Qazaqstan Ulttyq Banki 2025 jylǵy 9 mamyrda Uly Jeńistiń 80 jyldyǵyna arnap nominaly 1 000 teńgelik mereitoilyq banknotany ainalymǵa shyǵarady. Aita ketsek, banknotalardyń taralymy 5 million danamen shektelgen, dep habarlaidy Dalanews.kz.
"9 mamyr – búkil álem úshin aitýly kún. Qazaqstan Jeńiske qomaqty úles qosty. Respýblikadan 1,2 millionǵa jýyq adam maidanǵa jumyldyryldy, bul sol kezdegi jalpy halyqtyń shamamen – 20%-y. Otandastarymyz jaiaý áskerde, tank bólimshelerinde, aviatsiia men flotta erlikpen shaiqasty. Qaharman otandastarymyzdyń erligine qurmet tanytý úshin Ulttyq Bank ulttyq valiýtada mereitoilyq banknotany ainalymǵa shyǵarǵaly otyr", delingen habarlamada.
Banknotalardyń túsi – qońyr-sarǵylt. Onda Otan úshin jan qiǵan batyrlarǵa kórsetilgen qurmet belgisi – 28 gvardiiashy-panfilovshylar atyndaǵy saiabaqta ornalasqan Dańq memorialy beinelengen. Sondai-aq máńgilik alaý men ushyp bara jatqan tyrnalar kórinedi. Tyrnalar silýeti – jaqsylyq pen úmittiń beinesi – ómirdi sýretteidi.
Ekinshi betinde tarihi muraǵattyq fotosýretterdiń úzindilerimen birge Qazaqstan kartasy beinelengen. Sondai-aq erlik, tabandylyq pen batyrlyqtyń simvoly retinde Otan soǵysy ordeni beinelengen. Sýretterdi Qazaqstan Respýblikasy Mádeniet jáne aqparat ministrligi Arhiv, qujattama jáne kitap komitetiniń "Ortalyq memlekettik kino-foto qujattar jáne dybys jazbalary arhivi" RMM usynǵany naqtylanady.
