تۇركىستان وبلىسىنىڭ اكىمى جانسەيىت تۇيمەبايەۆ وبلىستىق، اۋداندىق، قالالىق ءماسليحات دەپۋتاتتارىمەن جانە ىسكەر ازاماتتارمەن كەزدەسىپ، وبلىس ورتالىعى – تۇركىستان قالاسىن دامىتۋعا جاسالعان جوبالاردىڭ بارىسىمەن تانىستىردى.

ءوڭىر باسشىسى ەلباسىنىڭ تۇركىستاندى تۇلەتۋگە اسا نازار اۋدارىپ، وعان رەسپۋبليكالىق بيۋدجەتتەن بولەك، ەلىمىزدىڭ وزگە وڭىرلەرىن، ۇلتتىق كومپانيالار مەن بيزنەس وكىلدەرىن اتسالىسۋعا شاقىرعانىن اتاپ ءوتتى.

بولاشاقتا قازاقستاننىڭ عانا ەمەس، بۇكىل تۇركى جۇرتىنىڭ رۋحاني-مادەني ورتالىعىنا اينالۋى ءتيىس تۇركىستاننىڭ ەسكى جانە جاڭا كەلبەتىنەن حالىق قالاۋلىلارىنا فيلم كورسەتىلىپ، ىسكەر ازاماتتاردى شاھاردى كوركەيتۋدە ءتۇرلى الەۋمەتتىك نىساندار مەن ويىن-ساۋىق ورتالىقتارى سىندى حالىققا قاجەتتى عيماراتتى سالۋعا شاقىردى.

– تۇركىستان قالاسىنىڭ تۋريستىك الەۋەتى وتە جوعارى. وتكەن جىلى 1 ميلليوننان استام تۋريست كەلگەن بولسا الداعى ۋاقىتتا ولاردىڭ سانىن كوبەيتۋ كوزدەلىپ وتىر. وسى ماقساتتا قالاعا جاڭا اۋەجاي، تەمىر جول ۆوكزالى مەن اۆتوۆوكزال، سەرۆيستىك قىزمەت كورسەتەتىن الەۋمەتتىك مادەني نىساندار سالىپ، ولارعا قاجەتتى ينجەنەرلىك ينفراقۇرىلىمدى جۇرگىزۋ جوسپارلانۋدا.

اتاپ ايتار بولسام، جاڭا اكىمشىلىك-ىسكەرلىك ورتالىعىندا اكىمشىلىك عيماراتى، باسقارمالارا مەن دەپارتامەنتتەر ءۇيى، دراما تەاترى، كونگرەسس-حولل، فيلارمونيا، كىتاپحانا، مادەنيەت سارايى، 500 ورىندىق مەشىت، سپورت كەشەنى، ستاديون، ءجۇزۋ باسسەينى، نازاربايەۆ زياتكەرلىك مەكتەبى، ساياباقتار، كوپقاباتتى تۇرعىن ۇيلەر، مەكتەپتەر، بالا-باقشالار، كورمە ورتالىعى، مۇراجاي، وپەرا جانە بالەت تەاترى، اسسامبلەيا عيماراتى، دەنساۋلىق ساقتاۋ نىساندارى جانە ت.ب. الەۋمەتتىك-مادەني نىساندار قۇرىلىستارى مەن ولارعا قاجەتتى ينفراقۇرىلىمدار جۇرگىزۋىمىز قاجەت، – دەدى ج.تۇيمەبايەۆ.

جاڭا قارقىنمەن، جاڭا كۇشپەن جۇمىس باستاۋعا قۇلشىنىس بىلدىرگەن جيىنعا قاتىسۋشىلار ايماق باسشىسىن ءبىراۋىزدان قولدادى. حالىق قالاۋلىلارىنىڭ اتىنان ءسوز العان وبلىستىق ءماسليحات حاتشىسى قايرات بالابييەۆ مەملەكەت باسشىسىنىڭ 26 جىل بويى كاسىپكەرلەرگە جاردەم كورسەتىپ كەلگەنىن، ەندىگى كەزەكتە، ىسكەر كاسىپكەرلەردىڭ ەلگە، مەملەكەتكە قىزمەت ەتەتىن ۋاقىتى كەلگەنىن ايتىپ ءوتتى.

جيىندا بەلگىلى بولعانداي، جاڭا وبلىس ورتالىعى – تۇركىستاندا بەلگىلى كاسىپكەر، وبلىستىق ءماسليحات دەپۋتاتى سەرىكجان سەيىتجانوۆ «Rixos» بەس جۇلدىزدى قوناق ءۇيى سياقتى مەيمانحانا سالۋدى باستاپ كەتسە، تۇرىكتىڭ ىسكەر ازاماتى دا بەس جۇلدىزدى ەكىنشى قوناق ءۇيدى تۇرعىزۋدىڭ جوباسىن ءتۇزىپ قويعان.

ال وبلىستىق ءماسليحاتتىڭ حاتشىسى، كاسىپكەر قايرات بالابييەۆ سپورت فيتنەس ورتالىعىن سالۋدى ۇيعارىپ قويعان. مۇنان بولەك، ءبىرقاتار ىسكەر ازاماتتار وزگە دە الەۋمەتتىك، مادەني نىسانداردى سالۋعا نيەتتەنىپ وتىر.

 

تۇركىستان وبلىسى اكىمىنىڭ باسپا ءسوز قىزمەتى