2025 جىلى "ۇلتتىق قور — بالالارعا" جوباسى بويىنشا كامەلەتكە تولماعان ەل تۇرعىندارىنىڭ ارنايى شوتتارىنا 2024 جىلعا قاراعاندا كوبىرەك قاراجات اۋدارىلادى. بۇل تۋرالى ۇلتتىق بانك ءتوراعاسىنىڭ ورىنباسارى ءاليا مولدابەكوۆا ايتتى، دەپ حابارلايدى Dalanews.kz.
ۇسىنىلعان مالىمەتتەرگە سايكەس، ۇلتتىق قوردى باسقارۋدان بيىلعى جىلدىڭ 10 ايىندا ۇلتتىق بانك 5،3 ملرد دوللار تابىس تاپقان.
"اۋدارىمدار قاڭتار ايىندا جۇرگىزىلەدى. وتكەن جىلى ءبىز ءار بالاعا شامامەن 100 دوللاردان اۋداردىق. 2023 جانە 2024 جىلدار ينۆەستيسيالىق تابىس تۇرعىسىنان وتە تابىستى بولدى. سوندىقتان جىلجىمالى ورتاشا ءمان وسەدى. كەلەسى جىلدىڭ قاڭتار ايىندا بۇل رەتتەگى سوما كوبىرەك بولادى"، - دەدى ءاليا مولدابەكوۆا ۇلتتىق بانكتە وتكەن بريفينگتە.
بۇل رەتتەگى سوما سيفرىن ۇلتتىق بانك ناقتىلامادى، ءبىراق تولەمدەر 2025 جىلعى قاڭتارداعى جاعداي بويىنشا بالالاردىڭ سانىنا بايلانىستى بولاتىنىن جەتكىزدى.
اتالعان باعدارلاما بويىنشا ۇلتتىق قوردىڭ ينۆەستيسيالىق تابىسىنىڭ 50%-ى جىل سايىن 18 جاسقا دەيىنگى بالالار سانىنا تەڭدەي بولىنەدى. 2024 جىلى 18 جاسقا تولماعان ازاماتتاردىڭ ءارقايسىسىنا 100،52 دوللاردان اقشا اۋدارىلدى.
