قازاقستان ۇلتتىق بانكى 2025 جىلعى 9 مامىردا ۇلى جەڭىستىڭ 80 جىلدىعىنا ارناپ نومينالى 1 000 تەڭگەلىك مەرەيتويلىق بانكنوتانى اينالىمعا شىعارادى. ايتا كەتسەك، بانكنوتالاردىڭ تارالىمى 5 ميلليون دانامەن شەكتەلگەن، دەپ حابارلايدى Dalanews.kz.

"9 مامىر – بۇكىل الەم ءۇشىن ايتۋلى كۇن. قازاقستان جەڭىسكە قوماقتى ۇلەس قوستى. رەسپۋبليكادان 1،2 ميلليونعا جۋىق ادام مايدانعا جۇمىلدىرىلدى، بۇل سول كەزدەگى جالپى حالىقتىڭ شامامەن – 20%-ى. وتانداستارىمىز جاياۋ اسكەردە، تانك بولىمشەلەرىندە، اۆياسيا مەن فلوتتا ەرلىكپەن شايقاستى. قاھارمان وتانداستارىمىزدىڭ ەرلىگىنە قۇرمەت تانىتۋ ءۇشىن ۇلتتىق بانك ۇلتتىق ۆاليۋتادا مەرەيتويلىق بانكنوتانى اينالىمعا شىعارعالى وتىر"، دەلىنگەن حابارلامادا.

بانكنوتالاردىڭ ءتۇسى – قوڭىر-سارعىلت. وندا وتان ءۇشىن جان قيعان باتىرلارعا كورسەتىلگەن قۇرمەت بەلگىسى – 28 گۆاردياشى-پانفيلوۆشىلار اتىنداعى ساياباقتا ورنالاسقان داڭق مەموريالى بەينەلەنگەن. سونداي-اق ماڭگىلىك الاۋ مەن ۇشىپ بارا جاتقان تىرنالار كورىنەدى. تىرنالار سيلۋەتى – جاقسىلىق پەن ءۇمىتتىڭ بەينەسى – ءومىردى سۋرەتتەيدى.

ەكىنشى بەتىندە تاريحي مۇراعاتتىق فوتوسۋرەتتەردىڭ ۇزىندىلەرىمەن بىرگە قازاقستان كارتاسى بەينەلەنگەن. سونداي-اق ەرلىك، تاباندىلىق پەن باتىرلىقتىڭ سيمۆولى رەتىندە وتان سوعىسى وردەنى بەينەلەنگەن. سۋرەتتەردى قازاقستان رەسپۋبليكاسى مادەنيەت جانە اقپارات مينيسترلىگى ارحيۆ، قۇجاتتاما جانە كىتاپ كوميتەتىنىڭ "ورتالىق مەملەكەتتىك كينو-فوتو قۇجاتتار جانە دىبىس جازبالارى ءارحيۆى" رمم ۇسىنعانى ناقتىلانادى.