بيىل قازاقستاننىڭ ۇلتتىق قور اكتيۆتەرى ايتارلىقتاي قىسقارۋى مۇمكىن. "جىعىلعانعا جۇدىرىق" دەمەكشى،مۇناي باعاسى قۇلدىراپ جاتقاندا بيىل قازاقستان مەملەكەتتىك قارىزدار بويىنشا قوماقتى كولەمدە تولەمدەر جاساۋدا. بۇل تۋرالى قازاقستان قارجىگەرلەرى قاۋىمداستىعى مالىمدەدى، دەپ حابارلايدى Dalanews.kz.

"ساۋدا سوعىسى شيەلەنىسكەنگە دەيىن قورعا تۇسكەن سالىق تۇسىمدەرىنىڭ 47%-عا قىسقارۋىنىڭ ءوزى ونداعى اكتيۆتەردىڭ بيىلعى جىلى ايتارلىقتاي تايازداۋىنا اكەلىپ سوقتىرۋى مۇمكىن. ۇلتتىق قورعا 2025 جىلى I-توقساندا نەبارى 622 ملرد تەڭگە كىرىس ءتۇستى، ال اعىمداعى جىلعا ۇكىمەت قوردان 5،25 ترلن تەڭگەنى الۋدى جوسپارلاپ وتىر. بۇل ورتا مەرزىمدى پەرسپەكتيۆادا قور اكتيۆتەرىنىڭ ەداۋىر بولىگىنىڭ سارقىلۋ ءقاۋپىن ارتتىرادى"، دەلىنگەن حابارلامادا.  

مۇنايدىڭ ارزانداۋى، سونداي-اق بيىلعى جىلى 37،2 ترلن تەڭگەگە دەيىن ءوسىپ، ءجىوء-نىڭ 24،7% -ىن قۇراۋى مۇمكىن مەملەكەتتىك قارىز بويىنشا قىزمەت پەن وتەم تولەمدەرى شىعىندارىنىڭ ءوسۋى دە جاعدايدى ۋشىقتىرا تۇسۋدە.                     

"بۇل كورسەتكىش، ازىرگە حالىقارالىق ستاندارتتار بويىنشا قالىپتى دەڭگەيدە بولىپ سانالادى، دەگەنمەن قارىز بويىنشا قىزمەت قۇنى بيۋدجەتتىك جۇيە ءۇشىن پروپورسيونالدى بولماي تۇر، ياعني وسى جاعدايعا بايلانىستى الەۋمەتتىك جانە ينۆەستيسيالىق شىعىندار كەڭىستىگى شەكتەلۋدە. ماسەلەن، ءجىو-ءنىڭ 24%-ى دەڭگەيىندەگى مەملەكەتتىك قارىز سىياقىلارى تولەمى بويىنشا وتكەن جىلى رەسپۋبليكالىق بيۋدجەتتەن 2،2 ترلن تەڭگە ءبولىندى نەمەسە ول بارلىق شىعىستاردىڭ 9،3%-ىن قۇرادى. سالىستىرا كەتسەك، اقش-تا ءجىو-ءنىڭ 123%-ى دەڭگەيىندەگى مەملەكەتتىك قارىزىنىڭ سىياقىلارى بويىنشا تولەمدەر 1،1 ترلن دوللاردى نەمەسە جالپى شىعىستاردىڭ 15،6%-ىن عانا قۇرايدى"، - دەيدى قارجى نارىعىنىڭ ساراپشىلارى مەملەكەتتىك قارىز اقشانىڭ قىمباتقا ءتۇسىپ جاتقانىن مەڭزەپ.

ساراپشىلاردىڭ پىكىرىنشە، ءقازىر قازاقستان ءۇشىن بيۋدجەتتىك ەرەجەلەردى ۇستانۋ ءتارتىبىن ساقتاۋ، سونداي-اق مەملەكەتتىك شىعىستاردىڭ تيىمدىلىگىن ارتتىرۋ، كولەڭكەلى ەكونوميكانى قىسقارتۋ، جەكەلەگەن مەملەكەتتىك اكتيۆتەردى جەكەشەلەندىرۋدى جەدەلدەتۋ جانە مەملەكەتتىك اكتيۆتەردى ساپالى باسقارۋدى قامتاماسىز ەتۋ وتە ماڭىزدى.