نۇر-سۇلتان قالاسى اكىمدىگىنىڭ تىلدەردى دامىتۋ جانە ارحيۆ ءىسى باسقارماسى، «رۋحانيات» كوممۋنالدىق مەملەكەتتىك مەكەمەسى 31 قازان كۇنى ساعات 16:00-دە وقۋشىلار سارايىندا «رۋحاني جاڭعىرۋ» باعدارلاماسى اياسىندا، الاش قايراتكەرلەرى، ۇلت اعارتۋشىلارى سۇلتانبەك قوجان ۇلى، حايرەتدين بولعانباي، اسىلبەك سەيىت، تەلجان شونان ۇلىنىڭ 125 جىلدىعىنا ارنالعان «ۇلىلىققا تاعزىم» تاريحي-تانىمدىق ءىس-شاراسىن وتكىزەدى.
شارانىڭ ماقساتى ۇلت مۇراتى جولىندا ولشەۋسىز ەڭبەك ەتكەن الاش ارداقتىلارى hءام تاريحي ءىرى تۇلعالاردىڭ ەسىمىن، ەڭبەگىن ۇلىقتاۋ، سول ارقىلى جاس ۇرپاقتى ۇلتىن، ءتىلىن، تاريحىن قۇرمەتتەۋگە تاربيەلەۋ، تانىم كوكجيەگىن كەڭەيتۋ.
ۇلىلاردىڭ قايراتكەرلىگىن، مۇرالارىن كوپشىلىك قاۋىمعا ناسيحاتتاۋ ەلوردا جاستارىنىڭ ءبىلىمىن شىڭداۋ ءارى رۋحاني قۋاتىن ارتتىراتىن بولادى.
تاريحي-تانىمدىق ءىس-شارا بارىسىندا الاشتىڭ اياۋلى ازاماتتارى تۋرالى بەينەسيۋجەتتەر كورسەتىلەدى، ۇلت تۇلعالارىن، تاريحي جولىن زەرتتەۋشى عالىمدار وي-پىكىرلەرىن ورتاعا سالادى، تەاترلاندىرىلعان باعدارلاما ۇسىنىلماقشى.
سونداي-اق، قايراتكەرلەردىڭ ۇرپاقتارى، تۋىسقاندارى اتالعان شاراعا ارنايى شاقىرىلعان.
