ۋكراينا پرەزيدەنتى ۆلاديمير زەلەنسكيي تاياۋ شىعىس ەلدەرىنە دروندارعا قارسى كۇرەس تاجىريبەسىن بولىسۋگە دايىن ەكەنىن ايتتى. الايدا بۇل كومەك تەگىن بولمايدى. كييەۆ مۇنداي قولداۋ ءۇشىن قارجى مەن جاڭا تەحنولوگيالار العىسى كەلەدى، دەپ حابارلايدى Dalanews.kz.
زەلەنسكييدىڭ ايتۋىنشا، ۋكراينا بىرنەشە ساراپشى توبىن تاياۋ شىعىسقا جىبەرگەن. ماماندار قاتار، بىرىككەن اراب امىرلىكتەرى، ساۋد ارابياسى جانە يوردانياداعى امەريكالىق اسكەري بازاعا بارىپ، دروندارعا قارسى جۇيەلەردىڭ جۇمىسىن تانىستىرىپ، كەڭەس بەرىپ جاتىر.
ۋكراينا پرەزيدەنتى اتالعان ميسسيالاردىڭ تەك كەڭەس بەرۋ دەڭگەيىندە ەكەنىن ەرەكشە اتاپ ءوتتى.
"ءبىز ەشقانداي اسكەري وپەراسياعا قاتىسىپ جاتقان جوقپىز. ۋكراينا يرانمەن سوعىسىپ جاتقان جوق"، – دەدى ول.
زەلەنسكييدىڭ ايتۋىنشا، مۇنداي تاجىريبەگە اقش، ەۋروپا، تاياۋ شىعىس جانە افريكا ەلدەرى قىزىعۋشىلىق تانىتىپ وتىر.
سونىمەن قاتار ۋكراينا اقش-پەن ۇشقىشسىز اپپاراتتارعا قاتىستى ءىرى كەلىسىم جاساۋدى كوزدەپ وتىر. زەلەنسكيي بۇل كەلىسىمنىڭ كولەمى شامامەن 35–50 ميلليارد دوللار بولۋى مۇمكىن ەكەنىن جەتكىزدى.
