ۇلتتىق ەكونوميكا ءمينيسترى نۇرلان بايبازاروۆ ءماجىلىس دالىزىندە جۋرناليستەرگە بەرگەن سۇقباتىندا تەڭگە باعامىنا قاتىستى تۇسىنىكتەمە بەردى، دەپ حابارلايدى Dalanews.kz.
نۇرلان بايبازاروۆ اتاپ وتكەندەي، تەڭگە باعامىنا نارىقتىق فاكتورلار اسەر ەتۋدە. قازىرگى ۋاقىتتا شەتەل ۆاليۋتاسىنا سۇرانىس كۇرت ارتقان، ويتكەنى ەكونوميكادا جوبالار جۇزەگە اسىرىلۋدا جانە جالپى ەل دامۋ ۇستىندە، حالىق تا دوللار مەن ەۆرونى كوپتەپ ساتىپ الىپ جاتىر.
"توعىز ايدىڭ قورىتىندىسى بويىنشا دوللاردىڭ ورتاشا باعامى 460 تەڭگەدەن ءسال استى، ياعني ءبىز 460 بولادى دەپ جوسپارلاعانىمىزداي، ءقازىر باعام وسى دالىزدە قالىپتاسقان. تەڭگە باعامى قۇبىلمالى، ءبىراق ورتاشا باعام ساقتالىپ تۇر. جىل سوڭىنا دەيىن ءبىزدىڭ ءالى دە مۇمكىندىكتەرىمىز بار (تەڭگەنى نىعايتۋ بويىنشا)، ەرتەڭ - قاراشا ايىندا سالىق كەزەڭى باستالادى، ءبىزدىڭ ءىرى ەكسپورتتاۋشىلارىمىز سالىق تولەي باستايدى. مەنىڭ ويىمشا، ولار ۆاليۋتا ايىرباسى ارقىلى سالىق تولەيدى. ونىڭ ۇستىنە ۇلتتىق قوردان الىناتىن ترانسفەرتتەر ءالى دە بار. ۇلتتىق بانك كونۆەرتتەۋدى جۇرگىزەدى"، - دەدى نۇرلان بايبازاروۆ.
وسىلايشا ول جىل سوڭىنا دەيىن تەڭگە قاتتى قۇنسىزدانبايتىنىن انىق اڭعارتتى.
بۇعان دەيىن دوللار نەگە قىمباتتاپ جاتقانىنا قاتىستى ۇلتتىق بانك باسشىسىنىڭ بەرگەن تۇسىنىكتەمەسىن جازعان بولاتىنبىز.
