ۋكراينانىڭ باس پروكۋراتۋراسى رەسەيدىڭ قورعانىس ءمينيسترى سەرگەي شويگۋعا جانە تاعى 17 جوعارى لاۋازىمدى رەسەيلىك شەنەۋنىككە ىزدەۋ جاريالادى. ولارعا ەل بەيبىتشىلىگىنىڭ، قوعامدىق ءتارتىپتىڭ، ۇلتتىق قاۋىپسىزدىگىنىڭ نەگىزدەرىنە قارسى اۋىر قىلمىس جاساعان دەگەن ايىپتار تاعىلدى. بۇل تۋرالى باس پروكۋرور يۋريي لۋسەنكو مالىمدەدى.
ونىڭ ايتۋىنشا، شەنەۋنىكتەردىڭ ارەكەتى ەكى مىڭنان استام ۋكراينالىق ساربازدىڭ ولىمىنە اكەپ سوقتىردى، سولاردىڭ كەسىرىنەن سەگىز مىڭ جاۋىنگەر جارالاندى، بۇعان قوسا شامامەن 50 ملرد دوللاردىڭ مۇلكى مەن تەحنيكاسى جويىلدى. لۋسەنكونىڭ حابارلاۋىنشا، پروكۋراتۋرا ءقازىر رەسەي پرەزيدەنتى ۆلاديمير پۋتين مەن پرەمەر-مينيسترى دميتريي مەدۆەديەۆكە ايىپتار ازىرلەپ جاتىر.
باسپا ءسوز كونفەرەنسياسىندا رەسەي پرەزيدەنتىنىڭ كومەكشىسى سەرگەي گلازيەۆ پەن رەسەيلىك دۋما دەپۋتاتى كونستانتين ءزاتۋليننىڭ تەلەفون اڭگىمەلەرىنىڭ جازباسى تىڭداتىلدى. شەنەۋنىكتەر ودەسسا مەن حاركوۆتەگى جاپپاي تارتىپسىزدىكتى ۇيىمداستىرۋ جانە قارجىلاندىرۋ ماسەلەلەرىن تالقىلاعان. تەرگەۋ وكىلدەرى ساراپتامانىڭ اۋديوتاسپادا گلازيەۆ پەن ءزاتۋليننىڭ داۋىستارى ەكەنىن راستاعانىن مالىمدەدى.
باس پروكۋراتۋرانىڭ حابارلاۋىنشا، قازىرگى تاڭدا رەسەيدىڭ 39 ازاماتى قىلمىستىق جاۋاپكەرشىلىككە تارتىلدى. ولاردىڭ بارلىعىن كييەۆ ۋكرايناعا قارسى سوعىس اشۋعا ايىپتى دەپ ەسەپتەيدى.
دونباستاعى جانجال 2014 جىلى كوكتەمدە قىرىمنىڭ رەسەيلىك اننەكسياسىنان سوڭ باستالدى. كييەۆ جانە باتىس ەلدەرى رەسەيدى سەپاراتيستەرگە قولداۋ كورسەتتى دەپ ايىپتايدى. كرەمل بۇل ايىپتاۋلاردى جوققا شىعارىپ وتىر.
