ۇلى ابايدىڭ تۋعان كۇنىنە ورايلاستىرىلعان شارا اباي اتىن يەمدەنگەن قارا شاڭىراقتىڭ باس عيماراتىنىڭ الدىنداعى حاكىم ەسكەرتكىشىنە گۇل شوعىن قويۋ راسىمىمەن باستالىپ، «ابايتانۋ» مۇراجايىندا عۇلاما اقىننىڭ رۋحىنا تاعزىم جاسالدى. ودان ءارى شارا «اباي – دانا، اباي – دارا» اتتى كەڭەيتىلگەن دوڭگەلەك ۇستەلگە ۇلاستى. دوڭگەلەك ۇستەل جۇمىسىن ۋنيۆەرسيتەتىمىزدىڭ تاربيە ءىسى جونىندەگى پرورەكتورى جاناتبەك ىشپەكبايەۆ اشىپ، ءسوز كەزەگىن «حاكىم اباي» عىلىمي-زەرتتەۋ ورتالىعىنىڭ ديرەكتورى جابال شويىنبەتكە بەردى. اباي الەمىن تەرەڭىنەن زەرتتەپ، زەردەلەپ جۇرگەن عالىم-ۇستاز ءوز سوزىندە جۋىردا عانا ابايدىڭ «جيدەباي-بورىلى» مەملەكەتتىك قورىق-مۋزەيىنە جاساعان ساياحاتى بارىسىندا العان اسەرىمەن ءبولىسىپ، ءالى دە بولسا زەرتتەلۋدى قاجەت ەتەتىن تاريحي جادىگەرلەر مەن ادەبي قۇندىلىقتار تۋرالى مازمۇندى اڭگىمە ءوربىتتى.
ءوز كەزەگىندە ۋنيۆەرسيتەتىمىزدىڭ بەلسەندى جاستارى حاكىمنىڭ مۇرالارىن ناسيحاتتاۋ ماقساتىندا قارا شاڭىراعىمىزدا اتقارىلىپ جاتقان تاعلىمى مەن ءتالىمى مول يگى شارالارعا توقتالا كەلە، ۇلى اقىننىڭ مۇراسىن اۋقىمى كەڭ جوبالار ارقىلى دۇنيەجۇزىنە تانىتۋ بويىنشا ۇسىنىستارىن ءبىلدىردى.
شارا قورىتىندىسىندا بەلسەندى جاستارىمىز ۋنيۆەرسيتەتىمىزدىڭ قۇرىلىمدىق بولىمشەلەرىندە «ابايدى وقى، تاڭىرقا...» اتتى اكسياسىن وتكىزىپ، «اباي ايتادى...» اتتى اقپاراتتى كىتاپشالارىن تاراتتى.
قازىنا بەكبەنبەتوۆا
