پرەمەر-مينيستر ولجاس بەكتەنوۆ ۇكىمەتتەگى باسپا ءسوز كونفەرەنسياسىندا الماتى تاۋ كلاستەرىن دامىتۋ جونىندەگى اۋقىمدى جوسپارلارىمەن ءبولىستى، دەپ حابارلايدى Dalanews.kz.
جوبا بىرنەشە باعىتتاردى قامتيدى: جۇمىس ىستەپ تۇرعان كۋرورتتاردان باستاپ جاڭا تۋريستىك ايماقتاردى كەڭەيتۋگە دەيىن.
"الماتى تاۋلارى - ءبىزدىڭ ۇلكەن بايلىعىمىز ءارى يگىلىگىمىز. مۇنداي ادەمى تاۋلار، شاڭعى تەبۋگە ارنالعان ورىن الەمدەگى ساناۋلى بولىپ تابىلادى. سونىقتان وسى الەۋەتتى ءتيمىدى پايدالانعانىمىز ابزال. سول سەبەپتى ءبىز الماتى تاۋ كلاستەرىن دامىتاتىن بولامىز. ءقازىر بىزدە وسىنداي جوعارى دەڭگەيدەگى ينفراقۇرىلىم تەك شىمبۇلاقتا عانا بار، ءبىراق تراسسالاردىڭ ۇزىندىعى شەكتەۋلى، ياعني تۋريستەردى قابىلداۋ مۇمكىندىگى دە شەكتەۋلى. ءبىز الماتى كلاستەرىن كەڭەيتۋ بويىنشا ۇلكەن باعدارلامانى، جوبانى قابىلدادىق. ول تالعار تاراپىنان باستالادى: ويقاراعاي، بۋتاكوۆكا، پيونەر شاتقالى، قيماسار، ودان ءارى شىمبۇلاق جانە قاسكەلەڭ باعىتىندا داميدى"، - دەپ اتاپ ءوتتى ولجاس بەكتەنوۆ.
جاياۋ جۇرگىنشىلەر جولدارىن، اسپالى جولداردى جانە سەرۆيستىك وبەكتىلەردى قوسا العاندا، زاماناۋي تاۋ شاڭعىسى جانە تۋريستىك ينفراقۇرىلىمنىڭ قۇرىلىسى جوسپارلانۋدا.
پرەمەر-مينيستر كوك-جايلاۋ شاتقالىندا زاماناۋي تاۋ شاڭعىسى ينفراقۇرىلىمىنىڭ قۇرىلىسى بيىل باستالاتىنىن اتاپ ءوتتى. جوبا اشىق تۇردە جۇزەگە اسىرىلادى. بۇل ارادا ەكولوگيالىق قاۋىپسىزدىكتىڭ جوعارى ستاندارتتارىنا ەرەكشە نازار اۋدارىلاتىن بولادى.
بۇعان دەيىن سايتىمىزدا "قازاقتىڭ كۋرشيەۆەلى: ەلدەگى تاۋ شاڭعىسى ءتۋريزمىن قالاي دامىتۋعا بولادى؟" دەگەن ماقالا جاريالانعان بولاتىن.
