەجيسسەر، سەناريست؛ "ءچورنىي، ءچورنىي چەلوۆەك"، "گولياف"، "دالا قاسقىرى")، قۋانىش بەيسەك (رەجيسسەر، پروديۋسەر؛ "ءداستۇر")، ايجان قاسىمبەك (رەجيسسەر، سەناريست؛ "مادينا"، "وت")، ايتورە جولداسقالي (رەجيسسەر؛ "Sheker"، "SHULAMAH")، ەركەبۋلان كۋريشبايەۆ (Qara ستۋدياسىنىڭ باس پروديۋسەرى؛ "OYU"، "قاش"، "زەرە")، ەركينبەك پتىرالييەۆ (كينووپەراتور؛ "ءجولتايا كوشكا"، "دالا قاسقىرى"، "كادەت") جانە دارحان تۋلەگەنوۆ (رەجيسسەر، سەناريست؛ "براتيا"، "Sheker. پوسلەدنيي شانس").
ءار مەنتور وزىنە ۇناعان ءبىر سەنارييدى تاڭدايدى. سول ساتتەن باستاپ شىعارماشىلىق سەرىكتەستىك باستالادى. قاتىسۋشىلار سەناريي جازۋدان باستاپ ءتۇسىرىلىم مەن مونتاجعا دەيىنگى بۇكىل پروسەستى مەنتورلارمەن جانە Unico Play شىعارماشىلىق توبىمەن بىرگە وتەدى. سونداي-اق جوبا اياسىندا كينو سالاسىنىڭ ءتۇرلى باعىتتارى بويىنشا: سەنارييدەن باستاپ ءفيلمدى ەكرانعا شىعارۋ تاقىرىپتارىن قامتيتىن ماستەر-كلاسستار وتەدى. بۇل كەزدەسۋلەر ءبىر Shabyt Lab-تىڭ سەرىكتەسى Sham شىعارماشىلىق مەكتەبىنىڭ الاڭىندا ۇيىمداستىرىلادى.
وتىنىمدەر 2025 جىلدىڭ 30 مامىرى مەن 15 شىلدەسى ارالىعىندا shabytlab.unicoplay.com سايتىندا قابىلدانادى. بايقاۋعا 16 جاستان اسقان قازاقستان ازاماتتارى قاتىسا الادى. كينو سالاسىندا تاجىريبە مىندەتتى ەمەس — ناقتى يدەيا، 5–12 مينۋتتىق سەناريي جانە شىنايى ىنتا جەتكىلىكتى. تۋىندىلار كەيىپكەرلەر سانى از، لوكاسيالار قولجەتىمدى، ءتۇسىرىلىم 1–3 كۇندە جۇزەگە اسۋى ءتيىس. سەنارييلەر قازاق، ورىس جانە اعىلشىن تىلدەرىندە قابىلدانادى.
جوبا جەلتوقساندا قاتىسۋشىلار تۇسىرگەن فيلمدەردىڭ جابىق كورسەتىلىمىمەن اياقتالادى. ەڭ ۇزدىك جۇمىستار حالىقارالىق كينوفەستيۆالدەرگە قاتىسۋ مۇمكىندىگىنە يە بولادى.
«Shabyt Lab — بۇل جاي عانا بايقاۋ ەمەس. بۇل — تاجىريبە مەن شابىتتىڭ توعىساتىن ورنى. بۇل جوبانى قولعا الۋىمنىڭ سەبەبى — يندۋستريادا بىرىگۋدىڭ، قولداۋدىڭ ماڭىزى زور ەكەنىنە سەنەمىن. ءبىز بۇل جوبانى جاڭا ەسىمدەرگە جول اشۋ ءۇشىن جاساپ وتىرمىز. يندۋستريا دامۋى ءۇشىن دارىندارعا مۇمكىندىكتەر جاساۋىمىز كەرەك»، — دەيدى Uni-Q كومپانياسىنىڭ سEO-سى انارا جۋنۋسوۆا.
«انار مەنتور بولۋدى ۇسىنعاندا، بۇل ۇسىنىستى قابىلداماسقا بولمايتىنىن ءتۇسىندىم. دەبيۋتانتپەن بىرگە يدەيادان دايىن فيلمگە دەيىنگى جولدان ءوتۋ قىزىق تاجىريبە. بۇل ءوزىم ءۇشىن دە پروديۋسەر رەتىندە ءبىر سىناق. ءبىز كينوعا شىنىمەن عاشىق، تىڭ يدەياسى بار اۆتورلاردى تابامىز دەپ ويلايمىن»، — دەيدى اديلحان ەرجانوۆ.
«مەن قاتىسۋشىلاردان ەرەكشە كوزقاراس كۇتەمىن. كەيدە سولاردىڭ ەنەرگياسىنان ءوزىڭ دە شابىت الاسىڭ. ەگەر بىرەۋدىڭ جولى وسى جوبامەن باستالسا — بۇل ەڭ جاقسى ناتيجە»، — دەيدى قۋانىش بەيسەك.
«جوبا تۋرالى العاش بىلگەندە، ويىما كەلگەنى — قاتىسۋشىلاردىڭ جولى بولدى! ويتكەنى مەن ءوزىم كەزىندە ءبارىن جالعىز ىستەدىم. ءقازىر سول تاجىريبەنى بولىسۋگە دايىنمىن. باتىل، جارقىن، يدەياسىنا شىن سەنەتىن رەجيسسەرلەردى كۇتەمىن»، — دەيدى ايجان قاسىمبەك.
«Shabyt Lab — بۇل جاڭا ەسىمدەردى اشاتىن ناقتى مۇمكىندىك. مەن شىنايى ءارى كوپشىلىككە تۇسىنىكتى كينو تۇسىرگىسى كەلەتىن جاس ماماندارمەن جۇمىس ىستەگىم كەلەدى، مەلودراما جانرىنداعى فيلم تۇسىرگىم كەلەدى. بۇل جوبانىڭ باستى ارتىقشىلىعى — جالعىز جۇرگەندە كوپ ۋاقىت الاتىن جولدى قىسقارتا الاتىنىندا»، — دەيدى ەركەبۋلان كۋريشبايەۆ.
Shabyt Lab — كينو الەمىنە العاشقى ناقتى قادامىڭىزدى سەنىمدى ورتادا، تاجىريبەلى ماماندارمەن بىرگە باستاۋعا ارنالعان مۇمكىندىك.
جاڭالىقتار مەن بارلىق جاڭارتۋلاردى shabytlab.unicoplay.com سايتىنان وقىپ وتىرىڭىز.
