الماتىدا بٸر جىلدان بەرٸ كەسٸپكەر ۆلاديسلاۆ ليحاچەۆ پەن ونىڭ بۇرىنعى ەنەسٸ جەنە ەيەلٸ اراسىنداعى سوت داۋى جالعاساتىن بولدى. بٷگٸن الماتىدا ٶتكەن باسپاسٶز كونفەرەنتسيياسىندا بۇرىنعى ەنەسٸ ليلييا انوشينا مەن زاڭگەر تاتيانا بەلوۆادان زارداپ شەكتٸم دەگەن رەسەيلٸك ازامات اپپەليياتسييالىق شاعىم تٷسٸرگەنٸن مەلٸمدەدٸ. جوعارىداعى ەكٸ تۇلعاعا قاتىستى قوزعالعان قىلمىس ٸس نەگٸزٸندە الماتى قالاسىنىڭ قىلمىستىق ٸستەر جٶنٸندەگٸ مامانداندىرىلعان اۋدانارالىق سوتى 2026 جىلعى 21 مامىردا ٷكٸم شىعارعان. سوت تاتيانا بەلوۆانى ەكٸ باپ بويىنشا كٸنەلٸ دەپ تاۋىپ, تاعى بٸر باپ بويىنشا اقتاپ شىققان, دەپ جازادى Dalanews.kz
ەندٸ جەبٸرلەنۋشٸ ۆلاديسلاۆ ليحاچەۆ پەن ونىڭ ادۆوكاتتارى كٷدٸكتٸ بەلوۆانى قازاقستان رەسپۋبليكاسى قىلمىستىق كودەكسٸنٸڭ 190-بابىنىڭ 4-بٶلٸگٸنٸڭ 2-تارماعىندا كٶزدەلگەن الاياقتىق ەپيزودى بويىنشا دا كٸنەلٸ دەپ تابۋدى سۇرايدى. سوت وتىرىسى الداعى سەيسەنبٸدە الماتى قالالىق سوتىندا ٶتەدٸ.
“يە, بەلوۆاعا تاعىلعان ٷش بٸردەي ايىپپەن ول جازالانىپ, تٷرمەگە وتىرۋى كەرەك ەدٸ. قازاقستان رەسپۋبليكاسى قىلمىستىق كودەكسٸنٸڭ 419-بابىنىڭ 3-بٶلٸگٸندە كٶزدەلگەن كٶرٸنەۋ جالعان ارىز بەرۋ قىلمىسىن جاساعانى ٷشٸن كٸنەلٸ. بوپسالاۋ بابى بويىنشا دا ايىپتى. ەندەشە نەلٸكتەن الاياقتىق ٷشٸن اقتالىپ وتىر. وسى جەرٸ بٸز ٷشٸن تٷسٸنٸكسٸز. سوتتىڭ العاشقى ينستانتسيياسىندا شىعارىلعان ٷكٸممەن كەلٸسپەيمٸز. قازٸر مەنٸڭ ادۆوكاتارىم الماتى قالالىق سوتىنا وسى ٸستٸ قايتا سارالاۋدى ۇسىنىپ, اپپەليياتسييالىق شاعىم تٷسٸرٸپ وتىر. اللىڭعى سوت تاعايىنداعان جازا, سونداي-اق سوتتىڭ جاسالعان قىلمىستىڭ سيپاتى, قوعامدىق قاۋٸپتٸلٸك دەرەجەسٸ جەنە ونىڭ سالدارى تۋرالى قورىتىندىلارى زاڭ تالاپتارىنا سەيكەس كەلمەيدٸ, جەتكٸلٸكتٸ نەگٸزدەلمەگەن ەرٸ ەدٸلەتسٸز دەپ ەسەپتەيمٸن”,- دەيدٸ ۆلاديسلاۆ ليحاچەۆ.
جەبٸرلەنۋشٸ دەپ تانىلعان كەسٸپكەر ٶز ارىزى نەگٸزٸندە 200 مىڭ اقش دوللارىنان استام قاراجاتتىڭ قايتارىلماۋىنا بايلانىستى قىلمىستىق ٸس قوزعاۋدى تالاپ ەتٸپ قر باس پروكۋرورىنا ارىز جازعان. ال 2024 جىلى كەرٸسٸنشە ونىڭ ەنەسٸ انيۋشينا مەن ونىڭ تانىسى بەلوۆا رەسەيدە تۇراتىن كەسٸپكەردٸڭ ٶزٸن ايىپتاپ, قۇقىق قورعاۋ ورگاندارىنا ارىزدانعان. ليحاچەۆكە قارسى قازاقستاندا قىلمىستىق ٸس قوزعالىپ, وعان ٸزدەۋ جاريالانادى. پوليتسيياعا ٶزٸ كەلٸپ تٷسٸنٸكتەمە بەرگەن سوڭ, تەرتٸپ ساقشىلارى ونىڭ بۇرىنعى ەنەسٸ ليلييا انوشينا مەن وعان زاڭگەرلٸك قىزمەت كٶرسەتەتٸن تاتيانا بەلوۆاعا قاتىستى ٷش باپپەن ٸس قوزعادى. بوپسالاۋ, الاياقتىق جەنە قۇقىق قورعاۋ ورگاندارىنا كٶرنەۋ جالعان اقپارات بەرگەن دەگەن باپتارمەن بۇل ٸس سوتقا جولدانادى.
ليحاچەۆتٸڭ ايتۋىنشا, كٶلەمٸ 250 مىڭ اقش دوللارىن ەيەلٸنٸڭ اناسى انيۋشينا مەن زاڭگەر بەلوۆاعا شتەلدەن 5 اۆتوكٶلٸك ەكەلۋ ٷشٸن بەرگەن. الايدا بۇل قاراجاتتى ٶز پايدالارىنا جاراتقان ەكٸ ەيەل ليحاچەۆتٸڭ ٶزٸنە جالا جاۋىپ, تەرگەۋ ورگاندارىنا جالعان مەلٸمەتتەر بەرگەن. سٶيتٸپ كٶلٸك ەكەلٸپ ساتۋدى جوسپارلاعان بيزنەسمەندٸ قورقىتىپ-ٷركٸتكەن. ونى دەلەدەيتٸن اۋديوجازبالار مەن ٶزگە دە دەلەلدەر سارالانىپ, بۇل ٸس بويىنشا ۆلاديسلاۆ ليحاچەۆ جەبٸرلەنۋشٸ دەپ تانىلدى.
بٷگٸنگٸ باسپاسٶز مەسليحاتىندا ۆلاليسلاۆ ليزاچەۆتٸڭ ادۆوكاتتارى سوتتىڭ ٸستٸ بۇرا تارتقانىن مەلٸمدەپ, الماتى قالاسىنىڭ قىلمىستىق ٸستەر جٶنٸندەگٸ مامانداندىرىلعان اۋدانارالىق سوتىنىڭ سۋدياسى نۇرلانوۆتىڭ ەرەكەتتەرٸن سىنعا الدى. ادۆوكات الەساندر باريسەنكو بٸرٸنشٸ ساتىداعى سوت ٷكٸمٸمەن كەلٸسپەۋ نەگٸزدەرٸن العا تارتتى.
“مەنٸڭ قورعاۋىمداعى ليحاچەۆ بٸرٸنشٸ ساتىداعى سوتتىڭ جوعارىدا كٶرسەتٸلگەن بٶلٸكتەگٸ ٷكٸمٸمەن كەلٸسپەيدٸ. سەبەبٸ ونى زاڭسىز جەنە نەگٸزسٸز دەپ سانايمىن. سوندىقتان ول قازاقستان رەسپۋبليكاسى قىلمىستىق-پروتسەستٸك كودەكسٸنٸڭ 433-بابىندا كٶزدەلگەن نەگٸزدەر بويىنشا كٷشٸن جويۋعا جاتادى.
داۋ تۋعىزىپ وتىرعان ٷكٸمدٸ شىعارۋ كەزٸندە سوت قىلمىستىق جەنە قىلمىستىق-پروتسەستٸك زاڭ تالاپتارىنىڭ ەلەۋلٸ بۇزۋشىلىقتارىنا جول بەردٸ. اتالعان زاڭبۇزۋشىلىقتار جيىنتىعىندا قابىلدانعان شەشٸمنٸڭ زاڭدىلىعىنا, نەگٸزدٸلٸگٸنە جەنە ەدٸلدٸگٸنە تٸكەلەي ەسەر ەتتٸ دەپ سانايمىز”,- دەيدٸ قورعاۋشى.
سوت تالقىلاۋى بارىسىندا دەلەلدەمەلەردٸ جان-جاقتى, تولىق, وبەكتيۆتٸ جەنە تٸكەلەي زەرتتەۋ قاعيداتتارى ساقتالماعان. كەرٸسٸنشە, سوت تەرگەۋٸ بٸرجاقتى سيپاتتا جٷرگٸزٸلٸپ, جەبٸرلەنۋشٸ تاراپتىڭ پروتسەستٸك قۇقىقتارى جٷيەلٸ تٷردە شەكتەلگەن, دەپ سانايمىز دەيدٸ الەكساندر بوريسەنكو.
“اتاپ ايتقاندا, سوت بٷكٸل سوت تالقىلاۋى بارىسىندا جەبٸرلەنۋشٸ مەن ونىڭ ٶكٸلٸ ۇسىنعان ٶتٸنٸشحاتتاردى ٷنەمٸ قاناعاتتاندىرۋدان باس تارتتى. سونىڭ ٸشٸندە, جەبٸرلەنۋشٸنٸڭ ٶزٸ سوت وتىرىسىنا قاتىسۋىن قامتاماسىز ەتكەن كۋەنٸ جاۋاپ الۋعا شاقىرۋ تۋرالى ٶتٸنٸش تە قاناعاتتاندىرىلمادى. سونىمەن قاتار, سوت قىلمىستىق ٸستٸ دۇرىس شەشۋ ٷشٸن ەلەۋلٸ ماڭىزى بار جازباشا دەلەلدەمەلەردٸ ٸسكە تٸركەۋدەن بٸرنەشە رەت باس تارتتى. ال جەبٸرلەنۋشٸ تاراپ ۇسىنعان كەيبٸر ٶتٸنٸشحاتتار زاڭدا بەلگٸلەنگەن تەرتٸپپەن سوت وتىرىسىندا مٷلدە قارالماي قالدى”,- دەيدٸ ليحاچەۆتٸڭ ادۆوكاتى.
ال كەرٸسٸنشە سوت قورعاۋ تاراپىنىڭ ٶتٸنٸشحاتتارىن قاناعاتتاندىرىپ, سوتتالۋشى تاتيانا بەلوۆا مەن ونىڭ قورعاۋشىلارى ۇسىنعان شىعۋ تەگٸ كٷمەندٸ قۇجاتتاردى قىلمىستىق ٸس ماتەريالدارىنا تٸركەگەن. كەيٸننەن سوت ٷكٸمنٸڭ ۋەجدەۋ بٶلٸمٸندە دەل وسى ماتەريالدارعا سٸلتەمە جاسالعانى تاڭقالدىردى. بٸز ۇسىنعان ٶتٸنٸشحاتتاردىڭ قارالۋى جەبٸرلەنۋشٸ تاراپتىڭ قۇقىقتارى مەن زاڭدى مٷددەلەرٸنە تٸكەلەي ەسەر ەتەتٸنٸ سٶزسٸز ەدٸ, دەيدٸ ادۆوكاتتار.
وسىلايشا, بٸرٸنشٸ ساتىداعى سوت تاتيانا بەلوۆانى كٶرٸنەۋ جالعان ارىز بەرۋ قىلمىسىن جاساعانى ٷشٸن كٸنەلٸ دەپ دۇرىس تانىعانىمەن, جاسالعان قىلمىستىڭ قوعامدىق قاۋٸپتٸلٸك دەرەجەسٸن جەنە سوتتالۋشىنىڭ جەكە باسىن دۇرىس باعالاماعان. سونىڭ سالدارىنان وعان شامادان تىس جەڭٸل ەرٸ ەدٸلەتسٸز جازا تاعايىندالعان.
سوت بەلوۆانىڭ كٶرٸنەۋ جالعان ارىزدى الدىن الا جوسپارلاپ بەرگەنٸنە, ونىڭ الاياقتىق ەرەكەتتەرٸن جاسىرۋ تەسٸلٸ بولعانىنا تيٸستٸ قۇقىقتىق باعا بەرمەگەن. سونىمەن قاتار, ارىز بەرگەننەن كەيٸن بەلوۆا ت.ۆ. زاڭعا قايشى ەرەكەتتەرٸن توقتاتپاي, ۆلاديسلاۆ گەننادەۆيچ ليحاچەۆتٸ قىلمىستىق جاۋاپكەرشٸلٸككە تارتۋعا باعىتتالعان ەرەكەتتەرٸن جالعاستىرعانى, بۇقارالىق اقپارات قۇرالدارى ارقىلى جالعان مەلٸمەتتەر تاراتقانى, جاساندى دەلەلدەر قالىپتاستىرۋعا ەرەكەتتەنگەنٸ, بۇرىن حابارلاعان جالعان مەلٸمەتتەرٸن قولداپ وتىرعانى جەنە سوت ٷكٸمٸ شىعارىلعانعا دەيٸن كٸنەسٸن مويىنداپ, جاساعان ٸسٸنە ٶكٸنبەگەنٸ دە ەسكەرٸلمەگەن.
بۇدان بٶلەك, سوت جەبٸرلەنۋشٸ ۆلاديسلاۆ گەننادەۆيچ ليحاچەۆكە كەلتٸرٸلگەن زارداپتىڭ اۋىرلىعىنا تيٸستٸ باعا بەرمەدٸ. سونىڭ نەتيجەسٸندە مورالدىق زيياندى ٶتەۋ مٶلشەرٸ نەگٸزسٸز تٶمەندەتٸلٸپ وتىر. وسى مەن-جايلاردى ەسكەرە وتىرىپ, تاتيانا بەلوۆاعا تاعايىندالعان جازا قازاقستان رەسپۋبليكاسى قىلمىستىق كودەكسٸنٸڭ 52, 53 جەنە 63-باپتارىنىڭ تالاپتارىنا, ەدٸلدٸك پەن قىلمىستىق جاۋاپتىلىقتى دارالاندىرۋ قاعيداتتارىنا سەيكەس كەلمەيدٸ. سوندىقتان جازا باس بوستاندىعىنان ايىرۋمەن بايلانىستى نەعۇرلىم قاتاڭ جازاعا اۋىستىرىلۋعا, ال مورالدىق زيياندى ٶتەۋ مٶلشەرٸ ٸستٸڭ ناقتى مەن-جايلارىن ەسكەرە وتىرىپ ۇلعايتىلۋعا تيٸس.
وسىعان بايلانىستى, قازاقستان رەسپۋبليكاسى قىلمىستىق-پروتسەستٸك كودەكسٸنٸڭ 71, 418–426, 430, 431 جەنە 433–442-باپتارىن باسشىلىققا الا وتىرىپ, الماتى قالاسىنىڭ قىلمىستىق ٸستەر جٶنٸندەگٸ مامانداندىرىلعان اۋدانارالىق سوتىنىڭ 2026 جىلعى 21 مامىرداعى ٷكٸمٸنٸڭ بەلوۆانى قازاقستان رەسپۋبليكاسى قىلمىستىق كودەكسٸنٸڭ 190-بابىنىڭ 4-بٶلٸگٸنٸڭ 2-تارماعى بويىنشا اقتاعان بٶلٸگٸنٸڭ كٷشٸن جويۋدى سۇرايمىن. ال اتالعان بٶلٸگٸندە جاڭا ايىپتاۋ ٷكٸمٸن شىعارىپ, تاتيانا بەلوۆانى قازاقستان رەسپۋبليكاسى قىلمىستىق كودەكسٸنٸڭ 190-بابى 4-بٶلٸگٸنٸڭ 2-تارماعىندا كٶزدەلگەن قىلمىستىق قۇقىق بۇزۋشىلىقتى جاساعانى ٷشٸن كٸنەلٸ دەپ تانىپ, باپ سانكتسيياسى شەگٸندە باس بوستاندىعىنان ايىرۋ تٷرٸندەگٸ جازا تاعايىنداۋدى تالاپ ەتەمٸز, دەيدٸ جەبٸرلەنۋشٸلەر.
اپپەليياتسييالىق شاعىم 14 شٸلدەدە الماتى قالالىق سوتىندا قارالادى.
سوڭى.
