ۇلىبريتانيادا كورول كارل IIIء-نىڭ ءىنىسى، بۇرىنعى حانزادا ەندريۋ ماۋنتبەتتەن-ۆيندزور ۇستالدى، دەپ حابارلايدى Dalanews.kz BBC-گە سىلتەمە جاساپ.
پوليسيا ەندريۋدى مەملەكەتتىك لاۋازىمداردا جۇرگەن كەزەڭىندە قىزمەتىن اسىرا پايدالاندى دەگەن كۇدىكپەن قاماۋعا العان. شاعىمدا بۇرىنعى حانزادا امەريكالىق قارجىگەر دجەففري ەپشتەينگە قۇپيا ماتەريالدار بەرگەن بولۋى مۇمكىن ەكەنى ايتىلادى.
اقش-تا جاريالانعان قۇجاتتارعا سايكەس، ەندريۋ ەپشتەينگە سينگاپۋر، گونكونگ جانە ۆەتنامعا جاساعان ساپارلارى تۋرالى ەسەپتەردى، سونداي-اق ينۆەستيسيالىق مۇمكىندىكتەرگە قاتىستى مالىمەتتەردى جولداپ وتىرعان دەگەن دەرەك بار.
ەسكە سالايىق، اقش-تىڭ باس پروكۋرورى پەم بوندي كامەلەتكە تولماعانداردى جىنىستىق قاناۋعا قاتىستى ايىپ تاعىلعان قارجىگەر دجەففري ەپشتەين ءىسى بويىنشا ماتەريالداردا اتالعان 300 تانىمال ادام مەن ساياساتكەردىڭ ءاتى-جونى كورسەتىلگەن ءتىزىمدى جاريالادى. ءتيىستى حات اقش كونگرەسىنىڭ باسشىلىعىنا جولدانعان.
